КАНДЫГ кончуг чаптанчыг бичии оол боор, ындыг-дыр бе? Ооң адын Самуи́л дээр. А Самуи́лдиң бажын суйбап турар кижи — израильчи дээди бараалгакчы И́лий-дир. Чанында Самуи́лдиң ачазы Елка́на биле авазы А́нна тур, олар Самуи́лди И́лийге эккелгеннер.

Самуи́л чүгле дөрт-беш хире харлыг. Ынчалза-даа ол Иегованың чадырынга И́лий болгаш өске бараалгакчылар-биле кады чурттаар. Ынчаарга Елка́на биле А́нна чадырга Иеговага бараалгаар кылдыр, чүге ындыг чаш Самуи́лди берип турарыл? Билип алыылам, че.

Элээн каш чыл бурунгаар А́нна дыка муңгарап турган. Ооң ажы-төлү чок болган, а ол дыка ажы-төлдүг болуксаан болгай. Бир хүн А́нна Иегованың чадырынга келгеш: ‘О! Иегова, мээң дугайымда сактып келем! Бир эвес сен меңээ оол бээр болзуңза, ону сеңээ кезээ шагда бараалгаар кылдыр бериптер мен’,— деп мөргээн.

Иегова А́ннаның мөргүлүнге харыылаан, ынчангаш каш ай болганда ол Самуи́л деп оолду божупкан. А́нна бодунуң оглуңга дыка ынак турган, ынчангаш ол көңгүс бичии турда-ла, ону Иегованың дугайында өөредип эгелээн. Ашаанга ол мынча дээн: ‘Самуи́л бичии өзүп кээри билек, эмигден үндүрген соонда, ону Иеговага бараалгаар кылдыр чадырже аппаар мен’.

Елка́на биле А́нна Самуи́лди эккелген таптыг-ла ол үени чурукта көргүскен. Самуи́лди ада-иези дыка эки кижизиткен болгаш, ол маңаа, Иегованың чадырынга, Иеговага бараалгап болуру дээш, дыка өөрүп турар. Чыл санында А́нна биле Елка́на чадырга чүдүүр дээш, база оглу-биле ужуражыр дээш кээп турар. Чыл санында А́нна Самуи́лге чеңи чок чаа хеп эккеп берип турар.

Чылдар эртип турар: Самуи́л ол-ла хевээр Иегованың чадырында бараалгап турар, ынчангаш кижилер болгаш Иегова аңаа ынак. Ынчалза-даа дээди бараалгакчы И́лийниң оолдары: Офни биле Финеес — багай улус-тур. Олар хөй багай чүүлдер кылып, өске улусту Иегованы дыңнавазынче чыгап турар. И́лий оларны бараалгакчы ажылындан үндүрер ужурлуг, ынчалза-даа ол ону кылбайн турар.

Чадырга кылдынган чаңгыс-даа багай чорук элээди Самуи́лди Иеговага бараалгаарындан тургуспаан. Эвээш кижилер Иеговага шын сеткилинден ынак, ынчангаш Иегова үр үе дургузунда кижилерден кым-биле-даа чугаалашпайн турар. Кажан Самуи́л бичии өзүп кээрге, дараазында чүүл болган:

Самуи́л чадырда удуп чыдырда, ону үн оттурган. ‘Бо мен,— деп, ол харыылаан, оон туруп келгеш, И́лийге халып чеде берген.— Сен мени кыйгырдың — бо-дур мен’.

— Сени кыйгырбадым; барып уду,— деп, И́лий харыылаан. Самуи́л удуур дээш чорупкан.

Ынчан үн ийи дугаарында кыйгырып: ‘Самуи́л!’ — дээн. Самуи́л туруп келгеш, база катап И́лийге халып чеде берген. ‘Сен мени кыйгырдың — бо-дур мен’,— деп, ол чугаалаан. Ынчалза-даа И́лий харыылаан: ‘Мен сени кыйгырбадым, оглум. Барып чыдып ал’. Самуи́л база катап удуур дээш чорупкан.

— Самуи́л!— деп, үн үш дугаар кыйгырган. Самуи́л үш дугаар И́лийге халып четкен. ‘Бо-дур мен — бо удаада сен мени ылап-ла кыйгырган боор сен’,— деп, ол чугаалаан. Самуи́лди Иегова кыйгырып турар боор деп, ынчан И́лий билип каапкан. Ынчангаш ол Самуи́лге чугаалаан: ‘Баргаш катап чыдып ал, а бир эвес ол катап кыйгырар болза, сен мынчаар харыыла: „Чугаала, Иегова, чүге дээрге сээң чалчаң дыңнап тур“’.

Кажан Иегова катап ону кыйгырыптарга, Самуи́л ынчалдыр кылган. Ынчан Иегова И́лийни болгаш ооң оолдарын шиидер мен деп Самуи́лге дыңнаткан. Элээн үе эрткенде Офни биле Финеес филисти́мчилер-биле тулчуушкунда өлгеннер, а И́лий ооң дугайында дыңнааш, аңдарлып кээп үшкеш, мойнун сыйгаш, база өлген. Ынчалдыр Иегованың сөстери бүде берген.

Самуи́л өзүп келген база Иегованың сөөлгү шииткекчизи апарган. Кажан ол улуг кижи апаарга, чон: ‘Бисти башкарар кылдыр хаандан шилип берем’,— деп дилээн. Самуи́л ону кылыр хөңнү чок, чүге дээрге херек кырында оларның хааны — Иегова-дыр. Ынчалза-даа Иегова аңаа чонну дыңнаарын дужааган.