A HI mufanyana wo saseka loyi ke? A vito gakwe hi Samueli. Ni wanuna loyi a tlhatekileko canja gakwe laha hlokweni ya Samueli hi Eli a mupristi wa hombe wa Israeli. Gayani hi Elkana a raru wa Samueli zinwe na Hana a mamani wakwe na va neha Samueli ka Eli.

Samueli i na ni tanga ya mune kutani ntlhanu wa malembe ntsena. Hambulezo yena i ta hanya zinwe na Eli laha ka tabernakeli ga Jehova ni vanwani vapristi. Hikuyini Elkana na Hana va nyikelako a munhu a ha hiko nwanana nguvu lezaku a tirela Jehova laha tabernakelini ke? A hi woneni.

Malembe matsongwani ntsena mahlweni ka lezo Hana i wa kari a karateka nguvu. A xigelo hi lezaku i wa nga zi koti kuva ni nwanana, kuveni yena i wa mu lava nguvu futsi. Hi kota ya lezo a siku go kari laha Hana a nga kari a enzela a tabernakeli ga Jehova, i lo khongela aku: ‘O Jehova, u nga nzi rivali! Loku u nzi nyika a nwanana wa mufana, nza tsumbisa ku ngalo nzi ta mu nyikela ka wena lezaku a ku tirela wutomini gakwe gontlhe.’

Jehova i lo ingisa a mukhongelo wa Hana, zonake loku ku hunzile tihweti to kari yena i lo pswala Samueli. Hana i lo ranza a mufanyana wakwe, a tlhela a sangula a ku mu gonzisa hi Jehova na a ha hi mutsongwani nguvu. Yena i lo byela nuna wakwe ku ngalo: ‘Neti Samueli a kulanyana laha ka kuza a nga ha lavi a ku anwiswa kambe, nzi ta mu yisa le tabernakelini kasi ku ya tirela Jehova kwaseyo.’

Lezo hi zona hi zi wonako na zi mahiwa hi Hana na Elkana laha mufananisweni. Ni lezaku kota lezi Samueli a gonzisilweko khwatsi hi vapswali vakwe, yena wa tsaka hi ku zi kota a ku tirela Jehova laha tendeni Gakwe. A lembe ni lembe Hana na Elkana vata a ku ta khozela laha tendeni legi go hlawuleka, ni kuta kamba a mufanyana wabye. Niku lembe ni lembe Hana i neha a nghanjwana ya yiswa yo kala mawoko leyi a yi rungeleko Samueli.

Laha a malembe ma hunzako, Samueli i simama a ku tira le tabernakelini ga Jehova, zonake Jehova zinwe ni vanhu va mu ranza. Kanilezi a vana va mupristi wa hombe Eli, Hofeni na Fineasi, a hi va nene. Vona va maha zilo zo tala zo biha, va tlhela va maha lezaku vanwani va nga ingisi Jehova na vonawu. Ku wa laveka lezaku Eli a va susa ntirweni wa wupristi, kanilezi yena a nga mahi lezo.

Munhu muswa Samueli a nga vumeli a ku ni xinwe xa zilo zo biha lezi zi mahekako laha tabernakelini zi mu tsikisa a ku tirela Jehova. Kanilezi kota lezi ku nga ni vanhu vatsongwani nguvu lava hakunene va ranzako Jehova, ku hunza xikhati xo leha na Jehova a nga wulawuli ni vanhu. Laha Samueli a kulako a maha wa hombenyana ku maheka lezi:

Samueli i etlele lomu tabernakelini laha a gezu go kari gi mu vuxako. Yena i hlamula aku: ‘Nzi laha.’ A sekeleka a tsutsuma aya ka Eli, a yaku: ‘U nzi vitanile, nzi laha.’

Kanilezi Eli i hlamula aku: ‘A nzi ku vitanangi; tlhela u ya etlela.’ Hikwalaho Samueli i tlhela a ya etlela.

Zonake kuta a kuvitana ka wumbiri: ‘Samueli!’ Zalezo Samueli i sekeleka kambe a tsutsuma aya ka Eli. Yena a yaku: ‘U nzi vitanile, nzi laha.’ Kanilezi Eli a hlamula aku: ‘A nzi ku vitanangi, nwananga. Etlela kambe.’ Lezo Samueli i tlhela a ya etlela.

‘Samueli!’ A gezu gi vitana a khati ga wunharu. Hikwalaho Samueli i tsutsuma aya ka Eli. A yaku: ‘Nzi laha, hakuva a ka xikhati lexi u sina u nzi vitanile.’ Eli makunu i tiva lezaku ku ngava Jehova loyi a vitanako. Hizalezo yena i byela Samueli ku ngalo: ‘Famba u ya etlela kambe, kasi loku a tlhela a vitana, u taku: “Wulawula, Jehova, hakuva a nanza ga wena ga ingisa.”’

Lezo hi zona a wulako Samueli loku Jehova a tlhela a vitana. Zalezo Jehova i byela Samueli lezaku i ta tsayisa Eli ni vana vakwe. Loku ku hunzile xikhati kufa Hofeni na Fineasi le kulweni ni vaFilistia, ni laha Eli a zwako lezi zi humeleleko iwa lahasi, a tshoveka nhamu yakwe afa na yenawu. Hizalezo a gezu ga Jehova gi maha ga lisine.

Samueli i kula, a maha mulamuli wo gumesa wa Israeli. Laha a khosahalako, a vanhu va mu kombela vaku: ‘Hlawula a hosi lezaku yi hi rangela.’ Samueli a nga zi lavi ku maha lezo, hakuva Jehova hi yena hakunene a nga hosi yabye. Kanilezi Jehova i ngalo i wa ingise vanhu.