¿WAN maʼ xa naʼa jas sbʼiʼil ja winik ajyel sakʼan mas jel ja yip yuja tuki? Jun jwes sbʼiʼil Sansón. Yeʼna Jyoba ja maʼ wa xyaʼ yi yip ja Sansón. Bʼajtanto oj pojkuk ja Sansón, ja Jyoba yala yabʼ ja snani: «Ojni ajyuk juna wal. Yeʼnani oj stoj ja israʼelenyo bʼa skoltajel bʼa skʼabʼ ja filisteoʼiki».

Ja tantik filisteo mi lekuke sok ti sbʼaje bʼa Canaán. Jel aʼay ja skʼakʼanumeʼi sok ixta wa xyilawe ja israʼelenyo. Jun ekʼele, yajni ja Sansón waj ja bʼa kulane ja filisteoʼiki, jun niwan kʼakʼal choj eljan bʼa oj kʼuxjuk ja Sansón. Pe ja yeʼn jaʼita sok ja skʼabʼi smila ja choji. Chomajkil smila jitsan filisteoʼik.

Tsaʼan ja Sansón och skʼan skʼujol jun ixuk sbʼiʼil Dalila. Jujune ja bʼa olomalik ja filisteo skʼapawe yi ja Dalila 1,100 sat plata ta alji yabʼ yuja Sansón jas yuj jel ja yipi. Dalila jani wa skʼana ja takʼini. Mi meran yamigoʼuk ja Sansoni, cho mini ja xchonabʼil ja Dyosi. Ja yuj ja yeʼn wani sjobʼtalanyi ja Sansón jas yuj jel ja yipi.

Man ja Dalila staʼa modo bʼa oj yal ja Sansón jas yuj jel ja yipi. Ja Sansón yala: «Mini bʼa kʼutsubʼal ja stsoʼtsil kolomi. Man pojkiyon, ja Dyos stsaʼunejon bʼa jun cholal bʼa oj ochkon jastal jun yaʼtijum, jun nazareo. Kʼutsji kʼa ja stsoʼtsil kolomi, oj chʼayuk ja kipi».

Yajni ja Dalila yabʼ ja it, yaʼakan ja Sansón away bʼa sat yechmal. Anto skʼulan a-ochjan jun winik bʼa oj skʼuts yi ja stsoʼtsil yolomi. Yajni ja Sansón yaʼasbʼaj ja bʼa swayeli, chʼaytani ja yipi. Anto ja filisteoʼiki ochye sok syamawe ja Sansoni sok yaweʼel yi xchabʼil ja sbʼakʼ sati sok yawe och jastal smosoʼe.

Jun kʼakʼu, ja tantik filisteoʼiki ayiʼoje jun niwan kʼin bʼa skʼintajel ja sdyose Dagón sok yawe eljan ja bʼa lutan ay ja Sansón bʼa oj stseʼlaye. Malan wan ekʼel ja it, ja stsoʼtsil yolom ja Sansoni wan kʼiʼel. Sansón yala yabʼ ja yal kerem chechubʼal ekʼ yuji: «Kax ajyamkan ja oy kuchan yuj ja naʼitsi». Anto ja Sansón yaʼ yi orasyon ja Jyoba bʼa oj ajukyi yip sok tixa kʼe ya yip ja bʼa oyi. Ti awaniʼa: «Achamkon lajan sok ja filisteoʼiki». Aye 3,000 filisteoʼik ja bʼa kʼini, sok yajni ja Sansón sjutbʼin ja yojyal naʼitsi, kʼe mokʼuk sok yibʼanal ja tantik ixuk winik teyeʼi chʼak chamuke.