KAKULA ɛhye anwo yɛ fɛ kpalɛ, ɔnle zɔ ɔ? Bɛfɛlɛ ye Samoɛle. Yizilayɛma ɛsɔfo kpanyinli Yilae a ɛva ɔ sa yedo Samoɛle ati zo la. Samoɛle ɔ ze Ɛlekana nee ɔ nli Hana yɛɛ ɛlɛfa Samoɛle arɛlɛ Yilae la.

Samoɛle ɛli ɛvolɛ kɛyɛ nna anzɛɛ nnu. Noko akee ɔ nee Yilae nee ɛsɔfoma mɔɔ ɛha la badɛnla Gyihova ɛzonlenlɛ sua ye anu. Duzu ati a Ɛlekana nee Hana bava kakula ekyi le kɛ Samoɛle la kɛ ɔrazonle wɔ Gyihova ɛzonlenlɛ sua ne anu ɛ? Maa yɛnlea.

Ɛvolɛ ekyi mɔɔ ɛze ɛhɔ la ɛ ɛnee Hana arɛle ɛbɔ. Ɔboalekɛ ɛnee ɔnwo, na ɛnee ɔlɛkpondɛ ralɛ kpalɛ kpalɛ. Yemɔti kenle ko mɔɔ Hana hɔle Gyihova ɛzonlenlɛ sua ne anu la, ɔzɛlɛle kɛ: ‘O Gyihova, mmamaa ɛ rɛle fi me! Mebɔ wɔ ɛwɔkɛ kɛ saa ɛmaa menyia ralɛ a mebava ye meamaa wɔ amaa yeazonle wɔ dahuu.’

Gyihova diele Hana nzɛlɛlɛ ne, ɔti mekɛ ekyi guale nu la ɔwole Samoɛle. Hana hulole ɔ ra ekyi ne edwɛkɛ, na ɔbɔle ɔ bo kɛ ɔkile ye Gyihova anwo edwɛkɛ mekɛ bɔbɔ mɔɔ ɛnee ɔtɛde ekyi la. Ɔzele ɔ hu kɛ: ‘Saa Samoɛle pɛ nyɛfonlɛ na ɔ nwo kputi a mebava ye meahɔ ɛzonlenlɛ sua ne anu na yeazonle Gyihova wɔ ɛkɛ ne.’

Ɛhye a Hana nee Ɛlekana ɛlɛyɛ ye wɔ nvoninli ne anu la. Ɔluakɛ Samoɛle awovolɛ ɛhilehile ye kpalɛ la ati, ɔ nye ɛlie kɛ ɔbahola yeazonle Gyihova wɔ Gyihova ɛzonlenlɛ sua ne anu. Ɛvolɛ biala Hana nee Ɛlekana basonle wɔ ɛdanlɛ sua titile ɛhye anu, na bɛkpɔla bɛ ra nrenya ekyi ne. Na ɛvolɛ biala Hana fa aguzo mɔɔ yekpomgba la ɔbɛlɛ Samoɛle.

Samoɛle hɔle zo zonlenle wɔ Gyihova ɛzonlenlɛ sua ne anu, na Gyihova nee menli ne hulole ye edwɛkɛ. Noko ɛsɔfo kpanyinli Yilae amra mrenya Hɔfenae nee Fenɛhaze ɛnle kpalɛ fee. Bɛyɛ ninyɛndane dɔɔnwo, na bɔbɔ bɛtwehwe awie mɔ bɛmaa bɛyɛ Gyihova anwo anzosesebɛ. Ɛnee ɔwɔ kɛ Yilae ye bɛ fi ɛsɔfo ɛlile ne azo, noko akee yeanyɛ ye zɔ.

Kakula Samoɛle ammaa ninyɛndane mɔɔ ɛnee ɔlɛkɔ zo wɔ ɛzonlenlɛ sua ne anu la anzi ye aze wɔ Gyihova ɛzonlenlɛ nwo. Noko ɔluakɛ menli ekyi bie a ɛnee lɛ Gyihova anwo ɛhulolɛ la ati, ɛnee Gyihova nee dasanli dendɛle la ɛhyɛ kpalɛ. Mekɛ mɔɔ Samoɛle nyinli ekyii la mɔɔ ɔzile la ɛne:

Ɛnee Samoɛle ɛlafe wɔ ɛzonlenlɛ sua ne anu na ɛnelɛ bie manle ɔdunwuele. Ɔbuale kɛ: ‘Mewɔ ɛke.’ Ɔdwazole na ɔnriandile ɔhɔle Yilae ɛkɛ ne, na ɔhanle kɛ: ‘Ɛvɛlɛle me, mera.’

Na Yilae zele ye kɛ: ‘Metɛfɛlɛle wɔ na kɔla.’ Yemɔti Samoɛle ziale hɔlale.

Ɛnelɛ ne rale mɔɔ tɔ zolɛ nwiɔ la kɛ: ‘Samoɛle!’ Yemɔti Samoɛle dwazole na ɔnriandile ɔhɔle Yilae ɛkɛ. Ɔzele ye kɛ: ‘Ɛvɛlɛle me, mame ɛne!’ Noko Yilae buale ye kɛ: ‘Me ra, metɛfɛlɛle wɔ. Sia kɔla bieko.’ Ɔti Samoɛle ziale hɔlale.

Ye fane nsa ne azo ɛnelɛ ne vɛlɛle bieko: ‘Samoɛle!’ Eza Samoɛle dwazole na ɔhɔle Yilae anwo ɛkɛ. Na ɔhanle ɔhilele ye kɛ: ‘Mera, ɔluakɛ ɛvɛlɛle me.’ Yilae nwunle kɛ Gyihova yɛɛ ɛlɛfɛlɛ ye a. Yemɔti ɔzele Samoɛle kɛ: ‘Kɔ kɔla bieko, na saa ɔfɛlɛ wɔ bieko a, ka kɛ: “Gyihova, tendɛ na wɔ sonvolɛ ɛlɛtie.”’

Ɛhye yɛɛ Samoɛle yɛle wɔ mekɛ mɔɔ Gyihova vɛlɛle ye bieko la. Akee Gyihova hanle hilele Samoɛle kɛ ɔbadea Yilae nee ɔ mra ne mɔ. Amozii Hɔfenae nee Fenɛhaze wule wɔ mekɛ mɔɔ bɛ nee Filisitiama ɛlɛko la, na Yilae dele amaneɛ ne la ɔdɔle aze, na ɔ kɔme bule na ɔdaye noko ɔwule. Ɔti Gyihova edwɛkɛ ne rale nu pɛpɛɛpɛ.

Samoɛle yɛle kpanyinli, na ɔrayɛle Yizilayɛ ndɛnebuavolɛ mɔɔ li awieleɛ. Mekɛ mɔɔ ɔyɛle ɛrelera la, menli ne zele ye kɛ: ‘Ye sonla maa ɔli yɛ nwo zo belemgbunli.’ Samoɛle angulo kɛ ɔkɛyɛ ɛhye, ɔluakɛ ɛnee Gyihova a le bɛ belemgbunli a. Noko Gyihova zele ye kɛ ɔdie menli ne.