¿ANKE jel tsamal ja yal kerem it? Sbʼiʼil Samuel. Sok ja winik maʼ yaʼunej kajan ja skʼabʼ ja bʼa yolomi jaʼa mero olomal ja bʼa tabernáculo, sbʼiʼil Elí. Ja matik yiʼonejejan ja yal kerem ja bʼay ja Elí jaʼa snantati, ja Elqaná soka Ana.

Kechanto chane ma joʼe jabʼil yiʼoj ja Samuel. Sok tixa ni oj ekʼyuj ja sakʼanil bʼa stabernáculo ja Jyoba sok ja Elí soka tuk olomaliki. ¿Jas yuj yiʼojejan ja Elqaná soka Ana jun yal kerem jelto nux, jastal Samuel, bʼa oj yaʼteltay ja Jyoba bʼa tabernáculo?

Jabʼilik bʼajtanto jani, ja Ana jelni tristeʼaya. Jani yuja yeʼn mi x-ajyi yala al soka yeʼn wani skʼana lek oj ajyuk yuj june. Ja yuj, jun kʼakʼu yajni wan ulatanel ja bʼa stabernáculo ja Jyoba, yaʼ yi orasyon: «¡Ah, Jyoba, mok chʼayuk akʼujol bʼa keʼna! Ta awaki jun kal, ojni kawi bʼa jachuk ja yeʼn oj yaʼteltaya bʼa spetsanil ja sakʼanili».

Jyoba smaklani ja yorasyon ja Ana, sok jujuntik ixaw tsaʼan, ja yeʼn ajyiyuj ja Samuel. Ja Ana jelni syajtay ja yal skeremi sok kʼe sjeʼ yi bʼa yabʼal ja Jyoba yajni yal nuxto. Yala yabʼ ja statami: «Yajni ja Samuel staʼa xa tʼusan skʼiʼelal sok mixa skʼana stalnajel, oj kiʼoch bʼa tabernáculo bʼa oj waj yaʼteltay tiw ja Jyoba».

Jani it ja wa xkilatik wane skʼulajel ja Elqaná soka Ana bʼa dibujo. Yujni ja snan stat sjeʼuneje yi lek ja Samuel, ja yeʼn jelni gustoʼay bʼa oj yaʼteltay ja Jyoba ja bʼa stabernáculo. Jabʼil jabʼil, ja snan stati wa xjak skʼap-e yi majtanal ja Jyoba ja bʼa stabernáculo sok bʼa yulatajel ja yal skeremeʼi. Ana skʼulunejan yi jun yajkʼachil spal kʼu mey skʼajbʼil sbʼaja Samuel.

Ekʼ ja jabʼiliki, ja Samuel tini wan yaʼteltajel ja Jyoba bʼa stabernáculo. Yuja jastik wa skʼulani wa sjeʼa jelni syajtay ja Jyoba soka chonabʼi. Pe ja Hofní soka Finehás, ja skeremtik ja mero olomal, ja Elí, mini lekuke. Ja yeʼnleʼi wa skʼulane jastik junuk bʼa mi lekuk sok chomajkil wa skʼulane ja tuki a-skʼok-e ja smandar ja Dyosi. Ja Elí ojni bʼobʼ ya eluk ja bʼa cholal yiʼoje bʼa olomali, pe ja yeʼn mini skʼulana.

Anima yuja jastik junuk mi lekuk wan kʼulaxel ja bʼa tabernáculo, ja kerem Samuel mini xyaʼakan yaʼteltajel ja Jyoba. Jitsan xa tyempo ja Jyoba mixa ni bʼa wa skʼuman jun winik yujni jel tʼusan ja ixuk winik wa syajtaye meran ja Jyoba. Yajni Samuel kʼi tʼusan smoj, jaʼa it ja jasa ekʼi.

Samuel tini wan wayel bʼa tabernáculo yajni yujkesji yuj jun kʼumal. Ja yeʼn sjakʼa: «It bʼayonjula». Weʼgo kʼeʼi sok waj ajnel ja bʼay ja Elí sok yala: «Ja kʼumanon, sok it bʼayonjula».

Pe ja Elí sjakʼa: «Ja keʼn me xkʼumana; kumxan bʼa wa chʼat». Ja yuj ja Samuel kumxi ja bʼa xchʼati.

Anto ja kʼumali yala pilan ekʼele: «¡Samuel!». Ja yuj ja Samuel cha kʼeʼi sok waj ja bʼaya Elí sok yala: «Ja kʼumanon, sok it bʼayonjula». Pe ja Elí yala: «Kala kerem, me xpayawa. Ka xwayan». Ja Samuel cha kumxi bʼa xchʼat.

Cha kʼumaji bʼa yoxil ekʼele: «¡Samuel!». Ja Samuel cha waj ajnel ja bʼay ja Elí sok yala: «It bʼayonjula; ja ekʼele it wa kʼumanonxaniʼa». Ja Elí snaʼaxa ni jaʼa Jyoba ja maʼ wan kʼumajel yuji sok yala yabʼ ja Samuel: «Cha ka xwayan, ta yeʼn kʼumani, oja wal jachuk: “Ala, Jyoba, ja wa aʼtijumi wa smaklaya”».

Jachʼni skʼulan ja Samuel yajni Jyoba skʼuman pilan ekʼele. Jyoba yala yabʼ ja Samuel ayni jas oj ya ekʼ sbʼaj ja Elí soka skeremtiki. Tsaʼan ja Hofní soka Finehás chamye yajni wane tiroʼanel soka tantik filisteoʼiki, sok yajni yabʼ ja Elí ja jasa ekʼi, mokʼi, kʼok ja snukʼi sok chami. Jachʼ kʼot ja jas yalunej ja Jyoba.

Samuel kʼiʼi sok yeʼn waj ja tsaʼan xta jwes ja bʼa israʼelenyo. Yajni awelaxi, ja chonabʼi yala yabʼ: «Tsaʼa jun mandaranum bʼa oj yaʼotikon mandar». Samuel mini skʼanaʼa yujni jaʼa Jyoba ja mandaranum bʼa yeʼnle. Pe ja Jyoba yala yabʼ ja Samuel a-skʼuʼuk yi ja chonabʼi.