Tantara 55

Tsaiky Hely Nanompo Zan̈ahary

ZATÔVO tsaiky hely io, tsy zen̈y? Samoela an̈arany. Ely an̈aran̈a lelahy mitana lohanany io. Izio mpisôron̈oben’Israely. Lelahy ndreky man̈angy io, babany ndreky mamany. Irô nan̈atitry izy tamy Ely. Elkana an̈aran̈a babany, Hana an̈aran̈a mamany.

Samoela tamy zen̈y mbala efatra na dimy taon̈o. Izy hipetraka amy tabernakelin’i Jehovah, miaraka amy Ely ndreky mpisôron̈o hafa tao. Nan̈ino eky Elkana ndreky Hana nan̈amia zanakan-drô mbala hely io hanompo Jehovah amy tabernakely? Alô zahavatsika.

Taon̈o maro talohan’izen̈y, Hana nalahelo. Izy tamy zen̈y baka tsy niteraka, kanefa izy ti hahazo zanaka mare. Andra araiky, Hana koa fa nandeha tamy tabernakelin’i Jehovah, izy nivavaka. Volan̈iny: ‘Kaza adin̈a zaho, Jehovah e. Zaho koa amianao zanaka lelahy araiky, zaho man̈ano vava fa hamiako anao izy, hanompo anao, zisk’izy maty.’

Jehovah nan̈eky vavakanany, ke fanjava maromaro tafaran’izen̈y, Hana niteraka Samoela. Tian’i Hana mare zanany lelahy io. Rango izy mbala hely fa nampianariny raha mikasiky Jehovah. Volan̈iny tamy vadiny: ‘Samoela koa fa afaka nono, hateriko hanompo Jehovah amy tabernakely an̈y.’

Zen̈y raha hitatsika ataon’i Hana ndreky Elkana amy sary io. Ravoravo Samoela nanompo tamy tran̈olain’i Jehovah tao, fôtony babany ndreky mamany nampianatra izy tsarabe. Isaka taon̈o Hana ndreky Elkana mandeha manompo amy tran̈olay fivavahan̈a io, baka iô mizaha zanakan-drô. Isaka taon̈o koa Hana mitaondra akanjo vo nizahiriny amian̈a Samoela.

Nahadin̈y taon̈o maro Samoela nanompo Jehovah tamy tabernakely tao, ke ravoravo Jehovah ndreky olo jiaby. Kanefa, zanaka Ely mpisôron̈obe naditry. Hofinia ndreky Finehasa an̈aran-drô. Naro hadalan̈a nataon-drô, baka iô irô nitariky olo tsy han̈araka volan̈a Jehovah koa. Ely tsy tôkony nan̈ambela irô han̈ano mpisôron̈o eky, fa irô nibanjainy fo.

Zen̈y tsy nataon’i Samoela tamban̈a tsy hanompoan̈a Jehovah, ndray izy mbala hely zen̈y. Efa ela Jehovah tsy nivolan̈a tamin’olombelon̈o eky, fôtony vitsy fo olo ten̈a tia izy tamy zen̈y. Samoela koa fa bebe, ty raha niboaka:

Samoela koa fa nandry tamy tabernakely tao, nisy fiô ren̈iny, nampifoha izy. Izy namaly: ‘Zaho ty.’ Izy baka tiô nilomoay nandeha tamy Ely, nivolan̈a: ‘Anao nikaiky zaho, zaho ty.’

Ely nivolan̈a: ‘Zaho tsy nikaiky anao. Indao mimpody mandry.’ Samoela nandry.

Tiô fo, nisy fiô nikaiky izy fan̈indroeny: ‘Samoela!’ Nitsangana Samoela, nilomoay tamy Ely tan̈y koa. Volan̈iny: ‘Anao nikaiky zaho, zaho ty.’ Ely baka tiô nivolan̈a: ‘Zaho tsy nikaiky anao, zanako ô. Indao anao mandry.’ Samoela nimpody nandry.

Nikaiky fan̈intelony koa fiô in̈y: ‘Samoela!’ Samoela nilomoay tamy Ely tan̈y koa. Volan̈iny: ‘Mba anao eky nikaiky zaho in̈y e. Zaho ty.’ Ely amy zay nahay fa Jehovah nikaiky izy in̈y. Volan̈iny tamy Samoela: ‘Indao anao mandry. Izikoa izy mbala mikaiky, volàn̈a kara’ty: “Mivolàn̈a Jehovah, fa mpanomponao mitandren̈y anao.” ’

Jehovah koa fa nikaiky Samoela, nivolan̈iny raha in̈y. Jehovah nivolan̈a tamy Samoela fa hisaziny Ely ndreky ry zanany. Tafaran’izin̈y, Hofinia ndreky Finehasa naty, irô koa fa niady tamy Filistiny aby io. Ely koa fa naharen̈y zen̈y, lavo nantsilan̈y. Vozon̈onany folaka, ke izy naty. Narin̈y ankitin̈y volan̈a Jehovah.

Samoela koa fa be, nanjary mpitsara. Izy mpitsara farany tamin’Israely. Izikoa izy fa nahainatoe, olo nivolan̈a taminany: ‘Mifidiana ampanjaka hitaondra zahay.’ Samoela tsy ti han̈ano raha zen̈y, fôtony Jehovah fa ampanjakan-drô. Ndray izy man̈ano zen̈y, Jehovah nan̈iraka izy han̈eky volan̈an’olo aby io.

1 Samoela 1:1-28; 2:11-36; 4:16-18; 8:4-9.