¿MÁASAʼ jach jatsʼuts le chan xiʼipalaʼ? U kʼaabaʼeʼ Samuel. Le máak machik u pooloʼ Elí, u nojoch j-kʼiinil Israel. Le máaxoʼob taas le chan xiʼipal yiknal Elioʼ, u taataʼob, Elcana yéetel Ana.

Chéen kampʼéel wa cinco jaʼaboʼob yaan tiʼ Samuel. Baʼaleʼ yaan u pʼáatal kajtal tu tabernáculo Jéeoba le tuʼux yaan Elí yéetel uláakʼ j-kʼiinoʼoboʼ. ¿Baʼaxten kex jach chichan Samueleʼ tsʼoʼok u taasaʼal tumen Elcana yéetel Ana utiaʼal u meyajt Dios teʼ tabernáculooʼ? Koʼox ilik.

Maʼiliʼ úuchuk lelaʼ, Anaeʼ jach okʼom óolchaji. Tumen maʼ táan u páajtal kaʼach u yantal u chaambal, ku tsʼoʼoleʼ jach ku tsʼíiboltik kaʼach utúuliʼ. Bey túunoʼ upʼéel u kʼiinil bijaʼanoʼob xíimbal tu tabernáculo Jéeobaeʼ payalchiʼinaji: ¡Jéeoba, áanteniʼ! Wa ka tsʼáaten utúul in chan xibil paaleʼ, teneʼ yaan in kʼubik utiaʼal ku meyajtech tuláakal u kʼiinil u kuxtal.

Jéeobaeʼ tu núukaj u payalchiʼ Ana, bey túunoʼ maʼ xáanchaj ka tu síijsaj Samueliʼ. Anaeʼ jach u yaabilma kaʼach u chan xibil paal, le oʼolaleʼ jach tu chichnil ka káaj u kaʼansik u kʼaj óolt Jéeoba. Anaeʼ tiaʼalaj tiʼ u yíicham: Ken chan xuulak Samuel yéetel ken in luʼs u chuʼucheʼ, yaan in bisik u meyajt Jéeoba tu tabernáculo.

Teʼ dibujoaʼ, letiʼe baʼax k-ilik ku beetik Ana yéetel Elcanaaʼ. Tumen jach maʼalob kaʼansaʼanik Samuel tumen u taataʼobeʼ, letiʼeʼ jach kiʼimakchaj u yóol ikil u páajtal u meyajtik Jéeoba tu tabernáculo. Láalaj jaʼabeʼ ku taal u taataʼob adorar teʼ tabernáculooʼ, yéetel ku taaloʼob xan u xíimbaltoʼob Samuel. Ken taalakoʼobeʼ Anaeʼ ku taasik upʼéel túumben nookʼ minaʼan u kʼabil u beetmaj utiaʼal u tsʼáa tiʼ Samuel.

Máan yaʼab jaʼaboʼob, Samueleʼ láayliʼ táan u meyaj tu tabernáculo Jéeobaeʼ, jach ku lúubul utsil tiʼ Jéeoba bey xan tiʼ le kaajoʼ. Baʼaleʼ Ofni yéetel Finees, u paalal le nojoch j-kʼiin Elieʼ, kʼasaʼan máakoʼob. Letiʼobeʼ ku beetkoʼob baʼaloʼob kʼaastak, ku beetkoʼob xan u maʼ uʼuyajtʼantaʼal Dios tumen uláakʼ máakoʼob. Kʼaʼabéet kaʼach u luʼsaʼal u beet u j-kʼiiniloʼob tumen Elí, baʼaleʼ maʼ tu beetiʼ.

Le baʼaloʼob kʼaastak ku beetaʼal teʼ tabernáculooʼ maʼ tu beetaj u pʼatik Samuel u meyajtik Jéeobaeʼ. Jéeoba túuneʼ tsʼoʼok u máan kʼiinoʼob maʼ tʼaanak yéetel mix máakiʼ, tumen chéen upʼíit máax jach yaabiltmai. Le ka maas chan nojochchaj Samueleʼ, ka úuch lelaʼ:

Samueleʼ táan u wenel teʼ tabernáculooʼ ka ajsaʼab tumen upʼéel tʼaan. Letiʼeʼ tu núukaj: Wayaneneʼ. Ka líikʼeʼ ka bin áalkabil yiknal Elí, ka tiaʼalajtiʼ: Ta tʼanen, tsʼoʼok xan in taal.

Baʼaleʼ Elieʼ tu núukaj: Teneʼ maʼ tin tʼanechiʼ; xeen chital. Samuel túuneʼ ka bin chital tu kaʼatéen.

Samueleʼ tʼanaʼab tu kaʼatéen: ¡Samuel! Samuel túuneʼ kaʼa líikʼeʼ ka bin tu kaʼatéen yiknal Elí. Ka tiaʼalajtiʼ: Ta tʼanen, tsʼoʼok xan in taal. Baʼaleʼ Elieʼ tu núukajtiʼ: In paal maʼ tin tʼanechiʼ. Xeen tu kaʼatéen chital. Samuel túuneʼ bin chital tu kaʼatéen.

Samueleʼ tʼanaʼab tu yóoxtéen: ¡Samuel! Letiʼeʼ ka bin áalkabil yiknal Elí. Ka tiaʼalajtiʼ: Tsʼoʼok in taal, beooraʼ jach túun ta tʼanen. Elí túuneʼ tu naʼateʼ Jéeoba le ku tʼaanoʼ. Ka tiaʼalaj tiʼ Samuel: Xeen chital tu kaʼatéen, wa tu kaʼa tʼanecheʼ, kʼaʼabéet a waʼalik: Tʼaanen Jéeoba, tumen a palitsileʼ táan u chʼenxikintkech.

Ka kaʼa tʼaanaj Jéeobaeʼ Samueleʼ tu beetaj baʼax aʼalaʼantiʼ tumen Elí. Jéeoba túuneʼ tiaʼalaj tiʼ Samuel u kaʼaj u castigar Elí yéetel u paalal. Ka máan kʼiineʼ Ofni yéetel Fineeseʼ kíimoʼob táan u baʼateloʼob yéetel le filisteoʼoboʼ, le ka tu yojéeltaj Elí le baʼax tsʼoʼok u yúuchloʼ, lúubij, ka túukʼ u kaaleʼ ka kíimij. Bey túun béeychajik le baʼax tiaʼalaj Jéeobaoʼ.

Le ka nojochchaj Samueleʼ, letiʼ kʼuch u beetuba u tsʼook juesil tiʼ u kaajil Israel. Le ka chʼíijeʼ le israelitaʼoboʼ tiaʼaloʼobtiʼ: Yéey utúul rey utiaʼal u gobernartoʼon. Samueleʼ maʼ u kʼáat kaʼachiʼ, tumen u jaajileʼ Jéeoba u reyoʼob. Baʼaleʼ Jéeobaeʼ tiaʼalajtiʼ ka u yuʼub le baʼax kiaʼalik le kaajoʼ.