HI ngakchiapate cu duh a nung ngai lo mei? Amah min cu Samuel a si. Cun Samuel lu cung i a kut a chia mi pa cu Israel tlangbawingan Eli a si. Eli sin i Samuel a ratpi mi hna cu a pa Elkanah le a nu Hannah an si.

Samuel cu kum li kum nga hrawng lawng a si rih. Asinain amah cu Jehovah biakinn ah Eli le a dang tlangbawi hna sin ah a um lai. Elkanah le Hannah nih cutluk ngakchiate a si rih ko mi Samuel cu zeicahdah biakinn chung i Jehovah a rian ṭuan awk ah an pek hnga? Zoh hnik u sih.

Khi hlan kum tlawmpal lio ah cun Hannah cu a ngaih a rak chia ngaingai. Zeicahtiah fa a ngei kho lo i, fa pakhat tal cu ngei ning law ti a rak duh ngaingai. Cucaah nikhat cu Hannah nih Jehovah biakinn ah a va kal i: ‘Maw Jehovah keimah kha ka philh hrim hlah! Fapa pakhat na ka pek ahcun, a nun chung vialte na rian a ṭuan khawh nak hnga cu fapa cu nangmah kha kan pek ko lai tiah bia kaa kam,’ tiah thla a cam.

Jehovah nih Hannah thlacamnak cu a rak leh i, thla tlawmpal hnu ah Samuel cu a hrin. Hannah nih a fapate cu a dawt ngaingai i, a hmet tein Jehovah kong kha a cawnpiak tawn. A vapa zong kha: ‘Samuel cu hnuk thlei a zat cangka Jehovah a rian a ṭuan khawh nak hnga biakinn ah ka kalpi lai i, Jehovah a rian ka ṭuan ter lai,’ tiah a chimh.

A chim bantuk in Hannah le Elkanah nih an tuah lio kha hi hmanthlak chung ah kan hmuh mi cu a si. Samuel cu a nu le a pa nih ṭha tein an rak cawnpiak cang caah, Jehovah biakinn i Jehovah a rian a ṭuan caah a lung aa lawm ngai ngai. Kum fate Hannah le Elkanah cu hi biakinn ah hin biak awk ah le an fapate len awk ah an ra tawn. Cun kum fate in Hannah nih Samuel ca i a tah mi angki thar pakhat lengmang a rak put tawn.

Kum le caan a luan lengmang bang in, Samuel cu Jehovah biakinn ah rian cu a ṭuan lengmang ve i, Jehovah le mi hna nih amah cu an dawt. Sihmanhsehlaw tlangbawingan Eli a fapa hna Hophni le Phinehas cu an ṭha lo. Thil ṭhalo tampi an tuah i, mi dang zong kha Jehovah a bia ngaih lo awk ah an hruai hna. Eli nih anmah kha tlangbawi rian in phuah awk a si nain a rak phuak hna lo.

Tlangvalpa Samuel cu biakinn chung i ṭhatlonak a cang mi vialte ruang ah Jehovah kha biak duh lo in a rak um hlei lo. Sihmanhsehlaw mi tlawmte lawng nih Jehovah cu an thinlung taktak in an dawt caah, Jehovah nih minung sin ah bia a chim ti lo nak cu a sau ngai cang. Samuel cu tlawmpal a hung upat deuh tik ah, hi thil hi a rak tlung:

Samuel cu biakinn chung i aa hngilh ko lio ah khan aw pakhat nih a rak hlauh. Amah nih: ‘Hika ah hin ka um,’ tiah a leh. Cun a tho i Eli sin ah a tli i: ‘Hika ah hin ka um, na ka kawh caah,’ tiah a va ti.

Sihmanhsehlaw Eli nih: ‘Kan ko lo; na ihnak ah va kal ṭhan ko,’ tiah a ti. Cucaah Samuel cu a kal i a it ṭhan.

Cun a voi hnihnak ah: ‘Samuel!’ tiah a auh ṭhan. Cucaah Samuel cu a tho i Eli sin ahcun a va tli ṭhan. ‘Hika ah hin ka um; na ka kawh caah,’ a ti. Sihmanhsehlaw Eli nih: ‘Kan ko lo, ka fapa. Va it ṭhan ko,’ a ti. Cucaah Samuel cu a ihnak ah a va kal ṭhan.

‘Samuel!’ tiah aw nihcun a voi thumnak a auh ṭhan. Cucaah Samuel cu Eli sin ah a va tli. Hika ah hin ka um, atu cu na ka kawh hrimhrim ko lai,’ tiah a ti. Atu cu Eli nih a autu cu Jehovah a si ko lai ti kha a hngalh cang. Cucaah Samuel kha: ‘Kal law va it ṭhan ko, cun an auh ṭhan a si ahcun, “Chim tuah, Jehovah, zeitintiah na salpa nih a theih ko,” tiah na ti lai,’ tiah Samuel kha a chimh.

A chimh bang cun Jehovah nih a auh ṭhan tik ah Samuel nih a ti. Cutikah Jehovah nih Eli le a fapale hna daan a tat hna lai nak kong kha Samuel cu a chimh. Cuhnu ah Hophni le Phinehas cu Filistin mi he an i dohnak ah an thi i, cu thawng cu Eli nih a theih tik ah, a hnu lei ah aa ngal i a hngawng ruh a kiak i a thi. Cubang in Jehovah a bia cu a tling.

Samuel cu a ṭhang i Israel miphun hmanung bik biaceihtu a si. A tar tik ah, mi hna nih: ‘A kan uktu ding ah siangpahrang kan thim piak,’ tiah an hal. Samuel nih cun cucu a duh hrimhrim lo, zeicahtiah Jehovah cu an siangpahrang a si ko. Sihmanhsehlaw Jehovah mi hna an bia cu ngai ko law an duhnak bang in tuah piak ko hna tiah a chimh.