Ekitebyo 55

Omwojo Muto Okuheereza Ruhanga

OGU mwojo muto tarikureebeka gye? Eiziina rye ni Samueli. Kandi omushaija okwatsire aha mutwe gwa Samueli n’omunyamurwa omukuru Eli. Ogwo n’ishe Elukaana na nyina Hanna baretsire Samueli ahari Eli.

Samueli aine emyaka nk’ena nari etaano y’obukuru. Kwonka naija kutuura aha omu ihema rya Yehova na Eli hamwe n’abandi banyamurwa. Ahabw’enki Elukaana na Hanna babaasize kuhayo omwana muto atyo nka Samueli okuheereza Yehova omu ihema rye? Ka tureebe.

Hahingwireho emyaka mikye okwiha obu Hanna yaabaire aine obusaasi bwingi. Enshonga ekaba eri ngu akaba ataine mwana kandi obwo yaabaire namwenda munonga, munonga. Mbwenu eizooba rimwe Hanna obu yaabaire agiire omu ihema rya Yehova, akashaba ati: ‘Ai Yehova, otaanyebwa! Ku orimpa omwana w’omwojo, niinyija kumukuha akuheereze ebiro by’amagara ge goona.’

Yehova akagarukamu eshaara ya Hanna, kandi bwanyima y’ameezi kuhinguraho, Hanna akazaara Samueli. Hanna akaba naakunda omwana we muto ow’omwojo, kandi akatandika kumwegyesa ebirikukwata ahari Yehova obu yaabaire akiri muto munonga. Akagambira iba ati: ‘Samueli ku ariheza ati kukura kurungi atakyetenga kwonka, niinyija kumutwara omu ihema rya Yehova, amuheereze.’

Eki nikyo turikureeba Hanna na Elukaana barikukora omu kishushani. Kandi ahabw’okugira ngu Samueli akegyesibwa gye abazaire be, ashemereirwe okubaasa kuheereza Yehova omu ihema rye. Buri mwaka Hanna na Elukaana nibaija kuramya omu ihema eri ery’omutaano, kandi hamwe n’okutaayaayira omwana waabo w’omwojo. Kandi buri mwaka, Hanna naareetera Samueli akakooti kasya aku amukoreire.

Emyaka ku egyenda neehinguraho, Samueli aguma naaheereza omu ihema rya Yehova, kandi Yehova n’abantu bamukunda. Kwonka batabani ba Eli omunyamurwa omukuru, abarikwetwa Hofuni na Fenehaasi ti bantu barungi. Nibakora ebintu bibi bingi, kandi nibareetera abandi bantu nabo kugomera Yehova. Eli ashemereire kubaiha aha kukora nk’abanyamurwa, kwonka tarikukikora.

Samueli omwana muto tarikwikiriza ebintu bibi ebi ebirikukorerwa omu ihema kumuzibira kugumizamu naaheereza Yehova. Kwonka ahabw’okugira ngu abantu bakye buzimazima nibakunda Yehova, hahweireho obwire okwiha obu Yehova yaahereruka kugamba n’omuntu weena. Samueli ku yaayeyongyeireho kukura, eki nikyo kyabaireho:

Samueli ku yaabaire ari omu ihema agwejegyeire, ahurira eiraka ririkumwimutsya. Agarukamu ati: ‘Ndi aha!’ Kandi aimuka airuka aza ahari Eli, amugira ati: ‘Naija ndi aha, ahakuba waanyeta.’

Kwonka Eli amugira ati: ‘Tinaakweta; garukayo obyame.’ N’ahabw’ekyo Samueli agarukayo abyama.

Bwanyima y’ebyo habaho okwetwa kwa kabiri: ‘Samueli!’ Atyo Samueli aimuka ashuba airuka aza ahari Eli amugira ati: ‘Naija ahakuba waanyeta.’ Kwonka Eli amugira ati: ‘Tinaakweta mwana wangye. Garukayo obyame.’ Samueli agaruka omu kitanda.

Eiraka rishuba ryeta omurundi gwa kashatu riti. ‘Samueli!’ N’ahabw’ekyo Samueli agaruka ahari Eli. Kandi amugira ati: ‘Naija ahabw’okuba mbwenuho waanyeta.’ Eli hati amanya ngu aine kuba ari Yehova oriyo naamweta. N’ahabw’ekyo agambira Samueli ati: ‘Irooko ogarukye obyame, kandi ku araashube kweta, ogire oti: “Gamba, Yehova, ahakuba omuheereza waawe ahurire.”’

Okwo nikwo Samueli yaagarukiremu Yehova ku yaagarukire kweta. Yehova atyo yaagambira Samueli ngu naaza kufubira Eli n’abatabani. Bwanyima Hofuni na Finehaasi bafeera omu rugamba rwabo na Abafilistia, kandi Eli ku ahurira ebyabaho, agwa ahansi, ahendeka ebisya nawe afa. Bityo ebigambo bya Yehova bihikiirira.

Samueli akura, kandi aba omuramuzi ow’aha muheru omuri Israeli. Ku akura, abantu bamushaba bati: ‘Tuteereho omugabe w’okututegyeka.’ Samueli tarikwenda kukora eki, ahakuba buzimazima Yehova niwe mugabe waabo. Kwonka Yehova amugambira okuhurikiriza ebi abantu baamugambira.

1 Samueli 1:1-28; 2:11-36; 4:16-18; 8:4-9.