ANACHONSHI maʼin chi jintüikai, ¿aashimüin? Samuel nünülia. Chi eʼitaakai najapü saaʼu nikii chi jintüikai nia Elí chi laülaashikai napüleerua na sacerdotekana. Na antirakana chi jintüikai nia Elqaná chi nüshikai otta Ana tü niikat.

Eetaasü maʼaka 4 jee 5 nuuyase Samuel. Kepiainjachi nia suluʼu tü aʼwaajüleekat nümaa Elí otta na wanee sacerdotekana. ¿Jamüshi nüntiraka Elqaná otta Ana chi jintüikai süpüla niʼyataain nümüin Jeʼwaa suluʼu tü aʼwaajüleekat? Wekirajaa sünain.

Süpülapünaa tia, mojusü saaʼin Ana süka machoin, kachonweesü shia. Wanaa sümaa chajatüin shia suluʼu tü aʼwaajüleekat sümaka nümüin Jeʼwaa: ‹¡Aluʼuleeka maʼin taya, nnojo motuin paaʼin taya Jeʼwaa! Kachonle taya putuma, taapeechi nia süpüla niʼyataain waneepia pümüin›.

Naapaka Jeʼwaa sünüiki Ana, mapa jemeyutka shia nümaa Samuel. Aishi maʼin süpüla Ana chi süchonkai, shikirajaka nia joʼuuiwaʼaya nünain Jeʼwaa. Sümaka nümüin chi suʼwayuusekai: ‹Miyoʼupa Samuel, nnojotpa choʼujaain nümüin taaʼinmajüin nia, teʼikajaweechi suluʼumüin tü aʼwaajüleekat süpüla niʼyataain nümüin Jeʼwaa›.

Tia shia tü naainjakat Elqaná otta Ana suluʼu tü ayaakuaakat. Talatüshi maʼin Samuel süka niʼyataain nümüin Jeʼwaa suluʼu tü aʼwaajüleekat, müsü nukuwaʼipa süka nikirajünüin. Antüshi juyawai chi nüshikai otta tü niikat süpüla naʼwaajüin Maleiwa suluʼu tia piichikat otta süpüla nanalaain nümüin chi nachonkai. Alüʼüjüsü Ana wanee kuluulu jeketü juyawai nümüin Samuel.

Alatüsü wainma juya otta aʼyataayüiya Samuel nümüin Jeʼwaa suluʼu tü aʼwaajüleekat. Talatüshi Jeʼwaa otta na israeliitakana nümaa. Akaisaʼa Hofní otta Finehás na nüchonniikana Elí mojulaashii. Aainjüshii kasa mojusü otta naainjirüin kasa mojusü na wayuukana. Ayatüshii sacerdotein naya.

Nnojoishi ooʼulaain Samuel suulia aʼyatawaa nümüin Maleiwa sutuma tü kasa alatakat suluʼu tü aʼwaajüleekat. Kakalia nnojoluin naashajaain Jeʼwaa nümaa wanee wayuu süka palitchon na wayuu aika apüla nia. Miyoʼupa Samuel aashajaashi Jeʼwaa nümaa.

Ounejünüshi Samuel wanaa sümaa nutunkuin. Nümaka: ‹Anii taya›. Nütamaaka otta nuwataaka eemüin Elí, nümaka nümüin: ‹Puunejüin taya, anii taya›.

Nümaka Elí: ‹Nnojoishi tounejüin pia; piisalaa püchikuaʼa›. Niisalaaka Samuel nüchikuaʼa.

Nuunejünaka piantua: ‹¡Samuel!› Nütamaaka Samuel nuʼunaka eemüin Elí, nümaka nümüin: ‹Puunejüin taya, anii taya›. Nümaka Elí nümüin: ‹Nnojoishi tounejüin pia tachonchee. Piisalaa püchikuaʼa›. Niisalaaka Samuel nüchikuaʼa.

Nuunejünaka apünüintua: ‹¡Samuel!› Nuwataaka Samuel eemüin Elí, nümaka nümüin: ‹Anii taya, puunejüin taya tachikuaʼa›. Nütüjaaka saaʼu Elí niain Jeʼwaa ounejüin Samuel. Nümaka nümüin: ‹Piisalaa püchikuaʼa, puunejünüle, müinjachi pia: «Paashajaa Jeʼwaa, naapüin chi püchepchiakai pünüiki»›.

Ayataka shia naainjüin Samuel. Nüküjaka Jeʼwaa nümüin Samuel ouktajachin Elí otta na nüchonniikana. Ouktaka Hofní otta Finehás sünain atkawaa namaa na filisteokana. Naapapa Elí tia nujutuuka, yütka nunulu ouktaka nia. Ekeraajüsü nünüiki Jeʼwaa.

Samuel nia chi chiiruaajaikai nekiipuʼu na israeliitakana. Laülaapa nia namaka na israeliitakana nümüin: ‹Püneeka wanee wayuu aluwataainjachika waaʼu›. Nnojotsü naainjeein tia Samuel süka niain Jeʼwaa aluwataain naaʼu. Akatsaʼa naainjüinjatü tia naashin Jeʼwaa.