TAQSIṬ TIS 55

Aqcic iqeddcen ɣef Ṛebbi

AQCIC-​AGI yeččuṛ d sser neɣ ala? Isem-​is Camwil. Argaz-​agi issersen afus-​is ɣef uqerruy-​is d Ɛili, lmuqeddem ameqran n Isṛayil. D baba-​s n Camwil yeţţusemman Ilqana akk-​d yemma-​s Ḥana i t-​id-​yewwin ɣer Ɛili.

Camwil yesɛa kan ṛebɛa neɣ xemsa iseggasen di leɛmeṛ-​is. Lameɛna, tura ad iɛic deg uqiḍun imqeddes n Yahwa neţţa d Ɛili akk-​d lmuqeddmin nniḍen. Acuɣer ara fken Ilqana d Ḥana mmi-​tsen amecṭuḥ akken ad yeqdec i Yahwa deg uqiḍun imqeddes? D ayen ara nwali tura.

Kra n iseggasen uqbel, Ḥana teḥzen ayendin. Yemmuɣben wul-​is axaṭer ur tezmir ara a d-​tesɛu dderya. Yuɣ lḥal neţţat tezza tɛebbuṭ-​is ɣef dderya. Yiwen wass, tṛuḥ ɣer uqiḍun imqeddes, dɣa teẓẓull: ‘A Yahwa ur iyi-​teţţu ara! Ma yella tefkiḍ-​iyi-​d aqcic, ɛuhdeɣ-​k a k-​t-​fkeɣ akken ad iqdec fell-​ak ddunit-​is meṛṛa.’

Yahwa iqbel taẓallit n Ḥana. Ɛeddan kra n wagguren, terfed s tadist, tesɛa-​d Camwil. Ḥana tḥemmel aṭas mmi-​s amecṭuḥ, tesɣaray-​it ɣef Yahwa seg wasmi yella d aṭuṭaḥ. Tenna i wergaz-​is: ‘M’ara yimɣur kan cwiṭ, a s-​kkseɣ tuṭṭḍa, a t-​awiɣ ɣer uqiḍun imqeddes ad iqdec dinna ɣef Yahwa.’

D ayen i xedmen Ilqana akk-​d Ḥana akken i teţwaliḍ di ţţeswiṛa-​ya. Imi i t-​ṛebban imawlan-​is akken i glaq, Camwil yefṛeḥ aṭas imi yezmer ad iqdec deg uqiḍun imqeddes n Yahwa. Mkul aseggas Ilqana akk-​d Ḥana ţṛuḥun ad ɛebden deg uqiḍun imqeddes, yerna rezzun ɣef mmi-​tsen amecṭuḥ. Yal aseggas Ḥana teţţawi-​yas i Camwil aqendur ajdid i s-​teţxiḍi.

Aseggas ittabaɛ-​it-​id wayeḍ, Camwil mazal-​it iqeddec ɣef Yahwa deg uqiḍun imqeddes. Ḥemmlen-​t meṛṛa, ama d Yahwa ama d imdanen. Lameɛna arraw n lmuqeddem ameqran Ɛili, Ḥufni akk-​d Finḥas, nutni diri-​ten. Xeddmen aṭas n leḥwayeǧ n diri, yerna ţţawin wiyaḍ ad ɛaṣin Yahwa ula d nutni. Lukan d lebɣi, ur ilaq ara a ten-​yeǧǧ Ɛili ad qqimen d lmuqeddmin, lameɛna ur ixdim acemma.

Ilemẓi-​nni Camwil ur yeǧǧi ara ayen n diri i gḍerrun deg uqiḍun imqeddes a t-​yawi ad yeḥbes leqdic-​is i Yahwa. Di zzman-​nni drus n yemdanen i gḥemmlen Yahwa s tideţ, ɣef waya i gɛedda waṭas n lweqt ideg ur d-​yehdiṛ ara Yahwa i wemdan. Lameɛna, asmi i gennerna Camwil di leɛmeṛ, atah wayen yeḍran:

Camwil yella yeṭṭeṣ deg uqiḍun imqeddes mi t-​id-​yessaki yiwen ṣṣut. Yerra-​yas: ‘Anɛam.’ Dɣa yekker yuzzel ɣer Ɛili, yenna-​yas: ‘Aql-​iyi axaṭer tessawleḍ-​iyi-​d.’

Lameɛna, Ɛili yerra-​yas: ‘Ur k-​in-​ssawleɣ ara, uɣal aţ-​ţeṭṭṣeḍ.’ Ihi Camwil yuɣal ad yeṭṭeṣ.

Camwil yesla diɣen i win i s-​d-​issawalen: ‘A Camwil!’ Dɣa yekker tikkelt nniḍen, yuzzel ɣer Ɛili, yenna-​yas: ‘Aql-​iyi axaṭer tessawleḍ-​iyi-​d.’ Lameɛna, Ɛili yerra-​yas: ‘Ur k-​in-​ssawleɣ ara a mmi. Uɣal aţ-​ţeṭṭṣeḍ.’ Ihi Camwil yuɣal ad yeṭṭeṣ.

Camwil yesla i ṣṣut-​nni abrid wis tlata: ‘A Camwil!’ Dɣa yuzzel ɣer Ɛili, yenna-​yas: ‘Aql-​iyi axaṭer tikkelt-​a tessawleḍ-​iyi-​d.’ Ɛili yefhem tura belli d Yahwa i s-​d-​issawalen. Ɣef waya i genna i Camwil: ‘Ṛuḥ aţ-​ţeṭṭṣeḍ. Ma yessawel-​ak-​d tikkelt nniḍen, ini-​yas: “Hdeṛ a Yahwa, aqeddac-​ik yeţḥessis.”’

D ayen i s-​yenna Camwil mi s-​d-​yessawel Yahwa abrid nniḍen. Imiren, Yahwa yenna i Camwil belli qrib ad iɛaqeb Ɛili d warraw-​is. Iɛedda kra n lweqt, Ḥufni d Finḥas mmuten di lgirra akk-​d Ifilistiyen. Mi gesla Ɛili s lexbaṛ-​agi, yeɣli ţ-​ţinnegnit, irreẓ si temgerṭ, dɣa yemmut ula d neţţa. Ayen i d-​yenna Yahwa yeḍra-​d swaswa.

Asmi i meqqer Camwil, yuɣal d lqaḍi aneggaru n Isṛayil. Mi guɣal d amɣar, At Isṛayil ssutren-​as: ‘Efk-​aɣ-​d agellid ara ɣ-​iḥekmen.’ Camwil ur yebɣi ara a sen-​iḥess axaṭer d Yahwa i d agellid-​nsen. Lameɛna Yahwa yenna i Camwil ad yaɣ awal i wegdud.

1 Camwil 1:1-28; 2:11-36; 4:16-18; 8:4-9.