NUAWƆ se poombɔle kɛndɛ. Diola ndɔlaŋ lacho Samiɔŋ ni. Ilai handu ndu hoo baa o lebol ni. Ndu cho masa wanaa soliaa salaa o Mɛlɛka lo le Isɔluɛitiiya ni. Finya ndɔ Ɛlikana a kala ndɔ Hana hiŋ kaŋ a ndu o Ilai lo ni.

Wɔsilaŋ la hiɔɔlu ɔɔ la ŋuɛɛnu Samiɔŋ ndoo wa ni ma huŋ a ndu naŋ. Kɛ a koŋ kpou, Samiɔŋ cho wa a Ilai latulu vɛlɛa wanaa soliaa salaa cheleŋ o maaŋ Jɛhowaa niŋ. Le yɛɛnɛ Ɛlikana nda Hana huŋ yɔŋgu yɛ poombɔ pɔmbɔɔ hoo le mbo biilu Jɛhowa o maaŋ ndɔɔ niŋ? Ŋ nuaŋnuŋndɔ.

Tuupa mi hei yɔŋnuŋ, Hana wa fɛŋ a kɔl tambɛiyo le wɔsila siaama. Sabu koŋ wa ni maa, Hana ndoo vilu wɔ kposoŋ te. Kɛ ndoo yeema bɔɔ violɔɔ. Paale pilɛ, mɛɛ Hana kuɛ lahau piɛileŋ o maaŋ Jɛhowaa niŋ, mbo dimi aa: ‘Kpokoo Jɛhowa, puɛɛnuŋ a ya le fɔ! Te a ke ya poo pɛ, I cho ndu yɔŋgɔɔ o maaŋ numndo niŋ le mbo tosa hɛnaŋ numndo tei a yoomu ndɔɔ mɛɛlulaŋ.’

Mi Jɛhowa muli piɛile Hana leŋ. Mɛɛ paŋgoŋ hiou dɔɔ ŋtiŋ, mi Hana vialu Samiɔŋ. Hana ndoo kaala bɔɔ po ndɔɔ hoo, nduyɛ teleŋ o wa wɔ o pɔmbɔ wo, mbo kandu ndu pɛɛkoo a Jɛhowa okɔɔ. Mbo dimul pɔnɔ ndɔ aa: ‘Te Samiɔŋ mal dɔɔ mɛɛleŋ pɛ, I cho lakɔ a ndu o maaŋndo niŋ le mbo wa Jɛhowa biiloo.’

O fotuieyoo niŋ, keŋ naŋ cho chɔɔ Hana nda Ɛlikana tosaa ni. Teleŋ Samiɔŋ wa wɔ chɛlɛkpɛ wo, mi wanaa velu ndu wa pɛɛku ndu nyɛ kɛndɛi a Jɛhowa okɔɔ. Le hei, mbo naŋ kɔl tau le mbo biilu Jɛhowa o maaŋ ndɔɔ niŋ. Wɔsi o wɔsi fee, mi Hana nda Ɛlikana ndaa hiŋ le piɛileŋ o maaŋndo hoo niŋ vɛlɛa po ndaa hoo yilɔɔ. Hana ndoo wa hunɔɔ pɛ, o toosiaa doma kɛndɛ kɛndɛ o chuu Samiɔŋ.

Mɛɛ wɔsilaŋ la hiau fau, lende koni Samiɔŋ hiau a Jɛhowa biiloo nyɛ kɛndɛi o maaŋ ndɔɔ niŋ ni. Le hei, mi Jɛhowa a waŋnda kpou hɛnaŋ a ndu. Kɛ puaa Ilaiya, Hofini nda Finihaa ve wanaa kɛndɛ kposoŋ te. Sɔɔŋ wɔɔŋndoŋ pila ndaa tosa ni. Nduyɛ, ma tosa a cheleŋnda bɛɛ tuii Jɛhowa diom te. Ndaa bɛnda lɛ kposoŋ le waa wanaa soliaa sala o Mɛlɛka lo le. Ilai ndoo nɔ ni mi ndoo faŋa nda, kɛ o tosa keŋ te.

