WEETST du, wäa de stoakjsta Mensch wia, waut jeemols jeläft haft? Daut wia Simson. Hee wia een Rechta. Simson haud siene Krauft von Jehova. Noch ea Simson jebuaren wia, säd Jehova to dän siene Mutta: ‘Du woascht boolt eenen Sän haben. Dee woat de Israeliten jäajen de Filista halpen.’

De Filista läwden en daut Launt Kanaan un wieren een schlajchtet Volkj. Dee hauden väle Soldoten un wieren sea schlajcht to de Israeliten. Eemol wia Simson jroz oppem Wajch no de Filista, aus am onverhofs een groota Leiw todoak kjeem un breld. Oba Simson muak dän Leiw jrodsoo met siene Henj doot. Hee muak uk hundade beese Filista doot.

Lota veleewd Simson sikj en eene Mejal, waut Delila heet. De väaschte Mana von de Filista vespruaken Delila jieda 1 100 Selwastekja, wan see an sajen wudd, wuarom Simson soo stoakj wia. Delila jankad daut gaunze Jelt sea. Ar wia daut endoont om Simson uk om Gott sien Volkj. Un soo fruach see Simson emma un emma wada, wuarom hee soo stoakj wia.

Schlieslich kjrieech see am soo wiet, daut hee ar daut Jeheemnis veroden deed. ‘Mie sent noch kjeenmol de Hoa aufjeschnäden worden’, säd hee. ‘Ekj sie een Nazara. Daut meent, daut Gott mie von Jeburt aun to eenen besondren Deena fa am jewält haft. Wan see mie de Hoa aufschnieden deeden, wudd ekj miene Krauft velieren.’

Aus Delila daut ieescht wist, leet see Simson opp äare Schoot enschlopen. Dan roopt see eenen Maun un leet Simson de Hoa aufschnieden. Aus Simson oppwuak, haud hee siene Krauft veloaren. Dan kjeemen de Filista nenn un neemen am faust. Dee stuaken am de Uagen ut un muaken am to äaren Sklow.

Eenen Dach hauden de Filista een grootet Fast fa äaren Gott Dagon. Dee holden Simson utem Jefenkjnis rut toom sikj äwa am domm haben. Entweschen hauden siene Hoa oba aul wada jewossen. Simson säd to dän Jung, waut am aune Haunt leiden deed: ‘Lot mie de Stendasch aunfoten, waut daut Hus hoolen.’ Dan bäd Simson to Jehova om Krauft un foot de Stendasch aun. Hee säd met lude Stemm: ‘Lot mie met de Filista toop stoawen.’ Doa wieren 3 000 Filista opp daut Fast. Aus Simson jäajen de Stendasch drekjt, bruak daut gaunze Hus toop, un aul dise beese Menschen storwen.