Sturka 55

Tuktan Lupia Kum Gâd Dukya Daukan

RAIT APIA tuktika lupia na pain sa? Witin nina Samyuil. Waitna kum tuktika lal ra ai mihta mangki bri ba nina Hilai, witin ba Israel prîst wihtka kan. Tuktika ra brih auya uplika nani ba, ai aisika Ilkena bara ai yaptika Ana kan.

Samyuil ba walhwal apia kaka matsip mani baku bri kan. Sakuna witin Jehova tempelka ra, Hilai bara prîst wala nani ba aikuki iwai kan. Dia muni Ilkena Ana wal Samyuil ba uba sirpi kan tempel ra Jehova dukya daukaia wisi brihwan kan? Kaisa kaikaia.

Naha takras kainara, Ana ba uba sari kan. Witin baku kan, luhpa sip baikras kan ba mita, bara witin brinka tara bri kan luhpa kum briaia. Baku bara, witin yu kum Jehova tempelka ra wan pyua ra, ai pura suni win: ‘Alai, Jehova, man yang duki ra amya tikpara! Man yang ra luhpa waitna kum aikma kaka, yang pramis mai munisna ai rayaka yua nani sut ba maikamna warkkam dauki kabia dukyara.’

Jehova, Ana pura sunra ansika yaban, bara kati nani luan taim witin Samyuil ba baikan. Ana ba ai luhpia ra uba latwan kan, bara kau sirpi lupia kan wina Jehova tanka dukyara smalkan. Witin ai maîa waitna ra win: ‘Samyuil ba mani aitani brih, yang witin main kaikaia nit apia kabia taim tempel ra brihwaisna, baha ra Jehova dukya dauki kabia dukyara.’

Baha sika Ana Ilkena wal dauki kan yawan lilka ra kaiki ba. Aisika nani ba Samyuil ra uba pain smalkan kan ba mita, witin uba lilia kan tent watla ra Jehova dukya dauki kaia. Mani bani aisika nani ba naha tentka watla ra wi kan Gâd ra mayunaia, bara ai luhpia ra kaikaia. Bara mani bani Ana prak klahklas raya kum dauki Samyuil ra brihwi yabi kan.

Mani nani lui kan, bara Samyuil ba kau tempel ra Jehova dukya dauki kan, bara naha ba Jehova bara taun uplika nani ba yamni kaiki kan. Ban sakuna prîst wihtka Hilai luhpia nani, Upni, Pinihas wal ba upla pain apia kan. Witin nani ba diara saura ailal dauki kan, bara upla wala nani ra sin munan Gâd bila lulkan. Hilai ba witin nani ra prîst nani tila wina sakaia kan, sakuna baku daukras kan.

Wahma Samyuil ba naha dukya saura nani tempel ra dauki kan ba, kumi mita sin yaban ai mina prukras kan, Jehova dukya dauki kan ba swiaia dukyara. Pyu ailal ra Jehova upla kumi wal aisaras kan, kan upla wiria baman witin ra latwan kaiki kan. Samyuil ba kau wiria pawan taim, naku takan:

Samyuil ba tempel ra yapi kan bara bila baikra kum mita wini bukan. Bara witin taui win: ‘Nara sna.’ Ningkara bui, Hilai ra plapi wih win: ‘Ai winram mita nara sna.’

Sakuna Hilai mita win: ‘Yang mai winras; wih aitniks.’ Baha mita Samyuil kli ai krikrika ra wan.

Kli aima wala ra winan: ‘Samyuil!’ Bara witin bui kli Hilai ra wih win: ‘Ai winram mita nara sna.’ Sakuna Hilai bila: ‘Luhpi, yang mai winras. Kli wih aitniks.’ Baku bara Samyuil ba kli ai krikrika ra wan.

Bila baikra ba aima yuhmpa ra winan: ‘Samyuil!’ Bara Samyuil ba Hilai ra plapi wan. Bara win: ‘Nara sna; na trip lika ai winram kaia sa.’ Nanara lika Hilai nu takan Jehova wini kan ba. Bara Samyuil ra win: ‘Man was bara aitniks, witin kli winbia kaka, man wis: ‘Aisas, Jehova, nampakan man ra mai walisa.’ ’

Jehova kli winan taim, Samyuil ba baku win. Bara Jehova mita Samyuil ra Hilai bara ai luhpia nani ra panis munaisa win. Baha wina, Upni Pinihas wal Pilistain uplika aikuki aiklabi prui bangwan, Hilai ba baha walan taim, kauhwi nana dusa kriwan bara pruan. Baku Jehova aisan kan ba tnata aimakan.

Samyuil ba pawan, bara witin Israel wihtka las kan. Almuk takan pyua ra, taun uplika nani ba win: ‘King kum pliki saks yang nani purara king aimakbia dukyara.’ Samyuil ba want apia kan, kan Jehova ba witin nani kingka kan. Sakuna Jehova mita taun uplika nani ra walbia win.

1 Samyuil 1:1-28; 2:11-36; 4:16-18; 8:4-9.