UNO ke mwanyike wa mulume walamba bingi, ke ibyo nenyi? Jizhina janji Samwela. Kabiji awe mwanamulume wamukwata Samwela pa mutwe ke ñanga mukatampe wa bena Isalela wa jizhina ja Eli. Abe babena kumuleta Samwela kwi Eli ke bashanji ba Elekana ne bainanji ba Hana.

Samwela papo wakijingatu na myaka ya kusemwa ina nangwa itanu. Bino waikelenga ku nzubo ya Yehoba pamo ne Eli ne bañanga bakwabo. Mambo ka Elekana ne Hana kyo bamupanyijile Samwela wajingatu mwanyike kuba’mba engijilenga Yehoba ku nzubo yanji? Twaya tumone.

Hana wajinga bingi na bulanda myakatu icheche yapichilepo kino saka kikyangye kubiwa ne. Wajinga na buno bulanda mambo kechi wajingapo na mwana ne, kabiji kino kyamulengejile kuba’mba akebeshe kwikalapo na umo. Onkao mambo, juba jimo Hana byo ayile ku nzubo ya Yehoba, walombele’mba: ‘Anweba Yehoba, kumvulama ne! Inge mukampe mwana wamulume, amiwa nkamupana kwi anweba kuba’mba akemwingijilenga moba onse a mweo wanji.’

Yehoba wakumbwile lulombelo lwa kwa Hana, kabiji bañondo balondejilepo wasemene mwana ne kumutumba amba Samwela. Hana wamutemenwe bingi mwananji wa mulume, kabiji watendekele kumufunjisha pe Yehoba saka akijitu mwanyike. Waambijile mwatawanji amba: ‘Inge Samwela wasumuka, nkamutwala ku nzubo ya Yehoba akamwingijilenga.’

Abino byo bibena kuba Hana ne Elekana pa kikye kipikichala. Kabiji Samwela byo bamufunjishe bulongo ku bansemi banji, watemenwe bingi kwingijila Yehoba pa ino nzubo yanji. Pa mwaka pa mwaka Hana ne Elekana baiyanga pa uno tente, ne kufwakesha mwanabo wa mulume. Kabiji pa kwiya Hana wamuletelanga tumikangyo to amusonenanga Samwela.

Monka mu kuya kwa myaka, Samwela watwajijile na kwingijila mu nzubo ya Yehoba, kabiji Yehoba ne bantu bamutemenwe bingi. Bino baana babiji ba balume ba kwa ñanga mukatampe Eli, ba Hofini ne Finease bajinga babi. Baubilenga bintu byatama byavula bingi, kabiji balengejile ne bakwabo kubula kukokela Yehoba. Eli wafwainwe kwibafumya pa buñanga, pano kechi byo aubile ne.

Aye wakyanyike Samwela kechi walekele bintu byatama byaubiwenga pa nzubo ya Lesa kumulengela kuleka kwingijila Yehoba ne. Bino na mambo a kuba’mba bantu bachechetu bo batemenwe Yehoba kya kine, papichile kimye kyabaya bingi kufuma paambijile Yehoba na bantu. Samwela byo akomeneko, abino byo byamwekele:

Samwela walaajile mu nzubo ya Lesa byo abukile na mambo a jiwi jo aumvwine. Wakumbwile’mba: ‘Mwane.’ Ne kubuka wabukile ne kuya lubilo kwi Eli amba: ‘Amiwa bano ye mwaita.’

Bino Eli wakumbwile’mba: ‘Ine, kechi nakwita ne, yanga kalaale.’ Kepo Samwela ayile na kulaala.

Babwelele bamwita amba: ‘Samwela!’ Kepo Samwela abukile ne kuya jibiji lubilo kwi Eli, ne kwamba’mba: ‘Amiwa bano ye mwaita.’ Bino Eli wakumbwile’mba: ‘Kechi nakwita ne, mwanami, yanga, kalaaletu.’ Kepo Samwela abwelele jibiji na kulaala.

Jiwi jamwichile ja busatu amba: ‘Samwela!’ Kepo Samwela ayile kwi Eli, ne kwamba’mba: ‘Amiwa bano ye mwaita.’ Eli po po ayukile’mba wafwainwa Yehoba ye ubena kumwita. Kepo abujile Samwela amba: ‘Yanga, ukalaale, kabiji inge akwite jikwabo obewa wambe’mba: Bambenga mwane, anweba Yehoba; mambo kalume wenu ubenakuteleka.’

Abino byo byo aambile Samwela byo bamwichile kwi Yehoba jibiji. Kepo Yehoba aambijile Samwela amba ukamuba kyatama Eli ne baana banji ba balume. Palutwe kacheche, Hofini ne Finease bafwile mu nkondo yo balwile na bena Filishitiya, kabiji Eli byo aumvwine kyaubiwe, waponene, ne kwimokola nshingo ne kufwa wafwa. Onkao mambo byambo bya Yehoba bifikizhiwa.

Samwela wakomene ne kwikala mutonyi wapeleleko mu Isalela. Byo akotele, bantu bamwambijile’mba: ‘Mwitukebelepo mfumu aketulamenga.’ Bino Samwela kechi wakebele kuba bino ne, mambo Yehoba kine ye wajinga mfumu wabo. Bino Yehoba wamwambijile’mba ateleke ku byaambilenga bantu.