DILI ba guwapo kining gamay batang lalaki? Ang iyang ngalan maoy Samuel. Ug ang tawo nga ang kamot niya anaa sa ulo ni Samuel mao ang hataas nga saserdote sa Israel si Eli. Ang amahan ni Samuel si Elcana ug ang iyang inahang si Ana maoy midala kang Samuel kang Eli.

Si Samuel maoy upat o lima ka tuig pa lamang ang panuigon. Apan mopuyo siya dinhi sa tabernakulo ni Jehova uban kang Eli ug sa ubang mga saserdote. Ngano mang si Elcana ug Ana mihatag sa usa ka bata pa kaayo sama kang Samuel sa pag-alagad kang Jehova diha sa tabernakulo? Tan-awon ta.

Pipila lang ka tuig una pa niini, si Ana maoy masulub-on kaayo. Wala siya makapanganak, ug siya nagtinguha kaayo, sa labihan gayod, nga may usa unta. Busa usa ka adlaw, siya nag-ampo didto sa tabernakulo: ‘O Jehova, kon ikaw maghatag kanako ug usa ka anak lalaki, ako mosaad nga ihatag ko siya kanimo aron siya makaalagad kanimo sa tibuok niyang kinabuhi.’

Si Jehova nagtubag sa pag-ampo ni Ana, ug sa wala madugay siya mianak kang Samuel. Si Ana nahigugma sa iyang gamay batang lalaki, ug nagsugod siya sa pagtudlo kaniya mahitungod kang Jehova samtang siya gamay pa kaayo. Gisultihan niya ang iyang bana: ‘Sa panahon nga si Samuel dili na atimanon pa, akong dad-on siya sa tabernakulo sa pag-alagad kang Jehova didto.’

Mao kini ang atong makita sa hulagway nga gihimo nila. Ug si Samuel malipayon nga makahimo sa pag-alagad kang Jehova dinhi sa balongbalong ni Jehova. Sa matag tuig, si Ana ug Elcana moanhi sa pagsimba ning espesyal nga tolda, ug magduaw sa ilang gamay batang lalaki. Ug sa matag tuig si Ana magdala sa usa ka bag-o walay-buktong sapot nga hinimo niya alang kang Samuel.

Sa pipila ka tuig, si Samuel padayong mialagad kang Jehova ug si Jehova ug ang katawhan pulos nakagusto kaniya. Apan ang mga anak lalaki ni Eli nga si Ophni ug Pineas maoy dili maayo. Nagbuhat sila sa daghan daotang mga butang. Si Eli angay untang magkuha kanila sa pagkasaserdote, apan wala siya maghimo niini.

Sa gihapon, si Samuel padayong mialagad sa Diyos. Apan tungod kay diyotay kaayong mga tawo nga tinuod nahigugma kang Jehova, mao nga usa ka taas nang panahon nga si Jehova wala makigsulti kang bisan kinsang tawo. Sa dihang si Samuel midakodako na kini ang nahitabo.

Si Samuel nahikatulog sa tabernakulo sa dihang usa ka tingog mipukaw kaniya sa pagbangon. Mitubag siya: ‘Ania ako.’ Ug midagan siya ngadto kang Eli, ug miingon: ‘Ikaw nagtawag kanako. Ania ako.’

Apan si Eli mitubag: ‘Ako wala magtawag kanimo; balik ngadto sa higdaanan.’ Busa si Samuel mibalik sa higdaanan.

Kini nahitabo na usab, ug unya sa ikatulong higayon. Sa kataposan, si Eli nahibalo nga si Jehova gayod mao ang nagtawag. Busa iyang gipahimangnoan si Samuel. ‘Lakaw, higda sa makausa pa, ug kon siya magtawag pag-usab, kinahanglan moingon ka: “Sulti, Jehova, kay ang imong ulipon nagapamati.”’

Mao kini ang gibuhat ni Samuel. Unya si Jehova misulti kang Samuel nga siya mosilot na kang Eli ug sa iyang mga anak lalaki. Sa ulahi si Ophni ug Pineas namatay sa panggubatan, ug sa dihang si Eli nakabati niini, siya napukan, nabali ang iyang liog ug namatay usab. Busa ang pulong ni Jehova nahimong tinuod.

Si Samuel nahingkod ug nahimong ang kataposang maghuhukom sa Israel. Sa natigulang na siya, ang katawhan mihangyo kaniya: ‘Pagpili ug usa ka hari nga magmando kanamo.’ Si Samuel wala mosugot, tungod kay si Jehova mao ang ilang tinuod nga hari. Apan si Jehova nagsulti kaniya sa pagpamati sa katawhan.