Historia 55

Se telpokatsin kitekichiuilia toTajtsin

¿XMELAK ika kualtsin yejon telpokatsin? Itoka Samuel. Tlakatl akin kitlalijtika ima ipan itsontekon, yejua ueyi teopixki itech Israel, itoka Elí. Niman akin okiuikilijkej Elí yejuin telpokatsin yejuamej itajuan, Elqaná niman Ana.

Samuel kipiya san naui noso makuijli xiuitl. Maski ijkon, nikan chantis ipan itabernáculo Jehová iuan Elí niman oksekimej teopixkej. ¿Tleka Elqaná niman Ana okuajuikakej akin melak pitentsin ken Samuel makitekichiuiliki Jehová ipan tabernáculo? Matikitakan.

San seki xiuitl ijkuak xipanouaya yejuin, Ana noyolkokouaya. Pampa xueliya kipiaya ikoneuj, niman melak kinekiya kipiyas se. Kuakon, se tonajli ijkuak oyaj ipan itabernáculo Jehová, okijli: ‘¡Ay, Jehová, maka xnechilkaua! Tla tejua tinechmaka se nokoneuj, nejua nimitsmaktilis, niman ijkon mamitstekichiuili nochipa’.

Jehová okinankili iteoyouj Ana, niman san opanok seki metstli, okitlakatili Samuel. Ana melak kitlasojtlaya ikonetsin, niman opeuj kimachtia itech Jehová ijkuak pitentsin katka. Okijli iueuentsin: ‘Tla youeyiyak Samuel niman ijkuak xok nonekis maniktlajpiya, nikuikas ipan tabernáculo niman ijkon ompa makitekichiuili Jehová’.

Yejon tlen tikita kichiujtokej Ana niman Elqaná ipan tlaixkopinajli. Niman pampa itajuan melak kuajli okimachtijkaj Samuel, yejua melak paki pampa kitekichiuilia Jehová nikan ipan itabernáculo. Nochi xiujtin itajuan uajlauej nikan kuajueyichiuaj toTajtsin, niman kuajtlajpalouaj inkoneuj. Nochi xiujtin Ana kuajkuilia Samuel se tlakentli yenkuik tlen xmaueueyak.

Panouaj miyek xiujtin, niman Samuel ok kitekichiuilia Jehová ipan itabernáculo, kiyolpaktia Jehová niman israelitas. San ika, Hofní iuan Finehás, ikoneuan ueyi teopixki Elí, yejuamej xkuakualtin. Yejuamej kichiuaj miyek tlemach tlen xkuajli, niman noijki kichiuaj oksekimej maka makitlakamatikan toTajtsin. Maski noneki ika Elí maka makinkauili matekitikan kentla teopixkej, yejua xkichiua.

Telpochtli Samuel xnokauilia makijtlako nion se tlen xkuajli nochiua ipan tabernáculo niman ijkon maka sa makitekichiuili Jehová. Youejkaujka ika Jehová xkinotsaya nion se tlakatl, pampa achijtsitsintin akin yemelak kitlasojtlaj. Ijkuak Samuel noskaltia achijtsin, yejuin tlen panoua:

Samuel kochtika ipan tabernáculo niman kikaki se tlajtojli tlen kichiua matlachia. Yejua kinankilia: ‘Nikan ninemi’. Nimantsin nokuiteua niman yauj kampa nemi Elí, niman kijlia: ‘Otinechonots, niman nikan ninemi’.

Elí kijlia: ‘Nejua xonimitsonots, xuiya ipan motlapech’. Kuakon Samuel yauj ipan itlapech.

Ika okpa kinotsa: ‘¡Samuel!’ Kuakon Samuel nokuiteua niman yauj kampa Elí. ‘Otinechonots, niman nikan ninemi’, kijlia. Elí kinankilia: ‘Xonimitsonots, xuiya ipan motlapech’. Kuakon Samuel yauj kampa itlapech.

‘¡Samuel!’, kinotsa ika yexpa. Kuakon Samuel notlaloua niman yauj kampa Elí. ‘Nikan ninemi; aman kema otinechonots’, kijtoua. Aman Elí kimati ika Jehová akin kinotsa. Elí kijlia Samuel: ‘Oksejpa xuiya ipan motlapech, niman tla oksejpa mitsnotsa, noneki tikijtos: “Xtlajto Jehová, pampa motekipanojkauj mitskaki”’.

Niman yejon tlen Samuel kijtoua ijkuak Jehová kinotsa oksejpa. Jehová kijlia Samuel ika kitlajyouiltis Elí iuan ikoneuan. Sakin Hofní niman Finehás mikij ijkuak kimixnamikij filisteos, niman ijkuak Elí kikaki tlen opanok, uetsi, kechposteki niman miki. Ijkon nochiua itlajtol Jehová.

Samuel noskaltia, niman yejua ika otlamito jueces akin okinyekankej israelitas. Ijkuak ueuentsintia Samuel, israelitas kijliaj: ‘Xtlapejpeni se tekiuaj akin matechyekana’. Samuel xkineki, pampa Jehová yejua akin melak intekiuaj. San ika, Jehová kijlia makikaki tlen kijtouaj israelitas.

1 Samuel 1:1-28; 2:11-36; 3:1-18; 4:16-18; 8:4-9.