BI-​KƖDG ning yãmb sẽn ne wã yʋʋr la a Sãmwɛlle. Rao ning sẽn tik a Sãmwɛll zugã yaa Israɛll maan-​kʋʋdb kãsma. A yʋʋr la a Eli. Yaa a Sãmwɛll ba a Ɛlkana la a ma a Ana n tall-⁠a n wa a Eli nengẽ.

A Sãmwɛll zemsa yʋʋm a naas bɩ a nu. La a na n zĩnda a Zeova sɛk-​roogẽ wã ne a Eli la maan-​kʋʋdb a taabã. Bõe yĩng t’a Ɛlkana ne a Ana tall b bi-​kɩdg a Sãmwɛll t’a na n tɩ tʋm a Zeova sɛk-​roogẽ wã. Bɩ d gese.

Yʋʋm a wãn sẽn deng rẽ, a Ana sũurã da sãama wʋsgo, bala a ra pa tar biig ye. A ra rata biig ne a sũur fãa. A Ana wa n kẽnga a Zeova sɛk-​roogẽ wã n pʋʋs-⁠a n yeel yaa: ‘Zeova, ra yĩm m yell ye. Fo sã n kõ maam bi-​ribla, mam na n dɩk-⁠a lame n kõ foo a yõor tɛka.’

A Zeova kelga a Ana pʋʋsgã, la kiis a wãn poore, a roga a Sãmwɛlle. A Ana ra nonga a biigã, la a sẽn wa n ket n paoodẽ menga, a zãms-⁠a lame t’a bãng a Zeova. A yeela a sɩdã t’a Sãmwɛll sã n wa sigi, a na n tall-⁠a lame n kẽng sɛk-​roogẽ wã t’a tɩ tʋmd a Zeova tʋʋmã.

Yãmb pa ne a Ana ne a Ɛlkana sẽn sɩd tall a Sãmwɛll n wa sɛk-​roogẽ wã sɩda? A Sãmwɛll baaba ne a ma sẽn wub-⁠a sõma wã yĩnga, a sũura nooma a sẽn paam n na n tʋm a Zeova sɛk-​roogẽ wã. Yʋʋmd fãa, a Ana ne a Ɛlkana wata sɛk-​roogẽ wã n waoogd a Zeova la b get b bi-​riblã. Yʋʋmd fãa me, a Ana wʋgda fu-​bil n wat n kõt a Sãmwɛlle.

A Sãmwɛll kell n tʋma a Zeova sɛk-​roogẽ wã, t’a Zeova la nin-​buiidã nong-⁠a. La a Eli kom-​dibli a Ofni ne a Fineyas ra yaa nin-​yoodo. B tʋma tʋʋm-​yood la b kɩt tɩ neb a taabã me kɩɩs a Zeova noyã. A Eli ra pa segd n le sak tɩ b yɩ maan-​kʋʋdb ye. La a pa maan woto ye.

Baa ne nebã sẽn da tʋmd tʋʋm-​yood sɛk-​roogẽ wã, a Sãmwɛll ka bas tɩ rẽ kɩt t’a bas n pa le tũud a Zeova ye. La sẽn mik tɩ yaa neb bilf bal n da nong a Zeova wã yĩnga, a Zeova sẽn da gom ne ned kaoosa wʋsgo. A Sãmwɛll sẽn wa n bɩ bilf n paase, bũmb n maane.

A Sãmwɛll wa n gõee daar a yembr sɛk-​roogã pʋgẽ, n wʋmd koɛɛg sẽn boond-⁠a. A sakame la a wudg n tɩ yeel a Eli yaa: ‘Yãmb sẽn bool maamã, m waame.’

La a Eli yeel-⁠a lame tɩ yẽ pa bool-⁠a, la a yeel-⁠a t’a lebg n tɩ gãande. A Sãmwɛll sɩd lebgame.

La koɛɛgã le boolame tɩ: ‘Sãmwɛll!’ T’a Sãmwɛll yik n zoe n kẽng a Eli nengẽ n tɩ yeel yaa: ‘Yamb sẽn bool maamã, m waame.’ La a Eli yeelame yaa: ‘M pa bool-⁠f ye, m biiga. Lebg n tɩ gãande.’ T’a Sãmwɛll le lebge.

La koɛɛgã leb n boola naoor a tãab-⁠n-​soab tɩ: ‘Sãmwɛll!’ A Sãmwɛll yikame n le zoe n ta a Eli nengẽ n yeel yaa: ‘Masã wã yẽ, yaa yãmb n bool maam.’ A Eli bãngame tɩ yaa a Zeova n da boond a Sãmwɛlle, t’a yeel a Sãmwɛll yaa: ‘Lebg n tɩ gãande. La koɛɛgã sã n le bool-⁠f bɩ f yeel tɩ: “Zeova, gom tɩ f tʋm-​tʋmdã kelgdame.” ’

A Zeova le bool-⁠a lame yɛsa, t’a Sãmwɛll leok wa a Eli sẽn togs-⁠a to-⁠to wã. A Zeova yeela a Sãmwɛll t’a na n sɩbga a Eli ne a kom-​dibli wã. Kaoosg zugẽ, Israɛll nebã wa n zaba ne Filisti nebã, t’a Ofni ne a Fineyas ki zabrã pʋgẽ. A Eli sẽn wʋm t’a kom-​dibli wã kiime wã, a lʋɩɩ tẽng t’a yublã kao tɩ yẽ me ki. Kell n yɩɩ wa a Zeova sẽn da yeelã bal kɛpɩ.

A Sãmwɛll bɩɩme, la yaa yẽ n yɩ Israɛll yaoolem bʋ-​kaooda. A sẽn wa n kʋʋlã, Israɛll nebã yeel-⁠a lame t’a yãk ned t’a yɩ b naaba. A Sãmwɛll sũurã pa yɩ noog ye, bala yaa a Zeova n da yaa b naaba. La a Zeova yeela a Sãmwɛll t’a wee n kelg nebã goama, n bao naab n kõ-ba.