55-нҗи хекая

Кичиҗик оглан Худая гуллук эдйәр

БУ ОГЛАНҖЫК нәхили мәхирли, шейле герек? Онуң ады Самуел. Башыны сыпалап дуран адам болса, Ысрайылың баш руханысы Эли. Самуелиң янындакылар какасы Элкана билен эҗеси Ханна. Олар Самуели Элиниң янына гетирдилер.

Самуел такмынан дөрт-бәш яшында. Эмма ол Эли ве башга руханылар билен Ехованың чадырында яшар. Йөне Элкана билен Ханна нәме үчин кичиҗик Самуели Ехова гуллук этмәге берйәркә? Гел, билели.

Мундан бирнәче йыл өң, Ханна өрән гынаныпды. Себәби онуң чагасы ёкды. Ынха, бир гезек Ханна Ехованың чадырына гелип: «Эй Ехова! Мени ядыңа сал! Эгер-де сен маңа огул берсең, мен оны хемишелик саңа гуллук этмәге берерин» дийип дога эдйәр.

Ехова Ханнаның догасына җогап берйәр. Бирнәче айдан Самуел атлы оглы боляр. Ханна оглуны гаты сөййәрди, ол энтек кичикә Ехова барада өвредип башлаяр. Ол адамсына: «Самуел бираз өсүп сүйтден айрыландан соң, мен оны Ехованың чадырында гуллук этмәге берерин» диййәр.

Суратда Элкана билен Ханнаның Самуели чадыра гетирен вагты гөркезилипдир. Самуел ата-энесинден говы тербие аландыгы үчин, Ехованың чадырында гуллук эдйәнине бегенйәр. Хер йыл Ханна билен Элкана Ехова сежде этмек ве оглуны гөрмек үчин чадыра гелйәрлер. Хер гезек Ханна Самуел үчин тәзе еңсиз көйнек гетирйәр.

Йыллар гечйәр. Самуел хенизем Ехованың чадырында гуллук эдйәр, оны адамлар хем, Ехова хем сөййәр. Эмма баш руханы Элиниң огуллары Хофни хем Пинахас эрбет адамларды. Олар көп эрбет ишлери эдйәрлер ве башгалары-да Худайың кануныны боздурҗак болярдылар. Эли олары руханылык везипесинден айырмалыды, эмма ол айырмаяр.

Чадырда эдилйән эрбет ишлериң хич бири-де, етгинҗек Самуели Ехова гуллук этмекден сакламаяр. Ехованы йүрекден сөййән адамлар азды, шонуң үчинем узак вагтлап Ехова хич ким билен гүрлешмейәр. Самуел бираз улаланда шейле вака боляр.

Самуел чадырда уклап ятанда, оны бир сес ояряр. «Мен бәрде» дийип, ол Элиниң янына ылгаяр. Ол: «Сен мени чагырдыңмы? Мен бәрде» диййәр.

Эли: «Мен сени чагырмадым, гит-де ят» диййәр. Самуел-де ятмага гидйәр.

Шонда сес икинҗи гезек: «Самуел!» дийип чагыряр. Самуел ене-де туруп, Элиниң янына ылгаяр. Ол: «Сен мени чагырдыңмы, мен бәрде» диййәр. Эмма Эли: «Оглум, мен сени чагырмадым, гит-де ят» диййәр. Самуел ене-де ятмага гидйәр.

Үчүнҗи гезек сес: «Самуел!» дийип чагыряр. Самуел үчүнҗи гезек Элиниң янына ылгаяр. Ол: «Мен бәрде, мегерем, шу гезег-ә сен мени чагырансың» диййәр. Шонда Эли оны Ехованың чагырандыгына дүшүнйәр. Шонуң үчин Самуеле: «Гит-де, ене-де ят. Эгер-де ол сени ене-де чагырайса, онда сен: «Ехова, айдыбер, чүнки сениң гулуң сени диңлейәр» дийип җогап бер» диййәр.

Ехова оны ене-де чагыранда, Самуел шейле хем эдйәр. Шонда Ехова Элини ве онуң огулларыны җезаландырҗакдыгыны Самуеле айдяр. Бирнәче вагт геченсоң, филистилилер билен сөвешде, Хофни ве Пинахас өлйәр. Эли бу хабары эшиденде йыкыляр ве бойны оңрулып өлйәр. Шейдип Ехованың сөзи берҗай боляр.

Самуел улаланда, Ысрайылың иң соңкы казысы боляр. Ол хас улаланда халк Самуеле: «Бизиң үстүмизден хөкүм сүрер ялы, бизе патыша сайлап бер» диййәр. Самуелиң муны эдеси геленок, себәби аслында оларың патышасы Еховады. Йөне Ехова оңа халка гулак асмагы буюряр.

1 Патышалар 1:1—28; 2:11—36; 4:16—18; 8:4—9.