Ododo 55

Latin Awobi Tiyo pi Lubanga

MAN pe latin awobi mamwonya tutwal? Nyinge Camuel. Laco ma cinge tye i wi Camuel-li aye Eli lalam dog madit me Icrael. Ca-ni aye Elkana won Camuel gin ki minne Anna gitye ka kelo Camuel bot Eli.

Camuel pud tye ki mwaka angwen nyo abic keken. Ento en obikwo kany i kema pa Jehovah gin ki Eli kacel ki lulam dog mukene. Pingo Elkana gin ki Anna gimiyo ngat matidi calo Camuel kuman me tic pi Jehovah i kema-ni? Wanenu kong.

Mwaka manok ma okato i ngec onongo Anna cwinye cwer tutwal. Gin mumiyo cwinye cwer aye ni en onongo pe twero nywalo latin, dok en onongo mito latin adada. Pi meno i nino mo acel ma Anna ocito i kema pa Jehovah, en olego ni: ‘Ai Jehovah, wi pe owil i koma do! Ka imiya latin awobi, akwonge ni abimiyo en boti wek oti piri pi kare me kwone ducu.’

Jehovah ogamo lega ma Anna, ci i nge dwe mogo mapol en onywalo Camuel. Anna omaro latinne mada, dok ocako pwonye lok i kom Jehovah ma en pud tidi adada. En owaco bot cware ni: ‘Tekki Camuel odongo ma dong pe mito apida, abitere i kema wek oti pi Jehovah kunnu.’

Man aye gin ma waneno Anna gin ki Elkana tye ka timo i cal-li. Dok pien lunyodo pa Camuel opwonye maber tutwal, en cwinye yom adada me tic pi Jehovah i kema pa Jehovah. Mwaka ki mwaka Anna gin ki Elkana gibino ka woro i kema man ma dok pat-ti, dok gilimo latin awobigi matidi-ni. Dok mwaka ki mwaka Anna kelo kanyi labade pe manyen ma en oyubo pi Camuel.

Ka mwaka woto ki kato, Camuel medde ameda ki tic i kema pa Jehovah, kun Jehovah kacel ki dano gimare. Ento Kopuni gin ki Finekaci awobe pa lalam dog madit Eli onongo kitgi pe beco. Gin onongo gitimo jami maraco mapol, dok gimiyo jo mukene gikwero winyo Jehovah bene. Eli onongo omyero okwanygi woko ki i tic macalo lulam dog, ento en pe timo meno.

Camuel pe ye ni gin mo keken marac ma timme i kema-ni ogenge tic pi Jehovah kadi en pud latin. Ento pien jo manok keken aye gimaro Jehovah atikatika, oweko okato kare malac mada ma Jehovah onongo dong pud peya oloko ki ngat mo. Ka Camuel odongo odoko madit manok man aye gin ma otimme:

Camuel onongo onino i kema i kare ma dwan mo ocoye woko. En ogamo ni: ‘An a en.’ Ci en oa malo oringo bot Eli, ci owaco ni: ‘In ilwonga, an dong en.’

Ento Eli ogamo ni: ‘An pe alwongi, dok i kabuto.’ Pi meno Camuel odok cen i kabuto.

I ngeye lwongo dok owinnye tyen me aryo ni: ‘Camuel!’ Pi meno Camuel oa malo ci dok oringo bot Eli odoco. En owacce ni: ‘In ilwonga, an dong a en.’ Ento Eli ogamo ni: ‘Latinna, an pe alwongi. But dok piny odoco.’ Pi meno Camuel odok i kabuto.

Dwan-ni dok olwongo tyen me adek ni: ‘Camuel!’ Pi meno Camuel oringo bot Eli. En owacci: ‘An a en. Kadi ningo kombeddi-ni dong ilwonga. Ka kenyo Eli dong ongeyo woko ni myero bed Jehovah aye tye ka lwongo.’ Pi meno en owaco bot Camuel ni: ‘Cit ibut piny doki, ci ka en dok olwongi odoco, in myero iwac ni: “Jehovah, lok gire, pien laticci tye ka winyo.” ’

Man aye gin ma Camuel owaco i kare ma Jehovah dok olwonge odoco. Jehovah dong otito bot Camuel ni ebipwodo Eli ki awobene. Lacen Kopuni gin ki Finekaci guto i lweny ki Lupiliciti, dok i kare ma Eli owinyo gin mutimme en opoto piny, oturo ngute ci oto woko bene. Pi meno lok pa Jehovah ocobbe kakare.

Camuel odongo ci odoko langolkop me agikki i Icrael. I kare ma en oti, lwak gupenye ni: ‘Yer kabaka mo wek otelwa.’ Camuel pe mito timo man, pien i ada Jehovah aye kabakagi. Ento Jehovah otitte ni owiny lwak.

1 Camuel 1:1-28; 2:11-36; 4:16-18; 8:4-9.