KOTO liviní náʼa̱ ta̱ loʼo yóʼo, Samuel naníra. Ta̱ tíin xi̱ní ta̱ loʼo yóʼo kúú ta̱ su̱tu̱ káʼnu ñuu Israel, Elí naníra. Ta̱ Elqaná xíʼin ñá síʼíra ñá Ana ni̱xa̱a̱na xíʼin ta̱ loʼo yóʼo nu̱ú ta̱ Elí.

Ta̱ loʼo yóʼo ku̱mí á u̱ʼu̱n ku̱i̱ya̱ ndíka̱a̱ra. Soo vitin koora xíʼin ta̱ Elí xíʼin inka na̱ su̱tu̱ na̱ káchíñu tabernáculo Jehová. ¿Ndachun ki̱xa̱a̱ ta̱ loʼo Samuel xíʼinna ña̱ kachíñura nu̱ú Jehová, ta loʼoníra? Ná kotoyó vitin.

Tá ya̱chi̱ loʼoka, ñá Ana xi̱kusuchí-iniñá. Chi ñáyóʼo kútóoñá koo se̱ʼeñá, soo va̱ása kívi koona. Ta iin ki̱vi̱ ni̱xa̱ʼa̱nñá veʼe Jehová, ta ni̱ka̱ʼa̱nñá xíʼinra: ʼJehová koto kǒo sana-iniún xa̱ʼíi̱. Tá ná taxiún koo iin se̱ʼi̱, ta yi̱ʼi̱ taxii̱ra ndaʼún ña̱ kachíñura nu̱ún ndiʼi tiempoʼ.

Jehová xi̱niso̱ʼovara ña̱ ni̱ka̱ʼa̱nñá xíʼinra, tasaá ni̱ya̱ʼa tiempo ta ka̱kuva iin ta̱a loʼo se̱ʼeñá. Ta ma̱níní ni̱xi̱yoñá ta̱ loʼo yóʼo. Soo tá loʼokara ki̱xaʼáñá sánáʼa̱ñára xa̱ʼa Jehová. Ta ni̱ka̱ʼa̱nñá xíʼin yiíñá: ʼTá ná kuaʼnu loʼoka ta̱ loʼo yóʼo ta va̱ása kuniñúʼukara ña̱ kundai̱ra, saá kuʼi̱n ndakai̱ra veʼe Jehová ña̱ kachíñura nu̱úraʼ.

Ta nu̱ú na̱ʼná yóʼo xítoyó ña̱ ki̱xa̱a̱na xíʼinra. Xa̱ʼa ña̱ viíní sa̱náʼa̱na ta̱ loʼo yóʼo, ña̱kán kúsi̱íní-inira ña̱ kachíñura tabernáculo yóʼo nu̱ú Jehová. Ku̱i̱ya̱ tá ku̱i̱ya̱ va̱xi na̱ yivára ndásakáʼnuna Jehová tabernáculo yóʼo, ta saátu xítoniʼnina ta̱ Samuel loʼo se̱ʼena. Ku̱i̱ya̱ tá ku̱i̱ya̱ va̱xi iin ti̱ko̱to̱ ña̱ kǒo ndaʼa̱ ña̱ íxava̱ʼa ñá Ana xíʼinñá ña̱ kundixi ta̱ Samuel.

Yáʼa ku̱i̱ya̱ ku̱a̱ʼa̱nña, ta̱ Samuel ndákundeéra káchíñura tabernáculo Jehová, ta sákusi̱íra-ini Jehová xíʼin na̱ ñuu Israel. Soo ta̱ Hofní xíʼin ta̱ Finehás, na̱ se̱ʼe ta̱ su̱tu̱ káʼnu Elí, su̱ví na̱ va̱ʼa kúú na̱yóʼo. Chi nina ña̱ kini kéʼéna, ta sákunina inkana ña̱ keʼéna ña̱ kini nu̱ú Ndióxi̱. Ta̱ Elí xíniñúʼu tavára na̱yóʼo ña̱ va̱ása kookana su̱tu̱, soo va̱ása távárana.

