NTE emi idịghe ekpri ediye eyeneren? Enye ekere Samuel. Ndien owo oro odoride Samuel ubọk ke ibuot edi akwa oku Israel, Eʹli. Ete Samuel, El·kaʹnah ye Hanʹnah eka esie ẹdi oro ẹdade Samuel ẹsọk Eʹli.

Samuel edi isua inan̄ mme ition kpọt. Edi enye eyedụn̄ mi ke ataya Jehovah ye Eʹli ye mme oku eken. Ntak emi El·kaʹnah ye Hanʹnah ẹkpenọde ekpri owo ntre nte Samuel ndinam n̄kpọ Jehovah ke ataya? Yak ise.

Isua ifan̄ kpọt ebede Hanʹnah ama ọfụhọ akaha. Ntak edi koro enye ikekemeke ndiman eyen, ndien enye ama oyom eyen etieti. Ntre usen kiet ke Hanʹnah akade ataya Jehovah, enye ọkọbọn̄ akam: ‘O Jehovah, kufre mi! Ke afo ọnọde mi eyeneren, mmọn̄wọn̄ọ nte nyenọ fi enye anam n̄kpọ fo ke ofụri uwem esie.’

Jehovah ama ọbọrọ akam Hanʹnah, ndien ke ediwak ọfiọn̄ ẹbede, enye ama aman Samuel. Hanʹnah ama ama ekpri eyeneren esie, ndien enye ọkọtọn̄ọ ndikpep enye mban̄a Jehovah ke enye osụk edide ekpri. Enye ama ọdọhọ ebe esie: ‘Ndo ndo oro Samuel okponde ọkpọn̄ eba, nyeda enye n̄ka ataya man anam n̄kpọ Jehovah do.’

Emi ke nnyịn ikụt Hanʹnah ye El·kaʹnah ẹnamde ke ndise emi. N̄ko koro ete ye eka ẹkekpepde Samuel otịm ọfọn, enye enem esịt ndikeme ndinam n̄kpọ Jehovah mi ke akpan ataya Jehovah. Kpukpru isua, Hanʹnah ye El·kaʹnah ẹdi ndituak ibuot ke akpan ataya emi, ndinyụn̄ nse ekpri eyen mmọ. Ndien kpukpru isua, Hanʹnah ada obufa anana ubọk coat oro enye anamde ọsọk Samuel.

Nte mme isua ẹbede, Samuel akaiso anam n̄kpọ ke ataya Jehovah, ndien Jehovah ye mme owo ẹma enye. Edi nditọ akwa oku Eli, Hophʹni ye Phinʹe·has ifọnke. Mmọ ẹnam ediwak idiọkn̄kpọ, ẹnyụn̄ ẹnam mbon efen ẹtụt utọn̄ ye Jehovah n̄ko. Eʹli okposio mmọ ẹfẹp ke ndidi mme oku, edi enye inamke oro.

Ekpri Samuel iyakke idiọk ekededi akade iso ke ataya anam enye etre ndinam n̄kpọ Jehovah. Edi koro ata esisịt ibat owo ẹma Jehovah, otịm ebịghi nte Jehovah eketịn̄ ikọ ọnọ owo ekededi. Ke Samuel ọkọride okpon esisịt, emi edi se itịbede:

Samuel ede ke ataya ndien uyo edemede enye. Enye ọbọrọ: ‘Se ami mi.’ Ndien enye adaha efehe etiene Eʹli, onyụn̄ ọdọhọ: ‘Afo okokot mi, se ami mi.’

Edi Eʹli ọbọrọ: ‘N̄kokotke fi; fiak ka kanana.’ Ntre Samuel afiak akanana.

Ekem ẹfiak ẹkot ọyọhọ ikaba: ‘Samuel!’ Ntre Samuel adaha afiak efehe etiene Eʹli. ‘Afo okot mi, se ami mi.’ Edi Eʹli ọbọrọ: ‘N̄kotke, eyen mi. Fiak kanana.’ Ntre Samuel afiak akanana.

Uyo afiak okot utịm ikata ‘Samuel!’ Ntre Samuel efehe etiene Eʹli. ‘Se ami mi, koro ana edi afo okot mi ini emi.’ Eʹli ọfiọk ke emi nte ke ana edi Jehovah okot. Ntre enye ọdọhọ Samuel: ‘Fiak kanana, ndien enye ama afiak okot, dọhọ: “Jehovah tịn̄, ke owo fo ke okop.”’

Emi ke Samuel ọdọhọ ke Jehovah afiakde okot. Jehovah ndien ọdọhọ Samuel ete imọ imọn̄ inọ Eʹli ye nditọ esie ufen. Ke ukperedem Hophʹni ye Phinʹe·has ẹkpa ke ẹkọn̄ ye mme Phi·lisʹtine, ndien ke Eʹli okopde mbụk oro, enye ọwọrọ ọduọ obụn̄ itọn̄ esie ndien akpa. Ntre ikọ Jehovah edi akpanikọ.

Samuel ọkọri, ekem akabare akpatre ebiereikpe Israel. Ke enye ọsọn̄de, mbon obio ẹdọhọ enye: ‘Mek edidem akara nnyịn.’ Samuel iyomke ndinam emi, koro Jehovah ke akpan edi edidem mmọ. Edi Jehovah ọdọhọ enye okop uyo mme owo.