AJÉPA iporãite pe mitã? Héra Samuel. Ha pe kuimbaʼe omoĩva ipo pe mitã akã ári héra Elí, saserdóte guasu oĩva Israélpe. Pe mitãme ogueru itúva Elqaná ha isy Ana Elí rendápe.

Samuel oguereko cuatro térã cinco áñonte. Péro oikóta Jehová tavernákulope, Elí ha umi ótro saserdotekuéra ndive. Mbaʼérepa Elqaná ha Ana ogueru Samuélpe imitãiterei reheve oservi hag̃ua Jehovápe itavernákulope? Jahechami.

Ndaʼaréi oiko mboyve upéva, Ana ndovyʼaietereivaʼekue. Oñeñandu upéicha ndaikatúigui imemby, ha haʼe oipotaiterei peteĩ mitã. Upévare, peteĩ árape oĩ jave Jehová tavernákulope, oñemboʼe: ‘Áina, Jehová, aníkena nderesarái chehegui! Remeʼẽramo chéve peteĩ mitã, che ameʼẽta ndéve ndeservi hag̃ua oikove aja entéro’.

Jehová okontesta Ana ñemboʼe, ha upe rire oguereko Samuélpe. Ana ohayhu imembýpe, ha oñepyrũ omboʼe chupe Jehovágui imitãite guive. Heʼi iménape: ‘Tuichave rire Samuel ha opoʼo rire, agueraháta tavernákulope oservi hag̃ua upépe Jehovápe’.

Upéva jahecha ojapoha Ana ha Elqaná ko taʼangápe. Ha ituvakuéra omboʼe porãiterei rupi chupe, Samuel ovyʼa ikatúgui oservi Jehovápe itavernákulope. Káda áño ou ituvakuéra oadora hag̃ua koʼápe, ha ovisita hag̃ua Samuélpe. Ha káda áño Ana ogueru peteĩ ao pyahu ijyvakua reíva ojapovaʼekue imembýpe g̃uarã.

Ohasa heta áño, ha Samuel osegi oservi Jehová tavernákulope. Upéva ombovyʼa Jehovápe ha ipuévlope. Péro Elí raʼykuéra Ofní ha Finehás naivuénoi. Haʼekuéra ojapo heta mbaʼe vai, ha hetápe avei ombodesovedese Jehovápe. Upévare Elí oipeʼavaʼerã chuguikuéra pe saserdósio, péro ndojapói upéva.

Pe mitãrusu Samuel ndohejái umi mbaʼe vai oikóva tavernákulope ohejauka chupe Jehová servísio. Péro heta tiémpo Jehová noñeʼẽvéi ni peteĩ kuimbaʼépe, pórke ndahetái oĩ ohayhu añetéva chupe. Tuichave rire Samuel, ko mbaʼe ojehu:

Samuel oke jave pe tavernákulope omombáy chupe peteĩ oñeʼẽva. ‘Koʼápe aime’, heʼi Samuel. Opuʼã ha odispara Elí rendápe, ha heʼi chupe: ‘Cherenói, ha koʼápe aime’.

Péro Elí heʼi chupe: ‘Che norohenóiri; tereho jey nde rupápe’. Upévare Samuel oho jey hupápe.

Upéi oĩ jey ohenóiva: ‘Samuel!’. Ha Samuel opuʼã ha odispara jey Elí rendápe. ‘Cherenói ha koʼápe aime’, heʼi chupe. Péro Elí heʼi: ‘Norohenóiri, che raʼy. Tereho jey eñeno’. Ha Samuel oho jey hupápe.

‘Samuel!’, oñehenói jey tres veseha. Ha Samuel odispara Elí rendápe. ‘Koʼápe aime; oiméne koʼág̃a cherenóima’, heʼi. Koʼág̃a Elí oikuaáma Jehová ohenoiha chupe. Heʼi Samuélpe: ‘Eñeno jeýnte, ha haʼe nerenói jeýramo, erevaʼerã: “Eñeʼẽ, Jehová, nde siérvo ohenduhína”’.

Upéicha ojapo Samuel ohenói jeývo Jehová. Jehová heʼi Samuélpe okastigataha Elí ha itaʼyrakuérape. Upe rire, Ofní ha Finehás omano oñorairõhápe filisteokuéra ndive, ha oikuaávo Elí pe oikóva, hoʼa omopẽ ijajúra ha omano. Upéicha oñekumpli Jehová heʼivaʼekue. Samuel okakuaa ha oiko chugui pe último hués Israélpe. Itujávo, pe puévlo heʼi chupe: ‘Eiporavo peteĩ rréi oregoverna hag̃ua’. Samuel ndojaposéi upéva, pórke añetehápe Jehová haʼe pe rréi haʼekuéra oguerekóva. Péro Jehová heʼi chupe ohendu hag̃ua pe puévlope.