Ta̱ loʼo Samuel kǒo táxira sándákava ndiʼi ña̱ kúú ini tabernáculo yóʼo inira ña̱ ndasakáʼnura Jehová. Xa̱ku̱a̱ʼání tiempo va̱ása káʼa̱n Jehová xíʼin ni iinna, chi si̱loʼova kúú na̱ xíniso̱ʼo ña̱ káʼa̱nra. Tá xa̱ʼnu loʼoka ta̱ Samuel, ña̱yóʼo ku̱u:

Ta̱ Samuel tá kísi̱ra ini tabernáculo xi̱niso̱ʼora kána iinnara, saá ndu̱kaxi-inira. Ta nda̱kuiinra: ʼYóʼo ndíka̱i̱ʼ. Ta xínura ni̱xa̱a̱ra nu̱ú ta̱ Elí, ta káchira: ʼÁ ka̱naún yi̱ʼi̱, chi yóʼo ki̱xa̱i̱ʼ.

Soo ta̱ Elí káchira: ʼKǒo níkanai̱ yóʼó, kuaʼán ku̱su̱únʼ. Tasaá ta̱ Samuel ku̱a̱ʼa̱nra ku̱su̱nra.

Tasaá tuku ka̱nana: ʼSamuelʼ, ta̱ Samuel nda̱koora ta ni̱xa̱a̱ tukura nu̱ú ta̱ Elí. ʼÁ ka̱naún yi̱ʼi̱, chi yóʼo ki̱xa̱i̱ʼ, káchira. Ta̱ Elí nda̱kuiinra: ʼVa̱ása níkanai̱ yóʼó, kuaʼán ku̱su̱únʼ. Tasaá ta̱ Samuel ku̱a̱ʼa̱nra ku̱su̱nra.

Tasaá yichi̱ u̱ni̱ tuku ka̱nana: ʼSamuelʼ, káchina. Ta̱ Samuel xínura ni̱xa̱a̱ra nu̱ú ta̱ Elí. ʼYóʼo ki̱xa̱i̱, vitin ndixa kúú ña̱ ka̱naún yi̱ʼi̱ʼ, káchira. Ta vitin na̱kunda̱a̱-ini ta̱ Elí, Jehová kúú ta̱ kánañaʼá. Ta ni̱ka̱ʼa̱nra xíʼin ta̱ Samuel: ʼKuaʼán ku̱su̱ún, tá ná kana tukuna yóʼó, ña̱yóʼo ndakuiún: “Ka̱ʼa̱n, Jehová, chi kuniso̱ʼovai̱ ña̱ ka̱ʼún”ʼ.

Ña̱yóʼo kúú ña̱ ni̱ka̱ʼa̱n ta̱ Samuel xíʼin Jehová tá ka̱na tukurara. Jehová ni̱ka̱ʼa̱nra xíʼin ta̱ Samuel ña̱ taxira castigo ndaʼa̱ ta̱ Elí xíʼin se̱ʼera. Loʼo tiempo ni̱ya̱ʼa ta ni̱xi̱ʼi̱va ta̱ Hofní xíʼin ta̱ Finehás tá ni̱xa̱ʼa̱nna ka̱nitáʼanna xíʼin na̱ ñuu Filisteo, tá na̱kunda̱a̱-ini ta̱ Elí ña̱ ni̱xi̱ʼi̱ na̱ se̱ʼera, iin saá ndu̱vara, ta ka̱ni xi̱níra nu̱ú ñuʼú ta ni̱xi̱ʼi̱ra. Tasaá ni̱xi̱nu nu̱ú tu̱ʼun ña̱ ni̱ka̱ʼa̱n Jehová xíʼin ta̱ Samuel.

Tá xa̱ʼnu ta̱ Samuel ni̱xa̱a̱ra ku̱ura iin juez. Tá ni̱xi̱ʼi̱ ta̱yóʼo kǒoka juez níxi̱yo ñuu Israel. Tá xa̱ku̱chéera, na̱ ñuu Israel ni̱ka̱ʼa̱nna xíʼinra: ʼNdukú iin ta̱ kuu rey ta̱ kaʼndachíñu nu̱úndi̱ʼ. Ta̱ Samuel kǒo kúni̱ra ndukúra inka rey, chi Jehová kúú rey ta̱ xáʼndachíñu nu̱úna. Soo Jehová ni̱ka̱ʼa̱nra xíʼin ta̱ Samuel ná kuniso̱ʼora ña̱ káʼa̱n na̱ ñuu xíʼinra.