OU KANIKE ua cili, ni vati? Lizina lieni Samuele. Uze yala na mu kuata ha mutue ikeye Eli, ua pua sasendote ua kama ua mu Isaleli. Ava va na neha Samuele kuli Eli va ise na naye, mazina avo Elekana na Hana.

Samuele a li lika na miaka iuana ni itanu. Vunoni neza mu ku kala oku ku tavenakulu ya Yehova, hamo na Eli kaha na vasasendote vakuavo. Vika via lingisa Elekana na Hana ku neha ou kanike ua mundende linga a ku pangele Yehova ku tavenakulu? Tu mone omo lia vika.

Mu na hiti miaka ya indende, Hana na kele mu vusiua vua kama, muomu ka semene, vunoni ua tondele cikuma-kuma ku kala na umo muana. Tangua limo omo Hana uezile ku tavenakulu ua vundilile kuli Yehova ngueni: ‘A Yehova, kati u nji suve! Nja likuminia nguange, Nga u nji hana muana, nji ka mu hana kuli ove linga a ka ku pangele mu muono ueni uose’.

Yehova ua halakana civundilo ceni, kaha mu nima ya vimo vingonde Hana ua semene Samuele. Hana ua lemene cikuma muaneni, kaha ua putukile ku mu longesa via Yehova tele a ci li ua mundende cikuma. Hana ua lekele yalieni ngueni: ‘Mua kola, nga na takamako kamandende, nji ka mu tuala ku tavenakulu linga a ka pangele Yehova’.

Ngeci mukemuo u li na ku mona aha ha fikula Elekana na Hana va na mu neha. Kaha muomu Samuele va mu longesele mua cili ku visemi vieni, na viukilila ngueni a hasa ku pangela Yehova kuno ku mbalaka ya Yehova. Muaka ku muaka Elekana na Hana ve kuiza mu ku lemesa oku ku mbalaka na kua ku meneka muanavo, kaha Hana ue ku mu hitika cikovelo, ce ku mu tongela muaka ku muaka.

Mu ku hita ca miaka, Samuele kasi a ci tualelelaho ku pangela ku tavenakulu ya Yehova, kaha Yehova na vantu va mu lemene cikuma. Vunoni Hofeni na Finehase, vana va sasendote ua kama, Eli, ka va puile vantu va cili. Va kele na ku linga viuma via ku pihia via vingi na ku  lingisa vakuavo ku muesa lisino kuli Yehova. Eli tele na pandele ku va fumisa ha vusasendote, vunoni ka va fumisile.

Samuele ka tavesele vupi vua vakuavo va kele navo ku tavenakulu, vu mu tangule ku pangela Yehova. Vunoni muomu vantu va vandende lika va lema mpundu Yehova, mua hiti ntsimbu ya kama fume ha handekelele Yehova na vantu. Omo Samuele na koloko kamandende, kua soloka evi:

Samuele ua kosele mu tavenakulu kaha lizi limo lia mu tungumuna. Ua tava ngueni: ‘Yange uno’. Kaha na hinduka na ku tuntila kuli Eli ngueni: ‘Ua nji sana ngeci nji neza’.

Vunoni Eli ngueni: ‘Ka nja ku sanene; hiluka u ka kose’. Kaha Samuele ua hilukile ha muhela.

Kaha lizi lia tambeka lua mu civali ngualio: ‘Samuele!’ Kaha Samuele ua niangumuka naua, ua tuntila kuli Eli. Ngueni: ‘Ua nji sana, yange uno’. Kaha Eli ngueni: ‘Ka nja ku sanene muanange. Ya u ka kose naua’. Ngeci ua hilukile.

Va mu tambakana naua lua mu citatu nguavo: ‘Samuele!’ Kaha ua hinduka, ua ya naua kuli Eli, ngueni: ‘Yange uno. Hano ni ua nji sana vene’. Amba vuose Eli na tantekeya ngueni nkuma Yehova ikeye a li na ku mu sana. Ngeci ua lekele Samuele ngueni: ‘Ya u ka kose naua lukuavo, nga lizi li hilukilaho ku ku sana, u ka kumbulula nguove: “Handeka, Yehova, muomu ngamba yove na halakana.”’

Kaha Samuele ua kumbuluile ngue muze mu va mu lekele omo Yehova ua mu sanene. Ngeci Yehova ua lekele Samuele ngueni amba a ka hana kasitiku kuli Eli na vana veni. Kaha mu nima ya ntsimbu, Hofeni na Finehase va ka tsililile ku ndzita mu va ka luile na vaFilisteo, kaha omo Eli ua tambuile ndzimbu yaco ua uile na ku vatuka ntsingo ngeci ua tsile. Mezi a Yehova a na lipuisilemo.

Samuele ua kolele, kaha uapua ngazi ua Isaleli. Omo Samuele na kulu, vantu va mu leka nguavo: ‘Tu hanguile muntu linga a pue muangana uetu.’ Samuele ka tondele ku linga ngecize, muomu muangana uavo mpundu ua pua Yehova. Vunoni Yehova ua mu leka ku linga cizango ca vantu.