Makani 54: Musankwa Wiinda Nguzu
HENA ulilizyi izina lyamusankwa wiinda nguzu wakaponede? Mubetesi wiitwa kuti Samisoni. Jehova nguumupa Samisoni nguzu nzyajisi. Kufwumbwa Samisoni Katanazyalwa, Jehova wakaambila banyina kuti: ‘Ino-ino uya kuzyala mwana musankwa. Ngoguwe uuya kuvwuna bana Isilayeli kuba Filisiti.’
Iba Filisiti mbantu babi bakkala mu Kenani. Balijisi basankwa banji basikalumamba, alimwi balabapenzya kapati bana Isilayeli. Buzuba bumwi Samisoni keenda kuya kwaakubona bana Isilayeli, munzila wakayaanya syuumbwa mupati wakali kuzya cilila. Pele Samisoni wamujaya syuumbwa kwiinda mukubelesya maanza. Alimwi wajaya myaanda-myaanda yaba Filisiti babi.
Kuzwa waawo, Samisoni wayanda mukaintu wazina lya Delila. Ibasololi bana Filisiti basyomezya Delila kumupa mali aansiliva aasika ku 1,100 ikuti wabaambila icipa kuti Samisoni kajisi nguzu zinji boobu. Delila ulaayanda mali oonse aayo. Tali mulongwe mwini-mwini wa Samisoni alimwi tali muna Leza. Aboobo abuzuba ulamubuzya Samisoni cimupa kuti kajisi nguzu zinji boobu.
Limwi Delila wapa kuti Samisoni aambe cimupa kuti kajisi nguzu. Wati: ‘Masusu aangu taanageledwe kuzwa nindakazyalwa. Kuzwa nindakazyalwa Leza wakandisala kuba mubelesi wakwe uuyandwa kapati wiitwa kuti Nazili. Ikuti ndagelwa inga zyamana nguzu.’
Delila amvwe boobo, wamooneka Samisoni amubili kumane zyamubba ŋonzi. Eelyo waita muntu muŋanda kuti amugele masusu. Abuke Samisoni wajana kuti nguzu zyamana. Iba Filisiti baboola bamujata. Bamubbwalaula meso oonse obilo kumane waba muzike wabo.
Buzuba bumwi ba Filisiti bakabamba pobwe lipati lyakukomba leza wabo Dagoni, aboobo bamuleta Samisoni kuzwa muntolongo kutegwa bamufwubaazye. Aciindi aawa masusu aa Samisoni akomena alimwi. Samisoni ulati kumwana musankwa uumweenzya: ‘Nditondezye misemo yaŋanda ndijate.’ Amane Samisoni wapaila kuli Jehova kuti amupe nguzu, aboobo wiijata misemo. Woongolola kulila, wati: ‘Andifwe aba Filisiti!’ Muŋanda kuli ba Filisiti basika ku 3,000 apobwe, eelyo Samisoni naakadadabala akutonta misemo yaŋanda, iŋanda yakawa akubajaya boonse bantu aaba babi.
Babetesi caandaano 13 kusikila ku 16.
Mibuzyo
- Ngwani zina musankwa wakaponede wiinda nguzu, alimwi ngwani wakamupa nguzu?
- Ncinzi buzuba bumwi Samisoni ncaakacita kuli syuumbwa mupati mbuli mbobona acifwanikiso?
- Makani nzi aamaseseke Samisoni ngaambila Delila acifwanikiso, alimwi mbuti eeci mbocakapa kuti ba Filisiti bakonzye kumujata?
- Mbuti Samisoni mbwaakabajaya basinkondonyina ba Filisiti basika ku 3,000 mubuzuba mbwaakafwa?
Mibuzyo aimwi
- Bala Babetesi 13:1-14.
Mbuti Manowa amukaintu wakwe mbobapa cikozyanyo cibotu kubazyali caboola kumakani aakukomezya bana babo? (Bab. 13:8; Int. 127:3; Ef. 6:4)
- Bala Babetesi 14:5-9 a 15:9-16.
Mbuti cibalo ca Samisoni cakujaya syuumbwa, kuzutula ntambo zipya nzyaakaangidwe alimwi acakujaya bantu bali 1,000 kwiinda mukubelesya mweebo wambongolo mbokutondezya mboubeleka muuya uusalala wa Jehova?
Mbuti muuya uusalala mboutugwasya sunu? (Bab. 14:6; 15:14; Zek. 4:6; Inc. 4:31)
- Bala Babetesi 16:18-31.
Mbuti Samisoni mbwaakanyonganizyigwa abalongwe babi, alimwi ncinzi ncotukonzya kwiiya kumakani aaya? (Bab. 16:18, 19; 1 Kor. 15:33)
