54-нҗи хекая

Иң гүйчли адам

ДҮНЙӘДЕ иң гүйчли адамың адыны билйәңми? Ол Ысрайылың казысы Шимшон. Оңа гүйҗи Ехова берди. Энтек Шимшон догулманка, Ехова онуң эҗесине: «Сен басым огул дограрсың. Ол Ысрайылы филистилилерден азат эдер» дийди.

Филистилилер Кенган юрдунда яшаян эрбет халкды. Оларың эсгери көпди. Олар ысрайыллылара азар берйәрдилер. Бир гезек Шимшон филистилилериң янына барярка, онуң өңүнден бир улы ёлбарс арлап чыкяр. Йөне Шимшон оны ярагсыз өлдүрйәр. Шейле-де ол йүзлерче эрбет филистилилери өлдүрйәр.

Бирнәче вагтдан Шимшон Делиле атлы гызы сөййәр. Эгер-де Делиле Шимшоның гүйҗүниң сырыны билсе, филистили баштутанларың хер бири 1 100 күмүш теңңе берҗек дийипди. Делиләниң шол пуллары аласы гелйәр. Ол Шимшоның ве Худайың халкының хакыкы досты дәлди. Шонуң үчинем ол Шимшондан гүйҗүниң сырыны бирнәче гезек сораяр.

Ахыры Делиле Шимшоның гүйҗүниң сырыны билйәр. Шимшон: «Мениң сачымы хич хачан гыркмадылар. Догланымдан бәри Худай мени өзүниң айратын гуллукчысы, ягны незири эдип сайлады. Эгер-де мениң сачымы гырксалар, онда мен гүйҗүми йитирерин» диййәр.

Делиле муны биленде, Шимшоны дызында укладяр. Соңра бир адамы чагырып, Шимшоның сачыны гыркдыряр. Шимшон оянанда гүйҗүни йитирипди. Шонда филистилилер оны есир алярлар. Олар онуң ики гөзүни оюп, гул эдйәрлер.

Бир гезек филистилилер Дагон таңрысы үчин улы байрамчылык эденде, Шимшоның үстүнден гүлҗек болуп, оны түрмеден чыкардылар. Шондан бәри Шимшоның сачы ене-де өсди. Шимшон элинден тутуп барян оглана: «Бу җайың сүтүнлерини элләп гөрейин» диййәр. Шонда Шимшон Еховадан гүйч диләп, сүтүнлери тутяр-да: «Гой, мен филистилилер билен өлейин!» дийип гыгыряр. Бу байрамчылыкда 3 000 филистили барды. Шимшон сүтүнлери гозганда, җай йыкыляр. Эрбет адамларың хеммеси өлйәр.

Казылар 13—16-нҗы баплар.