DIRI ba gwapo ini nga bata nga lalaki? Samuel an iya ngaran. Ngan an tawo nga nakapot han iya ulo amo an hitaas nga saserdote han Israel nga hi Eli. Ini an tatay ni Samuel nga hi Elkana ngan an iya nanay nga hi Hana nga nagdara ha iya kan Eli.

Mga kwatro o singko anyos pa la hi Samuel. Kondi maukoy na hiya dinhi ha tabernakulo ni Jehova upod ni Eli ngan han iba nga saserdote. Kay ano nga ihahatag nira Elkana ngan Hana an usa nga bata pa gud sugad kan Samuel basi mag-alagad kan Jehova ha tabernakulo? Aton kitaon.

Pipira pa la ka tuig antes hito, duro an kasubo ni Hana tungod kay karuyag gud niya magkaanak, pero diri hiya nagkakaanak. Salit usa ka adlaw, han kinadto hi Hana ha tabernakulo ni Jehova, hiya nag-ampo: ‘O Jehova, ayaw ako hingalimti! Kon tagan mo ako hin anak nga lalaki, nagsasaad ako nga ihahatag ko hiya ha imo basi mag-alagad ha imo ha iya bug-os nga kinabuhi.’

Ginbaton ni Jehova an pag-ampo ni Hana, ngan paglabay hin pipira ka bulan igin-anak niya hi Samuel. Hinigugma gud ni Hana an iya anak, ngan han minasus-an pa la ito, gintutdoan niya ito mahitungod kan Jehova. Nagsiring hiya ha iya bana: ‘Kon malutas na hi Samuel, dadad-on ko hiya ha tabernakulo basi mag-alagad kan Jehova didto.’

Makikita naton dinhi ha retrato nga ini an ginbuhat nira Hana ngan Elkana. Ngan tungod kay gintutdoan hin maopay hi Samuel han iya mga kag-anak, malipayon gud hiya ha pag-alagad dinhi ha tabernakulo ni Jehova. Kada tuig, napakanhi hira Hana ngan Elkana basi magsingba dida hini nga tabernakulo, ngan basi bisitahon an ira gutiay nga anak. Ngan kada tuig, nagdadara hi Hana hin waray pako nga bado nga iya ginhimo para kan Samuel.

Ha damu nga katuigan, padayon nga nag-alagad hi Samuel ha tabernakulo ni Jehova, ngan hinigugma gud hiya ni Jehova ngan han katawohan. Kondi salbahis an mga anak ni Eli nga hira Hopni ngan Pinehas. Damu an ira ginbubuhat nga maraot, ngan gin-aaghat nira an iba nga diri liwat sumunod kan Jehova. Sadang unta hira paiwason ni Eli ha pagin saserdote, kondi waray niya buhata ito.

An maraot nga ginbubuhat ha tabernakulo waray makapugong ha batan-on nga hi Samuel ha pag-alagad kan Jehova. Kondi tungod kay diri damu nga tawo an nahigugma kan Jehova, maiha na nga panahon nga waray makiistorya Hiya ha bisan hin-o nga tawo. Han durodaku na hi Samuel, ini an nahitabo:

Nakaturog hi Samuel ha tabernakulo han ginpukaw hiya han usa nga tingog. Hiya binaton: ‘Iini ako.’ Ngan binuhat hiya ngan dinalagan ngadto kan Eli, ngan nagsiring: ‘Gintawag mo ako, ngan iini ako.’

Kondi hi Eli binaton: ‘Waray ko ikaw tawaga; katurog utro.’ Salit kinaturog utro hi Samuel.

Katapos, gintawag na liwat hiya: ‘Samuel!’ Salit binuhat hi Samuel ngan dinalagan utro ngadto kan Eli. ‘Gintawag mo ako, ngan iini ako,’ siring niya. Kondi hi Eli binaton: ‘Waray ko ikaw tawaga, anak ko. Katurog utro.’ Salit binalik hi Samuel ha iya higdaan.

‘Samuel!’ an tingog nagtawag ha ikatulo ka beses. Salit hi Samuel dinalagan ngadto kan Eli. ‘Iini ako kay gintawag mo ako,’ siring niya. Hito nga higayon, nasantop ni Eli nga hi Jehova an nagtatawag. Salit nagsiring hiya kan Samuel: ‘Katurog utro, ngan kon tawagon ka niya utro, masiring ka: “Pagyakan, Jehova, kay namamati an imo surugoon.”’

Ini an ginsiring ni Samuel han gintawag hiya utro ni Jehova. Katapos, ginsumatan hiya ni Jehova nga sisirotan Niya hi Eli ngan an iya mga anak. Paglabay han panahon, namatay hira Hopni ngan Pinehas ha pakig-away ha mga Pilisteohanon, ngan han hinbatian ni Eli an nahitabo, natumba hiya, nabari an iya liog ngan namatay liwat. Salit natuman gud an mga pulong ni Jehova.

Nagdaku hi Samuel, ngan nagin ultimo nga hukom han Israel. Han lagas na hiya, an katawohan naghangyo ha iya: ‘Pagpili hin hadi nga magmamando ha amon.’ Diri karuyag ni Samuel nga buhaton ini tungod kay hi Jehova an ira hadi. Kondi ginsidngan hiya ni Jehova nga pamatian niya an katawohan.