¿HÄNGE xa mähotho nuni rä zi bätsi? Rä thuhu Samuel. Nuni ñꞌo̱ho̱ xä yꞌe̱ntsꞌi rä yꞌe̱ ha rä ñäxu rä Samuel, gehni rä däta majhä ha Israel, rä thuhu Eli. Rä Samuel di ñꞌoui rä dada rä thuhu Elkanä, ꞌne rä nänä rä thuhu Anä. Nuyu̱ bä tsoogi rä Samuel ko rä Eli.

Rä Samuel pe̱ꞌtsi ngu goho o ku̱tꞌa nje̱ya. Pe ma dä mꞌu̱ ko rä Eli ꞌne ko nuꞌu̱ märꞌa yä majhä ha rä tabernäkulo Jeoba. ¿Por hanja rä Elkanä ꞌne rä Anä bi zitsꞌi nꞌa rä zi tꞌu̱kä metsi ngu rä Samuel pa dä me̱päbi Jeoba ha rä tabernäkulo? Ma gä handihu̱.

Hixki thogi ndunthi yä je̱ya nuꞌmu̱ rä Anä xa mi turämu̱i. Ngeꞌä xa mi ne dä me̱ꞌtsi nꞌa rä bätsi pe himi tsa. Nꞌa rä pa, nuꞌmu̱ rä Anä bi ma ha rä tabernäkulo Jeoba, bä xatuäbi Jeoba ꞌne bi ꞌñembi: “¡Ay Jeoba, ogi pumfrigi! Mu̱ gi rꞌakägi nꞌa mä tꞌu̱, di juraꞌi ge ma gä rꞌaꞌi pa njabu̱ dä mpe̱fi pa geꞌi gatꞌho nuꞌu̱ yä pa ma dä mꞌu̱i”.

Jeoba bi dädi näꞌä rä sadi rä Anä, ꞌne mi thogi rꞌa yä zänä, bi mꞌu̱i Samuel. Rä Anä xa mi mädi rä zi tꞌu̱, ꞌne dende mrä zi ꞌue̱ne bi mu̱di bi ꞌñuti de rä Zi Dada Jeoba. Rä Anä bi ꞌñembäbi rä däme: “Xti hye̱gi rä ꞌma rä Samuel ꞌne ya hindä hyongägi, ma gä tsitsꞌi ha rä tabernäkulo pa ja dä me̱päbini Jeoba”.

Ja ngu di handihu̱ ha rä kꞌoi, geꞌä bi me̱fi rä Anä ꞌne rä Elkanä. Rä Samuel xa mi johya dä me̱päbi Jeoba ha rä tabernäkulo, ngeꞌä njabu̱ xki ꞌñuti yä dada. Tatꞌä je̱ya rä Elkanä ꞌne rä Anä mi pa mi xo̱kämbeni Jeoba ha rä tabernäkulo, ꞌne mi kꞌäni rä zi tꞌu̱. ꞌNe tatꞌä je̱ya rä Anä mi hätsꞌi nꞌa rä rꞌayꞌo hee mrä doyꞌe̱ xki hyoki pa rä Samuel.

Bi thogi yä je̱ya, rä Samuel mi sigi mi pe̱päbi Jeoba ha rä tabernäkulo. Jeoba ꞌne nuꞌu̱ yä jäꞌi de näꞌä rä hnini mi numäñho rä Samuel. Pe rä Ofni ꞌne rä Fineas, nuꞌu̱ yä tꞌu̱ rä Eli, mñä tsꞌomꞌu̱i. Nuyu̱ mi pe̱fi yä tsꞌo tꞌo̱tꞌe, ꞌne mi japäbi märꞌa hindä yꞌo̱te Äjuä. Rä Eli, pe̱ꞌtsi te xä hñäkuäbihmä nuꞌu̱ yä nsu mi pe̱ꞌtsi de gä majhä nuꞌu̱ yä tꞌu̱, pe himbi jabu̱.

Rä bäsjäꞌi Samuel, himbi hyopi ge nuꞌu̱ yä tsꞌo tꞌo̱tꞌe mi handi ha rä tabernäkulo, xä japi xä hye̱gi de dä me̱päbi Jeoba. Po ndunthi yä je̱ya, Jeoba hixki nzofo nꞌa rä jäꞌi, ngeꞌä tsꞌu̱tho nuꞌu̱ yä jäꞌi xa mäjuäni mi mädi Jeoba. Mi te rä Samuel, gehnä bi thogi:

Rä Samuel mi ähä ha rä tabernäkulo pe bi nuhu nuꞌmu̱ bi yꞌo̱de ge mi tsꞌofo. Rä Samuel bi dädi: “Xi di ꞌmakua”. Bi nangi ꞌne bi nextꞌi habu̱ mi ähä rä Eli, ne bi ꞌñembi: “Gä nzokägi, xi di ꞌmakua”.

Pe rä Eli bi dädi: “Nuga hindä nzoꞌäꞌi; pengi guä ähä”. Hänge rä Samuel bi mengi ha rä ähä.

Pe mänꞌaki rä Samuel bi yꞌo̱de toꞌo mi enä: “¡Samuel!”. Hänge rä Samuel bi nangi ꞌne bi ma mänꞌaki ha mi ähä rä Eli, ꞌne bi ꞌñembi: “Gä nzokägi, xi di ꞌmakua”. Pe rä Eli bi dädi: “Mä zi tꞌu̱ꞌi, hinä hindä nzoꞌi. Pengi guä ähä”. Hänge rä Samuel bi mengi ha rä ähä.

Po rä hñuu rä mꞌiki, rä Samuel bi yꞌo̱de toꞌo mi embi: “¡Samuel!”. Hänge rä Samuel bi nangi ꞌne bi nextꞌi pa habu̱ mi ähä rä Eli, ne bi ꞌñembi: “Nubye̱ hää gä nzokägi, xi di ꞌmakua”. Nubye̱ rä Eli bi bädi ge Jeoba go geꞌä mi nzofo rä Samuel. Hänge bi ꞌñembäbi rä Samuel: “Gi ma guä ähä, ꞌne mu̱ dä nzoꞌäꞌi mänꞌaki, pe̱ꞌtsi gi ꞌñenä: «Ñä Jeoba, ri ꞌme̱go o̱de»”.

Geꞌä bi dädi rä Samuel nuꞌmu̱ bi ñä Jeoba mänꞌaki. Jeoba bi ꞌñembi rä Samuel ge ma xä kastiga rä Eli ꞌne nuꞌu̱ yä tꞌu̱. Mꞌe̱fa, rä Ofni ꞌne rä Fineas bi du nuꞌmu̱ bi ntuhni ko yä filisteo. Mi yꞌo̱de rä Eli näꞌä xki thogi nuꞌu̱ yä tꞌu̱, bi dagi bi tehmi rä tsꞌibdo ꞌne bi du. Njabu̱, bi kumpli näꞌä xki mängä Jeoba.

Rä Samuel bi te, ꞌne geꞌä rä gäxä nzaya bi mꞌu̱ ha Israel. Mi zi ndäta jäꞌi rä Samuel, rä hnini Israel bi ꞌñembi: “Hyoni nꞌa rä ndä pa dä mändagihe”. Rä Samuel himi ne, ngeꞌä mi pädi ge Jeoba go geꞌä mi mända. Pe Jeoba bi ꞌñembi rä Samuel ge dä ja näꞌä mi adi näꞌä rä hnini.