Historia 55

Ti hombrehuiiniʼ runi ni na Dios

DXANDÍʼ galán baʼduhuiiniʼ ca njaʼ. Labe Samuel. Hombre ni nabaʼqui naʼ galaa íquebe nga Elí, xaíque stiʼ ca ni ruzaaquiʼ guʼxhuʼ stiʼ Israel. Cani né hombrehuiiniʼ ca ra nuu Elí la? nga nga bixhózebe Elqaná ne jñaabe Ana.

Samuel napa biaʼ tapa o gaayuʼ iza. Laabe chindezanebe Elí ne xcaadxi de ca ni ruzaaquiʼ guʼxhuʼ que ndaaniʼ tabernáculo stiʼ Jiobá. Peru, xiñee bedané Elqaná ne Ana hombrehuiiniʼ Samuel riʼ para guni ni na Dios ndaaniʼ tabernáculo riʼ pue. Guidúʼyanu.

Caadxi iza ante de ni guca riʼ la? Ana guizáʼ biuube triste purtiʼ qué ganda gápabe ti xiiñibe, nécaxa laabe nápabe gana gápabe tobi. Nga runi ti dxi ora guyebe ndaaniʼ tabernáculo stiʼ Jiobá la? biʼniʼ orarbe: ¡Ay Jiobá, cadi gusiaandadiluʼ naa! Pa lii gudiiluʼ naa ti xiiñeʼ la? naa zudiéʼ laabe lii para gúnibe ni racaláʼdxiluʼ guidubi naca xquedanabánibe.

Jiobá bicábibe oración stiʼ Ana, ne despué laabe gúpabe Samuel. Ana guizáʼ gunaxhiibe xiiñihuiinibe, ngue runi nahuiiniruʼ baʼduhuiiniʼ que bisiidibe laa de Jiobá. Laabe gúdxibe xheelabe: Cásipeʼ guiniisi Samuel ne maʼ cadi iquiiñebe de naa la? maca ziniáʼ laabe ndaaniʼ tabernáculo stiʼ Jiobá para gúnibe ni na.

Nga nga ni rúʼyanu cayuni Ana ne Elqaná lu dibuju riʼ. Ne cumu ca bixhoze Samuel maʼ bisiidiʼ chaahuicaʼ laabe la? yanna nuube nayecheʼ purtiʼ chigúnibe ni na Jiobá ndaaniʼ tabernáculo stiʼ. Cada iza, ca bixhózebe reeda guni adorarcaʼ ndaaniʼ yoo risaca riʼ, ne reeda gánnacaʼ xiiñihuiinicaʼ. Ne guiráʼ iza la? Ana riné ti lari sicarú ni rúnibe para Samuel.

Ridiʼdiʼ iza, Samuel cayúnirube ni na Jiobá ndaaniʼ tabernáculo stiʼ, Jiobá ne ca binni guidxi que riuláʼdxicaʼ modo laabe. Peru Hofní ne Finehás ca xiiñiʼ Elí xaíque stiʼ ca ni ruzaaquiʼ guʼxhuʼ que la? cadi nacháʼhuidicaʼ. Laacabe rúnicabe puru si ni qué iquiiñeʼ, ne rucaacabe binni cadi guzuubaʼ stiidxaʼ Dios. Elí naquiiñeʼ nibee laacabe de ni ruzaaquiʼ guʼxhuʼ, peru qué rúnidibe ni.

Samuel qué rudiibe lugar ca guendaquéiquiiñeʼ raca ndaaniʼ tabernáculo que guxhaleʼ laabe de gúnibe ni na Jiobá. Peru maʼ napa dxi qué huaniʼné Jiobá nin ti hombre, purtiʼ huaxiéʼ si binni nga nadxii laabe. Riniisi si Samuel xcaadxi la? ndiʼ nga ni raca:

Samuel nisiaasiʼ ndaaniʼ tabernáculo que ora rucuaaniʼ ti ridxi laabe. Laabe ricábibe: Raríʼ nuaa. Riásabe ne riebe ra nuu Elí ne rábibe laa: Bicariʼdxuʼ naa, ne raríʼ nuaa.

Peru Elí na rabi laabe: Naa qué nucaaríʼdxediaʼ lii; bibiguetaʼ lu luunaʼ stiuʼ. Samuel ribiguetaʼ lu luunaʼ stiʼ.

Ra biropa ridxi que na: ¡Samuel! Ngue runi Samuel riasa ne rie ra nuu Elí. Bicariʼdxuʼ naa, ne raríʼ nuaa, na Samuel. Peru Elí na rabi laabe: Qué nucaaríʼdxediaʼ lii xiiñehuiineʼ, yegaʼta. Ne Samuel rigaʼta.

Lu guionna biaje ucuá ridxi que na: ¡Samuel! ne Samuel ruxooñeʼ rie ra nuu Elí. Raríʼ nuaa; yanna huaxa bicariʼdxuʼ naa, rábibe Elí. Yanna maʼ nanna Elí de que Jiobá nga cucaa ridxi. Ngue runi rábibe Samuel: Yegaʼta, ne pa laabe gucaaríʼdxibe lii la? napuʼ xidé guiniʼluʼ: Guníʼ Jiobá, purtiʼ naa cucaadiaʼga lii.

Nga nga ni riníʼ Samuel ora Jiobá ribiguetaʼ rucaa ridxi. Jiobá rábibe Samuel de que zuquíxebeni Elí ne ca xiiñiʼ. Despué la? Hofní ne Finehás ráticaʼ ra cadindenécabe ca filisteu que, ne ora runadiaga Elí ni guca riʼ la? riábabe, raʼche yánnibe ne rátibe. Zacá raca ni guníʼ Jiobá que.

Samuel riniisibe ne reeda gácabe últimu juez stiʼ Israel. Ora rióʼxhobe la? ca binni guidxi que rabi laabe: Gulí ti rey guni mandar laadu. Samuel qué nadiʼ, purtiʼ Jiobá nga dxandipeʼ rey stícabe. Peru Jiobá rabi laabe gucaadiágabe ca binni guidxi que.

1 Samuel 1:1-28; 2:11-36; 4:16-18; 8:4-9.