KʼAJOʼ xchʼinaʼusal li chʼinaʼal li wank saʼ li eetalil. Aj Samuel xkʼabʼaʼ. Li winq li yook xchʼeebʼal xjolom laj Samuel aʼan laj Eli, aj tij re Israel. Ut li keʼkʼamok re laj Samuel rikʼin laj Eli, aʼanebʼ li xnaʼ xyuwaʼ, xʼAna ut laj Elqana.

Laj Samuel wank kaahibʼ malaj oobʼ chihabʼ re, naq kikanaak saʼ Rochoch li Jehobʼa rikʼin laj Eli ut ebʼ laj tij. Abʼan, kʼaʼut naq li xʼAna ut laj Elqana keʼchalk xkanabʼankil laj Samuel re naq tkʼanjelaq saʼ Rochoch li Jehobʼa?

Naq toj maajiʼ nayoʼlaak laj Samuel li xʼAna ra saʼ xchʼool, xbʼaan naq moko naru ta nawank xkʼuulaʼal. Saʼ jun kutan kiwulak saʼ Rochoch li Jehobʼa chi tijok ut kixye: ‹At Jehobʼa, minsachk saʼ aachʼool! Wi taakʼe junaq inkʼuulaʼal tinqʼaxtesi aawe re naq tkʼanjelaq chaawu chi junelik›.

Li Jehobʼa kixsume li xtij li xʼAna, joʼkan naq kiyoʼlaak laj Samuel. Li xʼAna naxra li xchʼina yum ut toj kachʼin naq kixkʼut chiru chirix li Jehobʼa. Li xʼAna kixye re li xbʼeelom: ‹Naq wanq kaahibʼ malaj oobʼ chihabʼ re laj Samuel tinqʼaxtesi chaq re li Jehobʼa re naq tkʼanjelaq chiru›.

Saʼ li eetalil nakʼutunk naq li xʼAna ut laj Elqana keʼxkanabʼ laj Samuel saʼ Rochoch li Jehobʼa. Laj Samuel sa xchʼool xbʼaan naq tkʼanjelaq saʼ Rochoch li Jehobʼa. Naq toj kachʼin laj Samuel li xnaʼ xyuwaʼ keʼxkʼut chiru chirix li Jehobʼa. Li xʼAna ut laj Elqana rajlal chihabʼ nekeʼwulak saʼ Rochoch li Jehobʼa chi loqʼonink ut nekeʼril chaq laj Samuel. Joʼkan ajwiʼ li xʼAna rajlal chihabʼ naxkʼam re laj Samuel jun li akʼil aqʼ.

Ak naabʼal chihabʼ xnumeʼk ut laj Samuel toj yook chi kʼanjelak saʼ Rochoch li Jehobʼa. Laj Samuel naxsahobʼresi xchʼool li Jehobʼa ut li tenamit. Ebʼ li ralal laj Eli aʼanebʼ laj Hofni ut laj Finehas. Maaʼusebʼ xnaʼlebʼ ut keʼxbʼaanu ajwiʼ naq jalanebʼ chik teʼxqʼet Raatin li Yos. Joʼkan naq tento raj naq laj Eli trisihebʼ li ralal choʼq aj tij, abʼan inkʼaʼ kixbʼaanu.

Laj Samuel inkʼaʼ kixkanabʼ kʼanjelak chiru li Yos usta yookebʼ xbʼaanunkil li maaʼusilal saʼ Rochoch li Jehobʼa. Ut chiru naabʼal chihabʼ li Jehobʼa inkʼaʼ chik kiʼaatinak rikʼin junaq winq. Xbʼaan naq moko naabʼalebʼ ta nekeʼxra li Yos. Ma nakaanaw kʼaru kixkʼul laj Samuel naq kinimank?

Laj Samuel yook chi wark saʼ Rochoch li Jehobʼa naq kirabʼi naq yook chi bʼoqeʼk. Joʼkan naq laj Samuel kiwakli ut kixye chaq re laj Eli: ‹Arin wankin! Xbʼaan naq xinaabʼoq›.

Laj Eli kixye re: ‹Laaʼin inkʼaʼ xatinbʼoq, ayu warin chaq›. Joʼkan naq laj Samuel kisutqʼi chi wark.

Laj Samuel kirabʼi saʼ xkabʼ sut naq kiyeheʼk re: ‹Samuel!› Laj Samuel xko wiʼ chik rikʼin laj Eli ut kixye re: ‹Arin wankin! Xwabʼi naq xinaabʼoq›. Tojaʼ naq laj Eli kixye wiʼ chik re: ‹At walal! Inkʼaʼ xatinbʼoq, warin chaq›. Ut laj Samuel kisutqʼi saʼ xwaribʼ.

Laj Samuel kirabʼi naq kiyeheʼk re saʼ rox sut: ‹Samuel!› Kiwakli ut kixye re laj Eli: ‹Arin wankin! Anaqwan xwabʼi naq xinaabʼoq›. Tojaʼ naq laj Eli kixkʼe reetal naq li Jehobʼa yook chaq xbʼoqbʼal laj Samuel. Joʼkan naq kixye re laj Samuel: ‹Yoklan chaq ut naq tatxbʼoq wiʼ chik taaye: Aatinan at Jehobʼa! Laj kʼanjel chaawu yook chaawabʼinkil›.

Joʼkan kixbʼaanu laj Samuel naq kibʼoqeʼk wiʼ chik. Li Jehobʼa kixye re laj Samuel naq traqoq aatin saʼ xbʼeen laj Eli ut ebʼ li ralal. Chirix chik aʼan, laj Hofni ut laj Finehas keʼkamk naq keʼyalok rikʼinebʼ laj Filisteo. Naq laj Eli kirabʼi li keʼxkʼul ebʼ li ralal kitʼaneʼk, kixtoq li xkux ut kikamk. Chi joʼkan kitzʼaqlok ru li kixye li Jehobʼa.

Naq kiwinqiloʼk laj Samuel kaʼaj chik aʼan kiwank choʼq aj raqol aatin saʼ li tenamit Israel. Ut naq laj Samuel kicheekobʼk ebʼ laj Israel keʼxye re: ‹Sikʼ junaq winq re naq t-aawabʼejinq saʼ qabʼeen›. Laj Samuel inkʼaʼ kiwulak chiru aʼin, xbʼaan naq li Jehobʼa aʼan li awabʼej saʼ xbʼeenebʼ. Abʼan, li Jehobʼa kixye re laj Samuel naq trabʼi li tenamit.