CHAWILAMPEʼ ri jun jeʼlikalaj (tzʼoʼy) alaj akʼal ubʼiʼ Samuel. Ri achi tijan kuya uqʼabʼ pa ujolom are ri ajkojol tabʼal toqʼobʼ rech Israel, ubʼiʼ Elí. Jachin xkekʼam lo ri akʼal are ri utat ubʼiʼ Elqaná rukʼ ri unan ubʼiʼ Ana.

Samuel xiw kʼo kajibʼ o jobʼ ujunabʼ. Tekʼuriʼ kkanaj kan pa ri tabernáculo che upatanexik ri Jehová kukʼ ri Elí xuqujeʼ ri nikʼaj chik ajkojol tabʼal toqʼobʼ. ¿Suche ri Elqaná rukʼ ri Ana xkekʼam lo jun alaj ala Samuel rech kupatanej ri Jehová pa ri tabernáculo? Chqilampeʼ.

Kebʼ oxibʼ junabʼ nabʼe che wariʼ, Ana sibʼalaj kbʼisonik. Rumal che kkun täj kkʼeje ral, tekʼuriʼ sibʼalaj kraj jun ral. Rumal laʼ chiʼ xopan pa ri utabernáculo rech Jehová, xubʼij wariʼ pa chʼawem che: ‹¡Ay, Jehová, xaq minsach pa ajolom! We kaya jun wal, kintzujuj che kinya chawe, rech katupatanej pa ronojel ukʼaslemal›.

Jehová xuta ri uchʼawem ri Ana, xqʼax kebʼ oxibʼ täq ikʼ tekʼuriʼ xalax ri Samuel. Ana sibʼalaj kuloqʼoqʼej ri alaj ral, tekʼuriʼ xok che ukʼutik chirij ri Jehová che, chiʼ alaj na. Are wariʼ xubʼij che ri rachajil: ‹Chiʼ ri Samuel kʼo chi kebʼ oxibʼ ujunabʼ, chiʼ kinajawtaj ta chik che, kinkʼam bʼi pa ri tabernáculo rech kupatanej ri Jehová chilaʼ›.

Are laʼ kqilo tijan kkebʼan Ana rukʼ Elqaná pa ri wachbʼäl. Xuqujeʼ rumal che utat unan xkekʼut ri utzij ri Ajawaxel che Samuel, rumal laʼ sibʼalaj kkikotik rumal che kupatanej ri Jehová pa ri rachoch. Ronojel täq junabʼ keʼopan ri Elqaná rukʼ Ana che uyaʼik uqʼij ri Ajawaxel pa wajun loqʼalaj ja, xuqujeʼ kekilaʼ ri alaj kalkʼwal. Ronojel junabʼ Ana kukʼam bʼi jun kʼakʼ atzʼyaq ubʼanom rech Samuel.

Xeqʼax ri junabʼ tekʼuriʼ ri Samuel tijan kupatanej ri Jehová pa ri tabernáculo, rumal wariʼ kkikotik ri Jehová xuqujeʼ ri tinamit. Tekʼuriʼ Hofní rukʼ Finehás, ri ukʼojol ri ajkojol tabʼal toqʼobʼ ubʼiʼ Elí, e itzel täq winaq. Xkebʼan kʼi itzelal, xuqujeʼ xkebʼano che e nikʼaj chik winaq xeniman ta che ri Ajawaxel. Rajawaxik che Elí keʼuresaj che ajkojol tabʼal toqʼobʼ, tekʼuriʼ xubʼan ta wariʼ.

Ri Samuel xuya täj che nijun che wa täq itzelal tijan kbʼan pa ri tabernáculo kubʼan che, che kuya kan upatanexik ri Jehová. Tekʼuriʼ qʼaxnäq chi kʼi täq qʼij che ri Jehová xchʼaw ta chi kukʼ ri winaq, rumal che kʼi ri winaq che qastzij täj kkeloqʼoqʼej. Chiʼ Samuel xkʼiyik, are waʼ xbʼantajik:

Ri Samuel tijan kwar pa ri tabernáculo chiʼ xuta jun chʼabʼal tijan kuwalasaj. Samuel xubʼij wariʼ: ‹In kʼo waral›. Xwalajik tekʼuriʼ xbʼe chanim rukʼ Elí, xubʼij wariʼ che: ‹Xinasikʼij, in kʼo chi waral›.

Tekʼuriʼ Elí xubʼij wariʼ: ‹In täj xatinsikʼij; chattzalij pa chʼat›. Rumal laʼ ri Samuel xtzalij pa uchʼat.

Tekʼuriʼ xsikʼix chi che ukamul: ‹¡Samuel!› Rumal laʼ Samuel xwalajik xtzalij chi rukʼ Elí. ‹Xinasikʼij, inkʼo chi waral›, xchaʼ. Tekʼuriʼ Elí xubʼij che: ‹Xatinsikʼij täj, nukʼojol. Chattzalij pa chʼat›, xchaʼ che. Rumal laʼ xtzalij chi kʼu Samuel pa uchʼat.

‹¡Samuel!› Xchaʼ chi ri chʼabal pa urox mul. Rumal laʼ Samuel xbʼe chi chanim rukʼ ri Elí. ‹Waral inkʼo wi; kimik at xinasikʼij›, xchaʼ chik. Kimik Elí xretaʼmaj che are ri Jehová jachin tijan kusikʼij ri Samuel. Xubʼij wariʼ che Samuel: ‹Chattzalij pa chʼat, tekʼuriʼ we katusikʼij chik, are rajawaxik kabʼij wariʼ: Chatchʼawoq, Jehová, rumal che ri apatinel tijan katuto›.

Are waʼ xubʼij Samuel chiʼ Jehová xusikʼij chi jumul. Jehová xubʼij che Samuel, che kukʼajsaj na kiwäch ri Elí rukʼ ri kebʼ ukʼojol. Tekʼuriʼ, Hofní rukʼ Finehás xekam pa chʼoj kukʼ ri filisteos, chiʼ Elí xuta wariʼ, xtzaqik xuqujeʼ xqʼaj ri uqul, rumal wariʼ xkamik. Rukʼ wariʼ xbʼan su xubʼij Jehová.

Ri Samuel xkʼiyik xuqujeʼ xubʼan kʼisbʼal juez rech Israel. Chiʼ xubʼan riʼj winaq, ri tinamit xkebʼij wariʼ che: ‹Chachaʼ jun ajawinel rech kubʼan qʼatbʼaltzij pa qawiʼ›, xechaʼ. Samuel xraj täj, rumal che are Jehová ri qastzij ajawinel chike. Rumal laʼ Jehová xubʼij che Samuel che kuta ri kubʼij ri tinamit.