55 yachachiy

Juk yuqallitu Diosta kasukun

¿MANACHU kay yuqallitu kʼachitu? Payqa Samuel sutikun. Umanpi mankinta churaqri, Israelmanta kuraq kaq sacerdote, Elí. Kay yuqallituta tatan Elcana, maman Ana ima Elipman apamunku.

Samuelqa 4 chayri 5 watitayuqlla karqa. Chaywanpis, Jehovap tantakuna toldoman Eliwan, sacerdoteswan ima, tiyakuq rirqa. ¿Imaraykutaq Elcana Anawan, chaypi Jehovap munasqanta ruwananpaq juchʼuysitumantapacha Samuelta pusanku? Qhawarina imaraykuchus.

Manaraq Samuel nacekuchkaptin, Anaqa may llakisqa kachkarqa. Payqa wawayuq kayta munarqa, manataq wawayuq kayta atirqachu. Chayrayku llakikuspa, juk pʼunchay tantakuna toldoman rispa, mañakurqa: ‘¡Ay, Jehová, ñuqamanta yuyarikuway! Juk wawata quwanki chayqa, chay wawataqa qupusqayki, tukuy kawsayninpi kamachiyki kananpaq’, nispa.

Jehová Anata uyarirqa. Chayrayku Anaqa Samuelta nacechikurqa. Anaqa wawitanta munakun, chayrayku, uñitamantapacha Jehovamanta yachachiyta qallarirqa. Qusanta nirqa: ‘Maykʼaqchus Samuel sapitallanña kawsakuyta atiptin, chay pacha Jehovap kamachin kananpaq pusasaq’, nispa.

Dibujopi Ana Elcanawan chayta ruwachkanku. Samuelqa, tatasnin allinta yachachisqankurayku, Jehovap wasinpi llamkʼasqanmanta mayta kusikurqa. Tatasninqa, sapa wata Jehovata yupaychaqjina, Samuelta watukuq riq kanku. Sapa watataq, Anaqa juk musuq pʼachitata ruwaspuspa, Samuelpaq apapuq.

Samuelqa, wiñarisqanmanjina Jehovap wasinpi llamkʼachkallanpuni, jinamanta Jehovawan, llaqtawanpis allinpaq qhawachikun. Sacerdotep Elip churisnin Ofni, Finees ima, mana kʼacha runaschu karqanku. Paykunaqa mana allin kaqta ruwaq kanku, wak runastapis Diosta mana kasukunankupaq tanqarqanku. Eliqa, paykunata sacerdociomanta wikchʼunan karqa, manataq wikchʼurqachu.

Wayna Samuelqa, Diospa wasinpi saqra ruwaykunawan mana apachikurqachu, Jehovata yupaychallaqpuni. Jehovaqa unayña mana piwanpis parlarqachu, payta mana munakusqanrayku. Samuel astawan wiñariptintaq, paywan parlarqa:

Samuel Diospa wasinpi puñuchkaptin, pichá waqyasqanta uyarispa rikchʼarirqa. ‘Kaypi kachkani’, nispataq kutichin. Chaymanta Elipman usqhayta rispa nirqa: ‘Kaypi kachkani, ¿imapaqtaq waqyawankiri?’, nispa.

Chaymanta watiqmanta waqyallantaq: ‘¡Samuel!’, nispa. Chayrayku Samuel sayarispa, watiqmanta Elipman kutillantaq: ‘Kaypi kachkani, ¿imapaqtaq waqyawankiri?’, nispa. Elitaq kutichin: ‘mana ñuqa waqyarqaykichu, waway. Puñukamullay’, nispa. Samueltaq watiqmanta puñukamun.

Juktawan ‘¡Samuel!’, nispa waqyallantaq, kaywanqa kimsa kutiña. Chayrayku Samuelqa usqhayta Elipman rin. ‘Kaypi kachkani; kunanqa waqyawankipunichá’, nispa. Eliqa kunanraq, Jehová Samuelta waqyachkasqanta repararqa. Chayrayku Samuelta nirqa: ‘Riy, puñukamullay, watiqmanta waqyasuptin, jinata ninayki tiyan: “Parlallay Jehová, kay kamachiykiqa uyarichkasunki”, nispa’.

Jehová watiqmanta waqyaptintaq, Samuelqa Elí nisqanmanjina kutichirqa. Jehovataq Elita churisnintawan jasutʼisaq, nispa willarqa. Chaymanta tumpamantawan, Ofni Fineeswan filisteoswan maqanakuchkaspa wañunku, Elí chayta uyarispaqa urman, kunkanta qʼiwikuspataq wañurqa. Jinamanta Jehová parlasqan juntʼakun.

Samuelqa wiñaspa, Israelpa qhipa kaq juezninman tukun. Machuyaptintaq, israelitas nirqanku: ‘Juk reyta akllapuwayku, kamachinawaykupaq’, nispa. Samuelqa Jehová rey kasqanrayku mana chayta munarqachu. Chaywanpis Jehovaqa, israelitasta uyarinanta nirqa.

1 Samuel 1:1-28; 2:11-36; 4:16-18; 8:4-9.