?YU TING se smol boe ya i naes? Nem blong hem, Samuel. Mo man ya we i stap putum han blong hem long hed blong Samuel, hemia hae pris blong Isrel we nem blong hem Ilae. Tufala we i karem Samuel i kam long Ilae, hemia papa mo mama blong Samuel we nem blong tufala Elkana mo Hana.

Long taem ya, Samuel i gat fo no faef yia nomo. Hem i kam long ples ya blong stap wetem Ilae mo ol narafala pris long haos tapolen blong Jeova. ?From wanem Elkana mo Hana tufala i tekem Samuel i go blong mekem wok long haos blong Jeova, taem hem i smol olsem? Bambae yumi luk.

Sam yia bifo, Hana i bin harem nogud tumas. Hem i wantem tumas blong gat wan pikinini, be hem i no save karem pikinini. Ale, wan dei, Hana i go long haos tapolen blong Jeova, mo hem i prea se: ‘!Jeova, plis yu no fogetem mi! Sipos yu letem blong mi mi gat wan pikinini we i boe, mi mi promes se bambae mi givim hem long yu, blong hem bambae i mekem wok blong yu oltaem long laef blong hem.’

Jeova i ansa long prea blong Hana, mo sam manis biaen, hem i bonem Samuel. Hana i lavem smol boe blong hem. Taem boe ya i smol we i smol, Hana i stat blong tijim hem long saed blong Jeova. Hem i talem long man blong hem se: ‘Taem we pikinini ya i kam bigwan, i livim titi, bambae mi tekem hem i go long haos blong Jeova, nao bambae hem i stap olwe long ples ya.’

Hemia nao samting we Hana mo Elkana tufala i stap mekem long pija ya. Mo from we tufala i tijim gud Samuel, hem i glad blong mekem wok blong Jeova long haos tapolen ya blong Hem. Evri yia, Hana mo Elkana tufala i kam blong mekem wosip long spesel haos tapolen ya, mo blong luk boe blong tufala. Mo evri yia, Hana i somap wan niufala kot blong Samuel mo i karem i kam long hem.

Ol yia oli pas, mo Samuel i stap mekem wok long haos blong Jeova. Jeova i glad moa oltaem long hem mo ol man tu oli glad long hem. Be tufala boe blong hae pris ya Ilae, we nem blong tufala Hofni mo Finehas, tufala i man nogud. Tufala i stap mekem plante nogud fasin, mo tufala i pulum plante narafala tu blong oli mekem samting we Jeova i no laekem. Ilae nao i mas lukluk long bisnes ya mo i mas tekemaot tufala long wok blong pris. Be hem i no mekem wan samting.

I gud we yangfala Samuel i no letem ol nogud fasin we tufala i stap mekem long haos blong God oli pulum hem blong lego wok blong Jeova. Long taem ya, i gat smol man nomo we oli rili lavem Jeova. Taswe, longtaem finis i kam, Jeova i no moa toktok i kam long wan man long wol. Be taem Samuel i kam bigwan moa, Jeova i toktok long hem.

Samuel i stap slip long haos blong God, nao wan man i singaot hem. Samuel i ansa se: ‘!Yes!’ Mo hem i girap, i resis i go luk Ilae, i talem se: ‘Yu yu stap singaot mi. Mi ya.’

Be Ilae i talem se: ‘Mi mi no singaot yu. Yu gobak yu slip.’ Ale, Samuel i gobak, i slip.

Bakegen, man ya i singaot hem se: ‘!Samuel!’ Nao Samuel i girap, i go luk Ilae bakegen, i talem se: ‘Yu yu stap singaot mi. Mi ya.’ Be Ilae i talem long hem se: ‘Pikinini blong mi, mi no singaot yu. Yu gobak, yu slip.’ Ale Samuel i gobak, i slip.

Bakegen, we i mekem namba tri taem blong hem, man ya i singaot hem se: ‘!Samuel!’ Nao hem i girap, i spid i go luk Ilae, i talem se: ‘Yu yu stap singaot mi. Mi ya.’ Ilae i luksave nao se Jeova i stap singaot boe ya. Nao hem i talem long Samuel se: ‘Yu gobak, yu slip. Mo sipos yu harem we hem i singaot yu bakegen, yu talem se: “Jeova, yu toktok. Mi mi man blong wok blong yu, mi stap harem yu ya.” ’

Ale taem Jeova i singaot Samuel bakegen, Samuel i mekem olsem we Ilae i talem long hem. Nao Jeova i talem long Samuel se bambae hem i panisim Ilae mo tufala boe blong hem. Biaen, ol man Isrel oli go mekem faet long ol man Filistia, nao Hofni mo Finehas tufala i ded long faet ya. Taem Ilae i harem nius ya se tufala i ded, hem i foldaon long stul we hem i stap sidaon long hem, i bang long graon, nek blong hem i brok, nao hem tu i ded. Ale tok we Jeova i bin talem i kamtru.

Samuel i stap kam olfala moa, nao oli putumap hem i kam jaj blong Isrel. Hem i laswan jaj blong Isrel. Taem hem i olfala finis, ol man oli talem long hem se: ‘Yu mas putumap wan king blong mifala, blong i rul long mifala.’ Samuel i no wantem mekem olsem, from we Jeova nao i king blong olgeta. Be Jeova i talem long Samuel blong folem tingting blong ol man ya.

1 Samuel 1:1-28; 2:11-36; 4:16-18; 8:4-9.