OGBẸRỌ nọ ọmọzae kakao nana o re ziezi-eriwo? Odẹ riẹ họ Samuẹle. Yọ ọzae nọ obọ riẹ orọ uzou Samuẹle na họ Ilai, ozerẹ kpehru ọ Izrẹl. Ọyena họ ọsẹ Samuẹle Ẹlkena avọ oni riẹ Hana a rehọ Samuẹle ro se Ilai.

Samuẹle ọ rọ wọhọ ikpe ene hayo ikpe isoi ọvo ọkpako te no. Rekọ ọ be te ria etenẹ eva uwoudhu Jihova kugbe Ilai gbe izerẹ efa. Kọ fikieme Ẹlkena avọ Hana a je siobọno ohwo nọ ọ maha te ere wọhọ epa Samuẹle na re ọ gọ Jihova eva uwoudhu na? Jọ ma ruẹ.

Ikpe jọ kakao nọ evrẹ re onana o tẹ te via Hana o wo ọkora ruaro. Fiki epanọ o ti wo ọmọ họ, yọ ọ gwọlọ ọvo jọ, thesiwa. Fikiere ẹdẹjọ nọ Hana o te uwoudhu Jihova, ọ tẹ lẹ nọ: ‘O Jihova, kareghẹhọ omẹ! Re whọ tẹ k’omẹ ọmọzae, mẹ ya nọ mẹ rẹ rehiẹe rọ kẹ owhẹ re ọgba odibo k’owhẹ eva uzuazọ riẹ kpobi.’

Jihova ọ kẹ uyo kẹ olẹ Hana na, uwhremuna nọ emera jọ e te vrẹ no o te yẹ Samuẹle. Hana o you ọmọzae ọsese riẹ na, o te mue’i họ ewuhrẹ kpahe Jihova eva oke nọ ọ gbẹ rọ jọ ọmọsese na. Ọ ta kẹ ọzae riẹ nọ: ‘Samuẹle ọ tẹ nwane kpako te no ọgbẹ gwọlọ ẹyọrọ riẹ ofa ha, mẹ rẹ te rehiẹe ro kpohọ obọ uwoudhu na re ọ jọ etẹe gba odibo rọ kẹ Jihova.’

Onana họ onọ ma ruẹ nọ Hana avọ Elkena a bi ru eva uwoho na. Yọ fiki epanọ Samuẹle ọsẹ gbe oni riẹ a wuhriẹe ziezi, ọ tẹ be ghọghọ sae te gbaodibo kẹ Jihova eva uwoudhu Jihova. Kukpe kukpe Hana avọ Ẹlkena a rẹ nyaze te gọ eva obọdẹ uwoudhu onana, a ve je bru ọmọzae ọsese rai na ze. Yọ kukpe kukpe ọ rẹ rehọ ewu bruabọ nọ o ru ro se Samuẹle.

Nọ ikpe ebe rọ vrẹ na, yọ Samuẹle ọ be hai ruiruo eva uwoudhu Jihova, yọ ọ were Jihova gbe ahwo na. Rekọ emezae ọ ozerẹ kpehru na Hofini gbe Finihas a woma ha. A bi ru eware iyoma buobu, a te je ru amọfa se eme Jihova ba eyo re. Ilai ọ hai siai no izerẹ, rekọ ọ se rae ba.

Samuẹle ọmaha na ọ rẹ jẹ oware uyoma ọvo onyaharo eva uwoudhu na nọ orẹ whahiẹe ẹgọ Jihova ha. Rekọ fiki nọ amahwo kakao aghine you Jihova, ukri no nọ Jihova ọ gbẹ re ta ẹme kẹ ohwo ọvoho. Okenọ Samuẹle ọ te rro jẹ kpako omojọ no onana họ oware nọ ovia:

Okenọ Samuele ọ jọ owezẹ eva uwoudhu na urru jọ o tẹ rọriẹ kpama no owezẹ. O te yo nọ: ‘Mẹ na.’ Ọ tẹ kparoma dhẹ bru Ilai, inọ: ‘Who se omẹ, mẹ na.’

Rekọ Ilai o te yo nọ: ‘Me se owhẹ hẹ; zihe nya i kiẹzẹ.’ Samuẹle o te zihe nya i kiẹzẹ ehwa riẹ.

Kẹsena use avivẹ u te sei inọ: ‘Samuẹle!’ Koyehọ Samuẹle ọ kparoma ọ tẹ jẹ wariẹ dhẹ bru Ilai inọ: ‘Who se omẹ, yọ mẹ na,’ ere ọ tae. Rekọ Ilai o te yo nọ: ‘Me se he, ọmọ mẹ. Zoma kiẹzẹ. Samuẹle o te zihe ruọ ehwa.

‘Samuẹle!’ uvou na o tẹ zoma se orọ avesa. Fikiere Samuẹle ọ tẹ dhẹ bru Ilai. ‘Mẹ na, keme whọ se omẹ ba ese evaọ onana ha,’ ere ọ tae. Ilai ọ tẹ jọ enẹna riẹ nọ o rẹ te jọ nọ Jihova o bi sei na. Fikiere ọ tẹ ta kẹ Samuẹle nọ: ‘Nya e wariẹ kiẹzẹ ẹsiẹvo ofa, otẹrọnọ ọ wariẹ se, whọ vẹ ta kẹe nọ: “Tẹme, Jihova, keme odibo ra obi yo.”’

Onana họ onọ Samuẹle ọ ta okenọ Jihova ọ wariẹ sei. Koyehọ Jihova ọ ta kẹ Samuẹle nọ ọ be te rehọ uye kẹ Ilai avọ emezae riẹ. Uwhremuna Hofini avọ Finihas a te whu eva ẹmo ọ Ahwo-Filistia, okenọ Ilai o yo oware nọ ovia o te vre ugolo kie, uriẹ ohọ riẹ u te wiri o te whu re. Koyehọ ẹme Jihova ọze uzẹme.

Samuẹle ọ tẹ rro te ọzae, ọ tẹ zejọ obruoziẹ urere Izrẹl. Okenọ ọze kpako no, ahwo na a tẹ ta kẹe nọ: ‘Salọ ovie nọ o re su omai.’ Samuẹle ọ gwọlọ ru onana ha, keme evaọ uzẹme Jihova họ ovie rai. Rekọ Jihova ọ tẹ ta kẹe nọ ọ kezọ kẹ ahwo na.