TUS metub hauv daim duab no ntxim hlub kawg li, puas yog? Nws lub npe hu ua Xamuyee. Thiab tus txivneej uas cev tes plhws Xamuyee taubhau yog cov Yixayee tus pov thawj hlob Eli. Ob niam txiv uas tabtom coj Xamuyee tuaj rau Eli yog Eekhana thiab Hana. Nkawd yog Xamuyee niam thiab txiv.

Xamuyee tsuas muaj plaub tsib xyoos xwb. Tiamsis nws yuav nrog Eli thiab lwm cov pov thawj nyob ntawm Yehauvas lub tsev ntaub sib ntsib no. Eekhana thiab Hana tus tub Xamuyee tseem me heev, vim li cas nkawd yuav coj nws mus ua haujlwm hauv Yehauvas lub tsev ntaub sib ntsib? Cia peb kawm ntxiv mus saib yog vim li cas.

Ua ntej tsis tau muaj Xamuyee, Hana nyuaj siab heev. Nws nyuaj siab rau qhov nws ntshaw menyuam kawg li, tiamsis nws muaj tsis taus. Yog li ntawd, muaj ib hnub thaum Hana mus tom Yehauvas lub tsev ntaub sib ntsib, nws thov Vajtswv tias: ‘Au Yehauvas, thov nco txog kuv thiab lauj! Yog tias koj pub kuv muaj ib tug metub, kuv cog lus tias kuv yuav muab tus metub ntawd pub rau koj, kom nws teev tiam koj mus tas nws sim neej.’

Yehauvas thiaj teb Hana tej lus thov. Ces tsis ntev xwb, Hana yug tau Xamuyee. Hana hlub nws tus metub heev. Thaum Xamuyee tseem yau, Hana qhia Xamuyee txog Yehauvas. Hana hais rau nws tus txiv tias: ‘Thaum Xamuyee hlob mentsis thiab nws tseg taus mis lawm, kuv yuav coj nws mus rau tom lub tsev ntaub sib ntsib, es mus teev tiam Yehauvas rau qhov ntawd.’

Nyob hauv daim duab no peb pom Hana thiab Eekhana tabtom coj tus menyuam tuaj rau Eli. Xamuyee niam thiab txiv cob qhia nws zoo heev, nws thiaj zoo siab hlo teev tiam Yehauvas nyob hauv Yehauvas lub tsev ntaub. Txhua txhua xyoo Hana thiab Eekhana tuaj pe hawm Yehauvas ntawm lub tsev ntaub sib ntsib, thiab tuaj saib nkawd tus metub. Txhua xyoo Hana nqa ib lub tsho tshiab tuaj rau Xamuyee.

Ib xyoos tas ib xyoos tuaj, Xamuyee ua haujlwm hauv Yehauvas lub tsev ntaub sib ntsib. Yehauvas thiab cov tibneeg puavleej nyiam nws heev. Tiamsis tus pov thawj hlob Eli 2 tug tub Hauni thiab Fineha ua tsis zoo. Nkawd ua ntau yam phem. Nkawd kuj ua rau lwm tus tsis mloog Yehauvas lus thiab. Tsim nyog Eli muab nkawd rho tawm tsis ua pov thawj lawm, tiamsis nws tsis ua li ntawd.

Xamuyee tsis cia ib yam dabtsi phem uas nws pom hauv lub tsev ntaub sib ntsib ua rau nws tso txojkev teev tiam Yehauvas tseg li. Tiamsis muaj coob leej tsis hlub Yehauvas. Vim li ntawd, Yehauvas thiaj tseg ntev heev tsis hais lus rau tibneeg lawm. Thaum Xamuyee loj zog lawm, thiaj muaj li no:

Thaum Xamuyee pw tsaug zog hauv lub tsev ntaub sib ntsib, muaj ib lub suab tsa nws sawv. Nws teb tias: ‘Kuv nyob ntawm no.’ Ces nws txawm sawv tsees dhia mus rau Eli, thiab hais tias: ‘Koj hu kuv los, kuv nyob ntawm no.’

Tiamsis Eli teb tias: ‘Kuv tsis tau hu koj; rov qab mus pw.’ Yog li ntawd, Xamuyee thiaj rov qab mus pw lawm.

Ces lub suab rov qab hu zaum 2 tias: ‘Xamuyee!’ Ces Xamuyee txawm sawv tsees thiab rov qab dhia mus rau Eli. Nws hais tias: ‘Koj hu kuv los, kuv nyob ntawm no os.’ Tiamsis Eli teb tias: ‘Kuv tus metub, kuv tsis tau hu koj. Rov mus pw.’ Ces Xamuyee rov qab mus pw lawm.

Lub suab rov qab hu zaum 3 tias: ‘Xamuyee!’ Ces Xamuyee dhia rov qab mus rau Eli. Xamuyee hais tias: ‘Kuv nyob ntawm no, kuv paub tias yuav tsum yog koj hu kuv xwb.’ Zaum no Eli paub tias yuav tsum yog Yehauvas hu Xamuyee. Yog li ntawd, nws qhia Xamuyee tias: ‘Zaum no koj rov qab mus pw, yog tias nws rov hu koj, koj yuav tsum teb tias: “Yehauvas’e, koj muaj lus cia li hais, rau qhov koj tus tub qhe tabtom mloog.”’

Thaum Yehauvas rov qab hu Xamuyee, ces Xamuyee thiaj teb li ntawd. Yehauvas hais rau Xamuyee tias nws yuav rau txim rau Eli thiab nws 2 tug tub. Tom qab no, thaum mus ua rog nrog cov Filixatee, Hauni thiab Fineha raug tua tuag hauv tshav rog. Ces thaum Eli hnov li ntawd, nws txawm vau hlo lov caj dab tuag lawm thiab. Yog li ntawd, muaj tseeb raws li Yehauvas tej lus.

Thaum Xamuyee loj tuaj, nws tau los ua cov Yixayee tus thawj kawg nkaus. Thaum nws laus lawm, cov tibneeg thov nws tias: ‘Xaiv ib tug vajntxwv los kav peb.’ Xamuyee tsis xav ua li ntawd, rau qhov Yehauvas twb yog lawv tus vajntxwv ntag. Tiamsis Yehauvas hais kom Xamuyee ua li cov tibneeg hais.