Nyɛm wɔɔŋ wa yɔŋnɔŋndo o maaŋ Jɛhowaa niŋ ndoŋ kuuna Samiɔŋ Jɛhowa biilu le. Waŋnda nyɛɛmbɔ koni ndaa kaala Jɛhowa teleŋ koŋ ni. Le saboo hoo, mbo chua teleŋ vilɛi Jɛhowa ndoo suu o wana o wana lo le. Kɛ mɛɛ Samiɔŋ sul kaasoŋnɔ, nyɛ ndoo yɔŋnuŋndo wa hoo ni:

Mɛɛ Samiɔŋ wa o luaŋ paale pilɛ o maaŋ Jɛhowaa niŋ, mbo tuɛi veeloo, mɛɛ mbo tiandu. Okoŋ mbo chɛl aa: ‘Ee, nuaa ya naŋ.’ Mɛɛ o chɛŋ, mbo kua a kiltaŋ naa Ilai cha. Mbo nyuna ndu aa: ‘Num te veelu ya le? I hiŋ.’

Kɛ mi Ilai mulul ndu aa: ‘I veelu num te; miiŋgu ma kɔ hini.’ Mi Samiɔŋ kɔ hiniŋ. Mɛɛ o hini, mbo tuɛi vɛlɛ veelu diiŋndɔɔ aa: ‘Samiɔŋ!’ Mi Samiɔŋ chaŋ mbo nyaanuŋ vɛlɛ naa Ilai cha, mbo nyuna ndu aa: ‘Num veelu ya ni? Nuaa ya I hiŋ.’ Kɛ mi Ilai muli aa: ‘I veelu num te po nuu, kɔ hini vɛlɛ.’ Mi Samiɔŋ miiŋgu vɛlɛ ihini.

Mbo tuɛi vɛlɛ veelu yaandɔɔ. ‘Samiɔŋ!’ Mi Samiɔŋ kua a kiltaŋ vɛlɛ naa Ilai cha. Mbo dimi aa: ‘Nuaa ya naŋ, num veelu ya niŋ o laŋ ni.’ Mi Ilai sina niko maa Jɛhowa cho veeloo ni. Mɛɛ mbo dimul Samiɔŋ aa: ‘Kɔ hini vɛlɛ, nduyɛ te o veelu niŋ pɛ, dimi aa: “Soo Jɛhowa buɛi numndo cho nilaŋ yaŋɔɔ.”’

Mɛɛ Jɛhowa veelu vɛlɛ, lende kinɛi Samiɔŋ dimi ni. Mi Jɛhowa dimul niko Samiɔŋ maa o cho Ilai a chuauwaa nduaa nyɛpalaa tuisi choo. Mɛɛ nyɔɔ viou kpɛɛ, mi Hofini nda Finihaa kɔ wu o chɔuwo mɛɛ nda wa sɔŋgaa nda Filitiaŋnda. Mɛɛ Ilai tuei a nyɛ yɔŋnuŋndo, mbo del lɛŋ kpuluŋ mbo yam kɛsei mi ndu bɛɛ wu. Mɛɛ nyɛ Jɛhowa dimi wo yɔŋnuŋ tonya.

Mɛɛ Samiɔŋ sul laŋgbanɔ kala, ndu wa niŋ wana kialaa ŋyama mɛɛlaa kpɔŋ Isɔluɛi ni. Mɛɛ o yuwa, mi waŋnda dimul ndu aa: ‘Hɛli waŋndo mbo wa naa choo masa.’ Samiɔŋ yeema mbo tosa hei le, kanifuule Jɛhowa cho masa ndaa ni. Kɛ mi Jɛhowa dimul ndu maa o yaŋ nda nilaŋ.