NAKAI kia ko e tama mata mitaki anei? Ko e higoa haana ko Samuela. Ko e tagata ne tuku e lima ke he ulu ha Samuela ko e ekepoa ne mua ko Eli ha Isaraela. Ko e matua taane ha Samuela a nā ko Elekana mo e matua fifine haana ko Hana ne tamai a Samuela ki a Eli.

Ko e liga fā po ke lima laia e tau ha Samuela. Ka e to nofo a ia hinei he faituga ha Iehova mo Eli mo e falu ekepoa. Ko e ha ne foaki age e Elekana mo Hana e taha ne tote lahi tuga a Samuela ke fekafekau ki a Iehova he faituga? O mai la ke kitia.

Ko e falu tau gahoa fakamua ato hoko e mena nei, ne momoko lahi a Hana. Kakano ha kua nakai maeke a ia ke fai tama, ti manako lahi mahaki a ia ke he taha tama. Ti hoko ke he taha aho ne ahiahi atu a Hana ke he faituga ha Iehova, ne liogi a ia: ‘Iehova na e, kia nakai nimo au! Ka foaki mai e koe e tama taane ma haaku, to mavehe au to foaki atu e au a ia ki a koe ke fekafekau a ia ki a koe ke he tau aho oti he haana a moui.’

Ne tali e Iehova e liogi ha Hana, mo e fai mahina he mole ti fanau e ia a Samuela. Ne fakaalofa hofihofi a Hana ke he tama taane tote haana, ti kamata ke fakaako a ia hagaao ki a Iehova he magaaho ne tote lahi agaia a ia. Ne tala age a ia ke he haana taane: ‘Magaaho ka lahi a Samuela ti nakai lata ke fakahuhu, to uta e au a ia ke he faituga ke fekafekau ki a Iehova i ai.’

Ko e mena hanei ne kitia e tautolu a Hana mo Elekana ne taute i loto he fakatino. Ha kua fakaako fakamitaki he tau mamatua ha Samuela a ia, kua fiafia a ia he maeke ke fekafekau ki a Iehova i ai, he fale ie ha Iehova. He tau tau takitaha ne o atu a Hana mo Elekana ke tapuaki ke he fale ie pauaki nei, mo e ke feleveia mo e tama taane tote ha laua. Mo e he tau tau takitaha ne tamai e Hana e tapulu loa foou ne ai fai lima ne taute e ia ma Samuela.

He loga e tau ne mole, ne fakatumau a Samuela ke fekafekau he faituga ha Iehova, ti fiafia a Iehova mo e tau tagata ki a ia. Ka ko e tau tama taane he ekepoa ne mua ko Eli, ko Hofeni mo Fineaso ne nakai mitaki. Ne loga e mena kelea ha laua ne taute, mo e fakaohooho e falu ke nakai omaoma foki ki a Iehova. Kua lata a Eli ke utakehe a laua mai he tuaga ko e tau ekepoa, ka e nakai taute pihia e ia.

Ne nakai fakaatā he tama ko Samuela e tau mena kelea ne tutupu he faituga ke taofi aki a ia he fekafekau ki a Iehova. Ha kua gahoa e tagata ne fakaalofa mooli ki a Iehova, kua leva tuai e nakai vagahau a Iehova ke he ha tagata. He lahi hake a Samuela, ne tupu e mena nei:

Ko Samuela hane mohe he faituga he magaaho ne ala a ia he logona e taha leo. Ne tali e ia: ‘Ko au hanai.’ Ti matike a ia mo e poi ki a Eli, mo e pehē: ‘Kua ui mai a koe ki a au, ko au hanai.’

Ka e tali a Eli: ‘Nakai ui atu au ki a koe, liu ke mohe.’ Ti liu a Samuela ke mohe.

Ti liu ui mai foki ke lagaua: ‘Samuela!’ Ti matike a Samuela mo e liu poi atu ki a Eli. ‘Kua ui mai a koe ki a au, hanai au,’ he talahau e ia. Ka e tali a Eli: ‘Nakai ui atu au ma mea. Liu ā ke takoto.’ Ti liu a Samuela ke mohe.

‘Samuela!’ he ui mai e leo ke lagatolu. Ti poi atu a Samuela ki a Eli. ‘Ko au hanai, ha ko e mena ui mai a koe ki a au he mogonei,’ he talahau e ia. Ne iloa e Eli he mogonei ko Iehova kua ui mai. Ti tala age a ia ki a Samuela: ‘Liu ke takoto, ka liu a ia ke ui mai foki, ti pehē a koe: “Kia vagahau ā a koe Iehova, ha kua fanogonogo atu haau a fekafekau.”’

Ne talahau pihia e Samuela he magaaho ne liu a Iehova ui atu. Ti tala age a Iehova ki a Samuela ko e fakahala ne fai e ia a Eli mo e tau tama taane haana. He magaaho fakamui ne mamate a Hofeni mo Fineaso he tau mo e tau Filisitia, ti ko e magaaho ne logona e Eli e mena ne tupu ne veli halatua a ia, mapaki e kakia ti mate foki. Ti kua fakamooli ni e kupu ha Iehova.

He lahi hake a Samuela, ne eke a ia mo fakafili fakahiku a Isaraela. Magaaho kua motua tuai a ia, ne ole e tau tagata ki a ia: ‘Kia fakatu e patuiki ke pule ki a mautolu.’ Nakai manako a Samuela ke taute e mena nei, ha ko Iehova ni e patuiki mooli ha lautolu. Ka kua tala age a Iehova ki a ia ke fanogonogo ke he tau tagata.