TALI uyu umusankwa umwanice alukuboneka bwino? Isina lyakwe ni Samweli. Kabili umwalalume uubikile ukuboko kwakwe pa mutwi wakwe Samweli ni Eli umupapatilisi umukulu uwa baIsilaeli. Abo ni bawisi bakwe Samweli ba Elikana na ba Ana banyina abalukuleta Samweli kuli Eli.

Samweli ali lukoso ne myaka apepi na sine neli sisanu. Pano akulukwikala apa pe sema lya baYehoba na Eli nabambi abapapatilisi. Mba nindo Elikana na Ana bangapelela umuntu umwanice koti ni Samweli ukupyungila baYehoba pe sema? Leka tubone.

Palipitile lukoso imyake’inini ili ici tacingacitika, Ana alibombomene ukwakuti. Ni pa mulandu wakweba’ti taakwetepo neli mwana, kabili aalukumufwaisya ukwakuti. Popele kambi kasuba ili Ana alukufakasya kwi sema lya baYehoba, katembela ati: ‘Mwe baYehoba, mwindubako! Kani mukampelo’mwana umwalalume, ndukulaya’ti nkamupela kuli mwebo pakweba’ti akamupyungileni umweo wakwe onse.’

BaYehoba balyasukile itembelo lyakwe Ana, kabili ili papitile’myensi alifyele Samweli. Ana alimutemenwe umusankwa wakwe umwanice, kabili alitatikile ne kumusambisya pali baYehoba ili aali acili umwanice lukoso. Alyebele umulume wakwe ati: ‘Apo penka Samweli akakulako ukulinga’ti tekuti alelwepo, nkamutwala kwi sema mu kupyungila baYehoba kulya.’

Ifi efi twabona Ana na Elikana balukucita mu cikope. Kabili pa mulandu wakweba’ti Samweli afundwa bwino ku bafyasi bakwe, asangalala pakweba’ti angapyungila baYehoba apa pe sema lyabo. Imyaka na myaka Ana na Elikana balesa mu kupempela apa pe tente ililibelele, na mu kubona umusankwa wabo umwanice. Kabili cila mwaka Ana alaleta umwingila wa bukumo uwakubula amaboko uwo apasiliile Samweli.

Ili imyaka yaye’li ipita, Samweli atwalilila ukulukupyunga pe sema lya baYehoba, kabili baYehoba ne bantu nabo bamutemwa. Pano Yofini na Finekasi abana bakwe Eli umupapatilisi umukulu tabaapo bwino. Balacite’fintu ifingi ifibipile, kabili balalenga nabambi nabo ukubulo’kumfwila baYehoba. Eli alyelelwe ukubafumyapo pa bupapatilisi, pano tacitile’fyo koku.

Samweli umwanice talekele conse ica fintu ifibipile ifilukucitwa pe sema ukumulenga ukuleko’kupyungila baYehoba. Pano pa mulandu wakweba’ti abantu abanini lukoso e batemenwe baYehoba icinenene, palipitile’mpindi ukufuma apo baYehoba balabilepo ku muntu uuli onse. Ili Samweli akulako ifi e fyacitika:

Samweli alilele mwi sema ili isiwi lyamusibusya. Samweli aasuka ati: ‘Ninebo nkuno.’ Kabili aima ne kubutukila kuli Eli, ne kulabila ati: ‘Mwacinjita, kabili ninebo nkuno.’

Pano Eli aasuka ati: ‘Nsyacikwitapo; bwelela mu kulala.’ Popele Samweli abwelela mu kulala.

Pano kwaba ukwita kwa libili: ‘Samweli!’ Popele Samweli abuka ne kubutukila nakabili kuli Eli. Alabila ati: ‘Mwacinjita, kabili ninebo nkuno.’ Pano Eli aasuka ati: ‘Nsyacikwitapo, bwelela mu kulala nakabili.’ Popele Samweli abwelela mu kulala.

Isiwi lyaita umuku wa butatu: ‘Samweli!’ Popele Samweli abutukila kuli Eli. Alabila ati: ‘Ninebo nkuno, pakuti uno muku mwacinjita.’ Eli aisiba ati balyelelwe ukuba ni baYehoba e balukwita. Popele abula Samweli ati: ‘Bwelela nakabili mu kulala, kabili kani bakwite nakabili, ulyelelwe ukulabila’ti: “Labileni, mwe baYehoba, pakuti umupyungisi wenu alikutikile.”’

Ifi efi Samweli alabila ili baYehoba baita nakabili. BaYehoba eli bamubula Samweli ati bali ne kupanika Eli ne bana bakwe. Mukupita kwa mpindi Yofini na Finekasi bafwa mu nkondo ne baFilisiti, kabili Eli pa kumfwa ifyacitika apona ubwisaneme, akoneka umukosi naye ne kufwa. Popele isiwi lya baLesa lyaba bucine.

Samweli akula, aaba musololwesi wakupelako uwa Isilaeli. Ili acekula, abantu bamulomba ati: ‘Salululeni imfumu iya kututeka.’ Samweli talukufwayapo ukucite’fi, nipakuti muli bucine ni baYehoba e mfumu yabo. Pano baYehoba bamweba ukukutika ku bantu.

1 Samweli 1:1-28; 2:11-36; 4:16-18; 8:4-9.