LABARIK kiʼik neʼe bonitu, loos ka lae? Nia naran Samuel. Mane neʼebé tau ninia liman iha Samuel nia ulun mak Izraél nia amlulik boot, Eli. Iha Samuel nia sorin mak ninia aman Elcana no inan Ana, no sira lori Samuel mai Eli.

Samuel tinan haat ka lima deʼit. Maibé, nia sei hela iha neʼe, iha Jeová nia tabernákulu hamutuk ho Eli no amlulik sira seluk. Tanbasá mak Elcana no Ana fó labarik kiʼik hanesan Samuel atu serbí Jeová iha tabernákulu? Mai ita haree.

Tinan balu liubá Ana triste tebes, tanba nia la bele iha oan, no nia hakarak tebetebes oan ida. Loron ida, bainhira Ana vizita Jeová nia tabernákulu, nia harohan: ‘Oh Jeová, labele haluha haʼu! Se Ita fó oan-mane ida mai haʼu, haʼu promete katak haʼu sei fó nia ba Ita hodi serbí Ita ho ninia moris tomak.’

Jeová hatán Ana nia orasaun, no fulan balu tuirmai nia hahoris Samuel. Ana hadomi ninia oan kiʼik neʼe, no hanorin nia kona-ba Jeová maski nia sei kiʼik. Ana hatete ba nia laʼen: ‘Kuandu Samuel boot no bele haketak susu ona, haʼu sei lori nia ba tabernákulu hodi nia bele serbí Jeová iha neʼebá.’

Iha dezeñu ita bele haree Ana no Elcana halo nuneʼe. No tanba sira hanorin didiʼak Samuel, nia kontente atu bele serbí Jeová iha neʼe, iha Jeová nia tenda. Tinan-tinan Ana no Elcana mai tenda espesiál neʼe atu adora, no atu vizita sira-nia oan kiʼik. No tinan-tinan Ana halo faru neʼebé la iha liman no lori ba Samuel.

Nuʼudar Samuel sai boot, nia serbí nafatin Jeová iha tabernákulu. Jeová no povu gosta nia. Maibé, amlulik boot Eli nia oan-mane Hofni no Finéas la diʼak. Sira halo aat barak, no mós halo ema seluk atu la halo tuir Jeová. Eli tenke hasai sira husi serbisu nuʼudar amlulik, maibé nia la halo nuneʼe.

Samuel la husik buat aat neʼebé akontese iha tabernákulu hapara nia atu serbí Jeová. Maibé, tanba ema uitoan deʼit hadomi loos Jeová, kleur ona Jeová la koʼalia ho ema ida. Bainhira Samuel boot uitoan, ida-neʼe mak akontese:

Kuandu Samuel toba iha tabernákulu, iha lian ida fanun nia. Samuel hatán: ‘Haʼu mak neʼe.’ Nia hadeer no halai toʼo Eli, no hatete: ‘Bolu haʼu, no haʼu mak neʼe.’

Maibé Eli hatán: ‘Haʼu la bolu ó; bá toba fali.’ Nuneʼe, Samuel bá toba fali.

Depois, iha lian bolu ba dala rua: ‘Samuel!’ Nuneʼe Samuel hadeer no halai toʼo Eli dala ida tan. Nia hatete: ‘Bolu haʼu, no haʼu mak neʼe.’ Maibé Eli hatán: ‘Haʼu la bolu, haʼu-nia oan. Toba fali.’ Nuneʼe, Samuel bá fali ninia toba-fatin.

Lian neʼe bolu ba dala tolu: ‘Samuel!’ Nuneʼe Samuel halai ba Eli. Nia hatete: ‘Haʼu mak neʼe, tanba Ita-Boot bolu duni haʼu dala ida-neʼe.’ Agora, Eli hatene katak Jeová mak bolu. Tan neʼe, nia hatete ba Samuel: ‘Bá toba fali, no se lian neʼe bolu fali, ó tenke dehan: “Koʼalia mai, Jeová, tanba Ita-nia atan rona.”’

Samuel koʼalia duni hanesan neʼe kuandu Jeová bolu fali. Depois, Jeová fó-hatene Samuel katak nia sei fó kastigu ba Eli no Eli nia oan sira. Ikusmai, Hofni no Finéas mate iha funu ho ema Filístia sira, no kuandu Eli rona kona-ba ida-neʼe nia monu, nia kakorok tohar, no nia mós mate. Nuneʼe, Jeová nia liafuan sai loos.

Samuel sai boot, no sai Izraél nia juis ikus. Kuandu nia katuas ona, povu husu nia: ‘Hili liurai ida atu ukun ita.’ Samuel lakohi halo hanesan neʼe, tanba tuir loloos Jeová mak sira-nia liurai. Maibé Jeová haruka nia atu rona ba povu.