MAARAM ka ba kon ano an ngaran han pinakamakusog nga tawo nga nabuhi? Oo, Samson an iya ngaran ngan usa hiya nga hukom. Hi Jehova an naghatag ha iya hin kusog. Bisan antes pa matawo hi Samson, hi Jehova nagsiring ha iya nanay: ‘Diri mag-iiha mag-aanak ka hin lalaki. Hiya an mangunguna ha pagtalwas ha Israel tikang ha mga Pilisteohanon.’

An mga Pilisteohanon magraot nga tawo nga naukoy ha Kanaan. Damu an ira kasundalohan, ngan ginpapakurian gud nira an mga Israelita. Usa ka adlaw, han tikadto hi Samson ha lugar han mga Pilisteohanon, iginkatapo hiya hin nauwang nga daku nga leon. Kondi ginpatay niya ito pinaagi la han iya mga kamot. Ginpatay liwat niya an ginatos nga magraot nga Pilisteohanon.

Katapos, nahigugma hi Samson kan Delila. An Pilisteohanon nga mga lider nagsaad nga an tagsa ha ira mahatag kan Delila hin 1,100 ka bug-os nga salapi kon isumat niya ha ira kon ano an sekreto han kusog ni Samson. Karuyag ni Delila ito ngatanan nga salapi. Diri hiya tinuod nga sangkay ni Samson, o han katawohan han Dios. Salit sige an pagpinakiana ni Delila kan Samson kon kay ano nga makusog hiya hinduro.

Katapos, napirit ni Delila hi Samson ha pagsumat han sekreto han iya kusog. ‘An akon buhok waray pa gud kaaroti,’ siring niya. ‘Tikang han akon katawo, ginpili ako han Dios nga magin iya espesyal nga surugoon nga tinatawag nga Nasareo. Kon aaruton an akon buhok, mawawara an akon kusog.’

Han hinbaroan ini ni Delila, ginpakaturog niya hi Samson nga naulon ha iya paa. Katapos, gintawag niya an usa nga lalaki basi arotan hi Samson. Pagmata ni Samson, waray na an iya kusog. Salit nagkasulod an mga Pilisteohanon ngan gindakop hiya. Ira ginlukàt an iya duha nga mata, ngan nagin uripon hiya nira.

Usa ka adlaw, nagkaada daku nga pyesta an mga Pilisteohanon para ha pagsingba ha ira dios nga hi Dagon, ngan ira ginpagawas hi Samson basi himoon hiya nga pataraw-an. Hito nga panahon, tinubo na an iya buhok. Nagsiring hiya ha bata nga lalaki nga nagtutugway ha iya: ‘Pakapta ako ha mga harigi.’ Katapos, nag-ampo hi Samson kan Jehova para han kusog, ngan kinapot ha mga harigi. Hiya nagsinggit: ‘Itugot nga ako mamatay upod han mga Pilisteohanon.’ May-ada 3,000 nga Pilisteohanon hito nga pyesta. Ngan han iginduso niya an mga harigi, narumpag an tinukod ngan nagkamatay ini ngatanan nga magraot nga tawo.