¿LA AWETAʼM su ubʼiʼ ri jun achi nimalaj uchoqʼabʼ xkʼaseʼ ojer cho ruwäch ulew? Are jun juez ubʼiʼ Sansón. Are ri Jehová xuya uchoqʼabʼ ri Sansón. Chiʼ majaʼ xalaxik ri Sansón, Jehová xubʼij wariʼ che ri unan: ‹Kkʼejeʼ na jun awal ala. Kubʼan ajkʼamal bʼe rech keʼutoʼ ri Israel pa kiqʼabʼ ri filisteos›.

Ri täq filisteos e itzel täq winaq e kʼo pa Canaán. Kʼo sibʼalaj täq kʼi ajchʼoj kukʼ, rumal laʼ kkebʼan kʼäx chike ri täq israelitas. Xopan jun qʼij chiʼ ri Sansón xbʼe ni, o jachiʼ, e kʼo wi ri filisteos, xel lo jun nimalaj köj chirij. Tekʼuriʼ Sansón xukamsaj ri köj xiw rukʼ uqʼabʼ. Xuqujeʼ xeʼukamsaj sibʼalaj kʼi täq filisteos.

Tekʼuriʼ Sansón xbʼe ranimaʼ chirij jun ali ubʼiʼ Dalila. Ri täq ajkʼamal bʼe filisteos xketzujuj che jujun chike kkeya 1.100 täq saq pwäq che ri Dalila we kubʼij chike sulaʼ ri kubʼan che ri Sansón che sibʼalaj kʼo uchoqʼabʼ. Dalila kraj ri pwäq. Qastzij täj che rachiʼl ri Sansón, xuqujeʼ rech ta ri utinamit ri Ajawaxel. Rumal laʼ xuya ta kan utaʼik che ri Sansón suche sibʼalaj nim uchoqʼabʼ.

Kʼisbʼal re, Dalila xkun che uresaxik che Sansón, suche sibʼalaj nim uchoqʼabʼ. ‹Kʼot jumul qupim ri nuwiʼ›, xchaʼ. ‹Chiʼ xinkʼejeʼik, ri Ajawaxel xinuchaʼo rech kinbʼan jun loqʼalaj upatinel kbʼix nazareo chwe. We kqupix ri nuwiʼ, kel ri nuchoqʼabʼ›, xchaʼ.

Chiʼ Dalila xuta wariʼ, xubʼan che Sansón che xwar puwiʼ ri uchʼek. Tekʼuriʼ xuya che jun achi xok bʼik rech kuqupij ri uwiʼ. Chiʼ ri Sansón xkʼastajik kʼo ta chi uchoqʼabʼ. Xeʼok bʼi ri filisteos tekʼuriʼ xkechap bʼik. Xkesaj ri kebʼ ubʼaqʼwach, tekʼuriʼ xkebʼan kimos che.

Xopan jun qʼij che ri filisteos xkebʼan jun nimalaj nimqʼij rech kkeya uqʼij ri kidios ubʼiʼ Dagón, tekʼuriʼ xkesaj lo ri Sansón ni, o jachiʼ, kitzʼapim wi rech ketzeʼn chirij. Tekʼuriʼ, ri uwiʼ ri Sansón xkʼiy chik. Sansón xubʼij wariʼ che ri akʼal rekʼam che uqʼabʼ: ‹Chaya chwe kinchap ri raqan täq ja›, xchaʼ. Rukʼ wariʼ ri Sansón xuta uchoqʼabʼ pa chʼawem che Jehová, tekʼuriʼ xeʼuchap ri raqan täq ja. Tekʼuriʼ ko xchʼawik: ‹Chaya chwe kinkam kukʼ ri täq filisteos›, xchaʼ. Kʼo 3.000 filisteos puwiʼ ri ja xuqujeʼ weneʼ, o patne, e kʼo kʼi nikʼaj chik ikim pa ri nimqʼij tijan kbʼanik, chiʼ ri Sansón xuchʼikmij ri täq raqan ja, xtzaq lo ri ja tekʼuriʼ xekam konojel wa itzel täq winaq.