HISITOLIA 55
Ko Te Kiʼi Tama Veliveli ʼe Tauhi Ki Te ʼAtua
ʼE MOLE talavou koa la te kiʼi tama veliveli ʼaenī? ʼE higoa ko Samuele. Pea ko te tagata ʼaē ʼe ina hili tona nima ki te ʼulu ʼo Samuele, ʼe ko te pelepitelo lahi ʼo Iselaele ʼaē ko Elia. Neʼe ko Elekana te tāmai ʼa Samuele pea mo tana faʼe ia Ana ʼaē neʼe nā ʼaumai ia Samuele kia Elia.
Neʼe ko te taʼu fā pe ko te taʼu nima pe ʼaia ʼo Samuele. ʼE nofo anai ʼi te tapenakulo ʼo Sehova mo Elia pea mo te tahi ʼu pelepitelo. He koʼe neʼe foaki e Elekana pea mo Ana te kiʼi tama veliveli ko Samuele ke tauhi kia Sehova ʼi te tapenakulo? Tou vakaʼi pe koteā tona tupuʼaga.
ʼI he ʼu taʼu ki muʼa atu, neʼe lotomamahi ʼaupito ia Ana, koteʼuhi neʼe mole feala ke ina maʼu hana tamasiʼi, pea neʼe lotomamahi ke ina maʼu hana tamasiʼi. Koia, ʼi te tahi ʼaho neʼe ʼalu ai ia Ana ki te tapenakulo ʼo Sehova, pea neʼe faikole fēnei: ‘Ê Sehova, manatuʼi ʼau! Kapau ʼe ke foaki mai haku tamasiʼi tagata, pea ʼe ʼau fakapapau atu ʼe ʼau foaki atu anai maʼa koe, ke feala hana tauhi kia te koe ʼi tona maʼuli katoa.’
Neʼe tali e Sehova te kole ʼa Ana, pea ʼi he ʼu māhina ki muli age pea ina fānauʼi ia Samuele. Neʼe ʼofa ia Ana ki tana kiʼi tama, pea neʼe ina akoʼi ia ia ʼo ʼuhiga mo Sehova ka kei meamea. Neʼe ina ʼui age ki tona ʼohoana: ‘ ʼI te temi ʼaē ʼe mole kei ʼaoga ai ke ʼau fakahuhu ia Samuele, ʼe ʼau ʼave anai ia ia ki te tapenakulo ke ʼalu ʼo tauhi kia Sehova.’
Ko te meʼa ʼaia neʼe fai e Ana pea mo Elekana ʼaē ʼe tou sio kiai ʼi te paki. Pea ʼi te lelei ʼo te akoʼi ʼo Samuele e tana ʼu mātuʼa, neʼe fiafia ia ʼi te tauhi kia Sehova ʼi tona fale fehikitaki. ʼI te taʼu fuli ʼe ʼolo ia Ana mo Elekana ʼo atolasio ʼi te fale fehikitaki makehe ʼaia, pea mo ʼaʼahi tanā kiʼi tama. Pea ʼi te taʼu fuli neʼe ʼave e Ana te kofu tuʼa foʼou neʼe ina fai maʼa Samuele.
ʼI te hoholo ʼo te ʼu taʼu, neʼe haga tauhi aipe ia Samuele ʼi te tapenakulo ʼo Sehova, pea neʼe ʼofa ia Sehova pea mo te hahaʼi kia ia. Kae neʼe mole lelei te aga ʼa Ofeni pea mo Fineasi, te ʼu foha ʼo te pelepitelo lahi. Neʼe nā fai te ʼu meʼa kovi, pea nā fakaneke ʼihi ke nātou talagataʼa mo nātou kia Sehova. Neʼe tonu ke toʼo e Elia ia nāua tona ʼu tuʼulaga faka pelepitelo, kae neʼe mole ina fai te faʼahi ʼaia.
Neʼe mole fakagafua e te tūpulaga ko Samuele ki te ʼu meʼa kovi ʼaē neʼe hoko ʼi te tapenakulo ke tuku ai tana tauhi ʼaē kia Sehova. Neʼe tokosiʼi ia nātou ʼaē neʼe ʼoʼofa moʼoni kia Sehova, pea kua fualoa te mole heʼeki toe palalau ʼa Sehova ki he tagata. ʼI te lahilahi ake ʼo Samuele neʼe hoko ai te meʼa ʼaenī:
Neʼe moe ia Samuele ʼi te tapenakulo pea logo ia ki te leʼo ʼe pāui age kia ia. Neʼe ina tali fēnei: ‘Koʼeni ʼau.’ Pea neʼe tuʼu ake ia ʼo ʼalu kia Elia, pea ina ʼui age: ‘Neʼe ke pāuiʼi koa la ia ʼau, koʼeni ʼau.’
Kae neʼe tali age e Elia: ‘Neʼe mole ʼau pāuiʼi koe; ʼalu ʼo moe.’ Pea toe ʼalu ai ia Samuele ʼo moe.
Pea neʼe toe pāui age: ‘Samuele!’ Pea toe tuʼu ake ia Samuele ʼo ʼalu kia Elia. Pea ina ʼui fēnei: ‘Neʼe ke pāuiʼi koa la ia ʼau, koʼeni ʼau.’ Kae neʼe tali age e Elia: ‘Neʼe mole ʼau pāuiʼi koe, foha. ʼAlu ʼo moe.’ Pea neʼe toe liliu ia Samuele ʼo moe.
Pea tuʼa tolu leva tona pāuiʼi, ‘Samuele!’ Pea ʼalu ia Samuele kia Elia ʼo ina ʼui fēnei: ‘Koʼeni ʼau, pea ʼe ʼau ʼiloʼi neʼe ke pāuiʼi ʼau.’ Kua ʼiloʼi leva e Elia ʼi te temi ʼaia neʼe ko Sehova ʼaē neʼe pāui ki ai. Pea neʼe ʼui maʼana kia Samuele: ‘ ʼAlu ʼo moe, pea ka toe pāui atu leva, pea ʼe tonu ke ke ʼui fēnei: “Palalau, Sehova, he ko tau kaugana ʼe fakalogo atu.” ’
Neʼe fai e Samuele te meʼa ʼaia ʼi te toe pāui age ʼa Sehova. Neʼe ʼui age e Sehova kia Samuele ʼe ina tautea anai ia Elia pea mo tona ʼu foha. Ki muli age neʼe mamate ia Ofeni pea mo Fineasi ʼi te tau mo te kau Filisitini, pea ʼi te logo ʼa Elia ki te meʼa ʼaē neʼe hoko, neʼe toka foʼohake ia ia ʼo fasi tona muliʼulu pea mate ai mo ia. Koia neʼe hoko moʼoni te ʼu palalau ʼa Sehova.
ʼI te lahi ake ʼa Samuele, neʼe liliu ia ko te tuʼi fakamāu fakamuli ʼo Iselaele. ʼI te temi ʼaē neʼe kua matuʼa ai, neʼe kole age e te hahaʼi ki ai: ‘Fili he hau ke pule kia mātou.’ Neʼe mole fia fai e Samuele te faʼahi ʼaia, koteʼuhi neʼe ko Sehova tonatou hau. Kae neʼe ʼui age e Sehova ke mulimuli ki te meʼa ʼaē neʼe kole age e te hahaʼi.