O CEI na gonetagane rairai vinaka oqo? Na yacana o Samuela. Erau kauti koya tiko yani oqori na tamana o Elikana kei Ana na tinana. E tara tu na uluna o Ilai na bete levu e Isireli.

E se qai yabaki va ga se lima o Samuela. Ia e sa na mai tiko vata kei Ilai kei ira e so tale na bete ena valeniveitavaki i Jiova. Na cava erau kauti Samuela mai kina na nona itubutubu me mai qaravi Jiova ena valeniveitavaki ni sa rui gone? Meda raica mada.

E vica vata na yabaki yani e liu ni bera ni mai yaco oqo a dau rarawa voli o Ana. Na vuna ni sega ni rawa ni vakaluveni. Ia dua na ka nona vinakata me bau dua na luvena. Dua gona na siga a lai masu ena vale i Jiova qai kerea: ‘Ni kua ni guilecavi au, Jiova! Ke oni solia vei au e dua na gonetagane, au na soli koya me qaravi kemuni me yacova ni mate.’

A rogoca o Jiova na masu i Ana. Oti ga e vica na vula sa sucu o Samuela. E lomani luvena sara o Ana, qai dau vakavulici koya ni se gone lailai sara me kilai Jiova. E kaya vei watina: ‘Ni yalomatua ga mai o Samuela, au sa na kauti koya ina valeniveitavaki me lai qaravi Jiova kina.’

Oqo sara ga na ka erau cakava tiko ena iyaloyalo o Ana kei Elikana. E marautaka tale ga o Samuela na lai qaravi Jiova baleta ni rau tuberi koya vinaka na nona itubutubu. Ena veiyabaki rau dau lai sikovi koya ena gauna rau lai sokalou kina ena vale oqo. E dau kauta tale tiko ga yani o Ana ena veiyabaki na nona kote tabaleka vovou.

Toso na veiyabaki, toso vata kei na nona qaravi Jiova tiko ga ena valeniveitavaki o Samuela. Sega wale ga ni taleitaki koya o Jiova, o ira sara mada ga na tamata. Ia erau sega ni taleitaki o Ofinai kei Finiase na luve i Ilai na bete levu. Erau dau cakava na ka ca, rau qai uqeti ira tale na so mera talaidredre vei Jiova. Dodonu me kauti rau tani mai na itavi vakabete o Ilai, ia e sega ni cakava.

E sega ni vakalaiva o Samuela na ka ca e yaco tiko oqori ena valeniveitavaki me tarova nona qaravi Jiova. Sa dede sara e sega ni vosa o Jiova vua e dua na tamata baleta ni lewe lailai ga era lomani koya dina. Ni sa cauravou mai o Samuela, oqo na veika a qai yaco.

A moce koto o Samuela ena valeniveitavaki qai vakayadrati koya e dua na domo. E sauma yani: ‘O yau qo.’ E duri sara qai lai kaya vei Ilai: ‘O a kacivi yau, o yau qo.’

Ia, e kaya o Ilai: ‘Au a sega ni kacivi iko, lai moce tale.’ E lai davo tale o Samuela.

E rogoca tale na kaci oya ena ikarua ni gauna: ‘I Samuela!’ Se baci lako vei Ilai qai kaya: ‘O a kacivi yau, o yau qo.’ Sauma tale mai o Ilai: ‘Au sega ni kacivi iko, luvequ. Lai davo ga.’ Lesu tale o Samuela.

Se baci kaci tale mai na domo oya ena ikatolu ni gauna: ‘I Samuela!’ E cici sara yani vei Ilai qai kaya: ‘O yau qo, o rairai kacivi au dina ena gauna oqo.’ Sa qai kila o Ilai ni o Jiova sara ga e kacivi Samuela tiko mai. E kaya kina vua: ‘Lai davo tale mada, kevaka e kaci tale mai, sauma va qo: “Ni vosa mai Jiova, sa vakarorogo tiko na nomuni tamata.”’

Oqori sara ga na ka e qai tukuna o Samuela ena gauna e kaci tale mai kina o Jiova. Sa qai kaya o Jiova vei Samuela ni na totogitaki Ilai kei rau na luvena. Rau a qai mate o Ofinai kei Finiase ena ivalu kei ira na kai Filisitia. Ni rogoca o Ilai nodrau mate, a bale qai ramusu na domona mani mate sara kina. E yaco dina na vosa i Jiova.

Ni sa cauravou mai o Samuela, a qai iotioti ni dauveilewai e Isireli. Ni sa qase mai era kerei koya na lewenivanua ena ka oqo: ‘Ni digia e dua na tui me lewa vei keimami.’ E sega ni via cakava na ka oqo o Samuela baleta ni nodra tui ga o Jiova. Ia sa qai kaya vua o Jiova me rogoci ira na lewenivanua.