ESEI no ta un nèchi mucha hòmber? Su nòmber ta Samuel. I e hòmber ku tin su man poné riba kabes di Samuel ta sumo saserdote Elí di Israel. E otro hendenan ta Elkana, tata di Samuel, i su mama Ana ku a hiba Samuel serka Elí.

Samuel tabatin rònt di kuater òf sinku aña di edat so. Pero el a bai pa biba ei na e tabernakel di Yehova huntu ku Elí i e otro saserdotenan. Pakiko Elkana i Ana a ofresé un mucha asina hóben manera Samuel pa sirbi Yehova na e tabernakel? Laga nos mira.

Djis un par di aña promé ku esei, Ana tabata masha tristu. E motibu di su tristesa tabata ku e no por a haña yu, i e tabata ke un yu masha hopi mes. P’esei un dia ora Ana tabata bishitá e tabernakel di Yehova, el a pidi: ‘O Yehova, no lubidá mi! Si bo duna mi un yu hòmber, mi ta primintí ku lo mi duna bo e pa e sirbi bo henter su bida.’

Yehova a kontestá e orashon di Ana, i algun luna despues el a duna lus na Samuel. Ana a stima su yu i a kuminsá siñ’é tokante Yehova ora ku e tabata chikitu ainda. Ana a bisa su kasá: ‘Asina ku Samuel tin edat ku mi no tin ku kri’é na pechu mas, lo mi hib’é na e tabernakel pa e sirbi Yehova einan.’

Esei ta loke nos ta mira Ana i Elkana ta hasi riba e plachi. I dor ku Samuel su mayornan a siñ’é asina bon, el a keda kontentu di por sirbi ei na Yehova su tènt. Tur aña Ana i Elkana tabata bini pa adorá Dios na e tènt spesial ei, i pa bishitá nan yu. I tur aña Ana tabata trese un mantel nobo sin manga ku el a traha pa Samuel.

Segun ku añanan a pasa, Samuel a sigui sirbi na e tabernakel di Yehova, i tantu Yehova komo e pueblo a gust’é. Pero Ofni i Finees, e yunan di Sumo Saserdote Elí, tabata mal hende. Nan tabata hasi hopi kos malu, i a pone otronan tambe desobedesé Yehova. Elí mester a kita nan for di nan puesto di saserdote, pero e no a hasié.

E hóben Samuel no a laga ningun di e mal kosnan ku a sosodé na e tabernakel hasié bandoná e sirbishi di Yehova. Pero pa motibu ku asina poko hende realmente a stima Yehova, pa hopi tempu Yehova no a papia ku hende. Ora ku Samuel a bira poko mas grandi, esaki ta loke a sosodé:

Samuel tabata drumí den e tabernakel ora ku un bos a lant’é for di soño. El a kontestá: ‘Ata mi aki. El a lanta i a kore bai serka Elí, i a bis’é: ‘Elí a yama mi, i ata mi aki.’

Pero Elí a kontestá: ‘Mi no a yama bo; bai drumi bèk.’ P’esei Samuel a bolbe bai drumi.

Anto tabatin un segundo yamada: ‘Samuel!’ P’esei Samuel a lanta i atrobe el a kore bai serka Elí. Samuel a bisa: ‘Elí a yama mi, i ata mi aki.’ Pero Elí a kontestá: ‘Mi no a yama bo, mi yu; bai drumi atrobe.’ P’esei Samuel a bolbe bai drumi.

Anto pa di tres bes e bos a yama, ‘Samuel!’ P’esei Samuel a kore bai serka Elí. El a bisa: ‘Ata mi aki, pasobra Elí mester a yama mi e biaha aki sí.’ Awor Elí tabata sa ku mester ta Yehova tabata yam’é. P’esei el a bisa Samuel: ‘Bai drumi un biaha mas, i si e yama bo atrobe, bo mester bisa: “Papia, Yehova, pasobra bo sirbidó ta skucha.”’

Esei ta loke Samuel a bisa ora Yehova a yama atrobe. Anto Yehova a bisa Samuel ku lo e kastigá Elí i su yunan. Mas despues Ofni i Finees a muri den bataya kontra e filisteonan, i ora Elí a tende loke a sosodé, el a kai ku lomba kibra su nèk i a muri tambe. Asina e palabra di Yehova a wòrdu kumplí.

Samuel a bira grandi i a bira e último hues di Israel. Ora el a bira bieu, e pueblo a pidié: ‘Skohe un rei pa goberná riba nos.’ Samuel no tabata ke hasi esei, pasobra realmente ta Yehova tabata nan rei. Pero Yehova a bis’é pa skucha e pueblo.

1 Samuel 1:1-28; 2:11-36; 4:16-18; 8:4-9.