Samsona
Tantara 54
Samsona
AZÔVY eky lelahy farany fatatra tambony tany? Samsona an̈arany. Izy mpitsara tamin’Israely. Boaka tamy Jehovah nampafatatra izy. Tamy maman’i Samsona navesatra izy, Jehovah nivolan̈a taminany: ‘Hiteraka lelahy anao. Izy hitariky Israely handresy Filistiny.’
Filistiny aby io, olo ratsy fan̈ahy nipetraka ta Kanana. Irô fanôrolahy maro fatatra, ke mampijaly Israelita fo asan-drô. Indraiky andra, Samsona nandalo tamy tanànan-drô filistiny aby io, fanôjy lion masiaka araiky. Natin’i Samsona lion io, kanefa tan̈anany fo namonoany izy. Izy koa mbala nahafaty Filistiny ratsy fan̈ahy 100 aby.
Koa fa nandeha andra, Samsona tia man̈angy araiky, Delila an̈arany. Mpitariky sasany tamy Filistiny nan̈ano vava, fa Delila koa man̈ambara amin-drô raha mampafatatra Samsona, izy hamian-drô volafotsy 1 100. Delila baka ti hahazo volabe io. Sady izy lasitiô tsy ten̈a tia Samsona, ndreky olon’ny Zan̈ahary. Ke isan’andra, izy man̈ontany Samsona antony mampafatatra izy fo.
Farany, nafaosan’i Samsona tamy Delila raha nampafatatra izy. Volan̈iny: ‘Fan̈evako ty tsiary nitapahan̈a. Rango zaho vo teraka, Zan̈ahary nifidy zaho hanompo izy. Nazirita ikahian̈a zen̈y. Ke izikoa tapahan̈a fan̈evako, very edy angôvonakahy.’
Izikoa fa ren̈in’i Delila zen̈y, nataony raha nampandry Samsona tamy fofoan̈anany. Baka iô, nikahiny lelahy araiky hanapaka fan̈evan’i Samsona. Samsona koa fa nifoha, izy tsy fatatra eky. Filistiny aby io amy zay niditry nanambotro izy. Masonany nigilan-drô, baka iô izy nataon-drô andevo.
Andra araiky, Filistiny aby io nan̈ano fetibe, hivavahan̈a tamy Dagona zan̈aharin-drô. Samsona nindesin-drô tiô, atao fimoezan̈a. Tamy zen̈y, fan̈evan’i Samsona nimpody naniry. Volan̈in’i Samsona tamy tsaiky lelahy nitaondra izy tiô: ‘Ambilà zaho hitana pôtôn’ny tran̈obe ty.’ Samsona nivavaka tamy Jehovah, beky mahazo angôvo andronganan̈a pôtô aby io. Nitanany pôtôn’ny tran̈obe io, baka iô volan̈iny: ‘Ambilà zaho maty miaraka amy Filistiny.’ Samsona koa fa niôndriky nan̈aposy pôtô aby in̈y, raongan̈a tran̈obe io, ke 3 000 Filistiny nan̈ano fety tao, naty niaraka taminany.
Mpitsara toko faha-13 ziska toko faha-16.
