YU SABI a nen fu a moro tranga man di ben libi wan ten? A de wan krutuman di ben nen Simson. Na Yehovah e gi Simson en krakti. Srefi bifo Simson mama meki en, Yehovah e taigi en mama: ’Heri esi yu o kisi wan manpikin. A sa bigin fu frulusu Israel fu den Filistiasma.’

Den Filistiasma na ogri sma di e libi na Kanan. Den abi furu fetiman èn den e kwinsi den Israelsma trutru. Wan dei te Simson de na pasi e go pe den Filistiasma e libi, dan wan bigi lew e bari kon miti en. Ma Simson e kiri a lew nanga en soso anu. A e kiri hondrohondro ogri Filistiasma tu.

Bakaten Simson e kon lobi wan uma di nen Delaila. Den Filistia tiriman e pramisi taki ibriwan fu den sa gi Delaila 1100 solfru moni efu a fruteri den san e meki Simson de so tranga. Delaila wani ala a moni dati. A no de wan trutru mati fu Simson noso fu a pipel fu Gado. Fu dati ede a e tan aksi Simson san e meki taki a de so tranga.

Te fu kaba, Delaila e kisi Simson so fara fu taigi en a kibritori fu en krakti. ’Noiti mi wiwiri koti ete’, a e taki. ’Fu sensi mi mama meki mi, Gado ben teki mi fu de en spesrutu futuboi, wan Nasireisma. Efu wan sma koti mi wiwiri, dan mi ben sa lasi mi krakti.’

We, te Delaila e yere disi, a e meki Simson fadon na sribi na tapu en bowtu. Dan a e kari wan man kon na inisei fu koti Simson wiwiri. Te Simson wiki, dan a lasi en krakti. Now den Filistiasma e kon na inisei èn e kisi en. Den e diki en tu ai puru èn e meki a tron wan srafu fu den.

Wan dei den Filistiasma abi wan bigi fesa fu anbegi den gado Dagon. Den e puru Simson fu dungru-oso fu hori en na spotu. Disiten, Simson wiwiri gro baka. Simson e taigi a boi di e tyari en na anu: ’Meki mi fasi den postu di e hori na oso tanapu.’ Simson e begi Yehovah fu kisi krakti, dan a e grabu den postu hori. A e bari taki: ’Meki mi dede nanga den Filistiasma.’ Dri dusun Filistiasma de na a fesa. Te Simson e pusu den postu, dan na oso e fadon broko èn e kiri ala den ogri sma disi.