TBʼANELXIX tal neʼ (neʼẍ) lu. Samuel tbʼi. Aju xjal nkubʼ tqʼoʼn tqʼabʼ tibʼaj twiʼ tal neʼ, Elí tbʼi, jun nejenel kye pal te tnam Israel. Aʼyejo ma chi ul qʼinte tal neʼ twitz Elí a Elqaná ex Ana aqeju ttat tal neʼ.

Naq kyaje mo jweʼ abʼqʼi iqʼen tuʼn Samuel. Kjel anqʼil tzalu toj tja Jehová tukʼe Elí ex kyukʼe txqantl pal. ¿Tiquʼn ma tzaj kyiʼn Elqaná ex Ana jun tal qʼa ik tzeʼn Samuel, tuʼn tajbʼen toj tja Jehová? Kʼelel qnikʼ tiʼj.

Tej naʼmxtaq tul itzʼje Samuel, in bʼisenteq Ana. Tuʼnju mibʼantoq alin, ex tajxixtaq tuʼn tten jun tal. Atteq jun maj toj tja Jehová, ok ten naʼl Dios ex tma: ‹¡Nman aya tajaw tkyaqil, miʼ chin el naje tiʼj tkʼuʼja! Qa ma tzaj tqʼoʼna jun wale xinaq, jaku txi nqʼoʼne tuʼn tajbʼen teya tuj tkyaqil tanqʼibʼil›.

Tzaj tbʼiʼn Jehová tnaʼj Dios Ana ex tej tbʼet ambʼil ul itzʼje jun tal aju Samuel. Nimxixtaq tkʼujlal Ana tiʼj tal, tej tzmatoq tal neʼ xi tqʼoʼn xnaqʼtzbʼil te tuʼn tel tnikʼ tiʼj Jehová. Xi tqʼamaʼn te tchmil: ‹Okxi tel tal neʼ tiʼj tchʼuʼ ok kxel wiʼne tuj tja Jehová tuʼntzun tajbʼen te›.

Ik bʼentju tuʼn Ana ex Elqaná, ik tzaʼnj tkuʼx toj tilbʼilal. Tuʼnjo otaq txi qʼoʼn tbʼanel xnaqʼtzbʼil te kyuʼn tman, ntzalajtoq Samuel tuʼnju in najbʼenteq te Jehová atz tuj tja. Toj junjun abʼqʼi ncheʼxtoq ttat kʼulil twitz Jehová tuj tja, ex bʼiʼx nchi ikʼtaq kaʼyilte Samuel. Ex tuj junjun abʼqʼi nxitaq tiʼn Ana jun akʼaj t-xbʼalun (tiʼj) Samuel.

Tej tikʼ nim abʼqʼi kukxtaq najbʼen Samuel toj tja Jehová, ex tbʼanel ela toj twitz Jehová ex tuj kywitz aj Israel. Atzunte Hofní ex Finehás, aʼyejo tkyʼajal Elí, mya bʼaʼn xjalqetoq. Nimtoq mya bʼaʼn nbʼent kyuʼn, ax ikx e ok txqantl xjal kyuʼn te mya bʼaʼn. Owtle chi el tiʼn Elí te pal, pero mixtiʼ bʼent jlu tuʼn.

Atzunte Samuel mitiʼ xi tqʼoʼn ambʼil tuʼn tkubʼ tzʼaq tuʼnjo mya bʼaʼn nbʼaj tuj tja Jehová. Toj nim ambʼil mitiʼteqtl nyolin Jehová tukʼe jun xjal, tuʼnju nya nim xjal kʼujlaʼntoq Jehová kyuʼn. Tej tchʼiy chʼintl Samuel, ikʼ jlu:

Njtantaq Samuel toj tja Jehová, el twatl tuʼn jun tqʼajqʼojil wibʼaj xi tbʼiʼn. Xi ttzaqʼweʼn: ‹Lu qine lu›. Jawtzun weʼ ex xiʼ jatumel taʼ Elí, ex tqʼma: ‹Lu qine lu, ma chin tzaj ttxkoʼne›.

Atzunte Elí xi tqʼamaʼn: ‹Mintiʼ we in chin txkon tiʼja, ku taja ex koẍekuya›. Ajtzun meltzʼaj Samuel toj twatbʼil.

Tzaj juntl maj tqʼajqʼojel wibʼaj ex tqʼama: ‹¡Samuel!› Jawtzun weʼtl Samuel ex xiʼ jatumel taʼ Elí ex tma: ‹Lu qine lu, ma chin tzaj ttxkoʼna›. Atzente Elí xi ttzaqʼweʼn: ‹Nkyʼajal, mitiʼ we in chin txoken tiʼja. Ku tanja ex kuẍekuya›. Anjtzun meltzʼaj Samuel toj twatbʼil.

Toj toxin maj tqʼamatl tqʼajqʼojel wibʼaj: ‹¡Samuel!› Eltzun bʼettl Samuel tuʼn tpon jatumel taʼ Elí ex tqʼama: ‹Lu qine lu; aya saj txkon weye jaʼlin›. Eltzun tnikʼ Elí qa a Jehová tzaj txkonte Samuel. Ex xi tmaʼntl te: ‹Koẍekuye juntl maj, ex qa ma tzaj txkoʼntle, kxel ttzaqʼweʼna jalu: Yolina Jehová, quʼn lu tmajena in bʼin›.

Atzenjo xi tqʼamaʼn Samuel tej ttzaj yolin Jehová juntl maj. Tzajtzun tqʼmaʼn Jehová te Samuel qa ok kbʼel tqʼoʼn tkastiw Elí kyukʼex tkʼwal. Yajxitl, kyim Hofní ex Finehás tej nchi qʼojintaq kyukʼe aj Filisteo, tejtzun tok tbʼiʼn Elí aju otaq bʼaj, ikʼ pakʼchaj bʼiʼx toqj tiʼj tqul ex kyim. Iktzen japunbʼaj twiʼ tyol Jehováju.

Chʼiy Samuel ex ok te mankbʼil (último) jwes. Tej ttijen, kyqʼama aj Israel te: ‹Bʼaʼn tuʼn tok tqʼoʼna jun kawil tuʼn tkawin qibʼaje›. Mya bʼaʼn ela jlu tuj twitz Samuel, tuʼnju ateq Jehová in kawin kyibʼaj. Tzaj tmaʼn Jehová te: Bʼinchama aju ntzaj kyqanin aj Israel teya.