စီလူး​ကဲထီၣ်ဝဲ အံၣ်စရ့လး​အစီၤပၤ အဆိကတၢၢ်​တဂၤ​န့ၣ်လီၤ. ဘၣ်ဆၣ် ယဟိဝၤ​ညိကွံာ်​အီၤ​ဒီး ဃုထၢ​ဒၤဝံး လၢ​အလီၢ်​န့ၣ်လီၤ. ဘၣ်ဃး​ဒၤဝံးန့ၣ် ပ​သ့ၣ်ညါဘၣ် တၢ်ဂ့ၢ်​အါမံၤအါမၠိ​န့ၣ်လီၤ. ဖဲ​အနီၢ်ဆံး​သးစၢ်​အခါ ဒုးတၢ်​ဒီး ဒိးတကါ​ဖးဒိၣ်​ကၤလယး​အဂ့ၢ်, တၢ်န့ၣ်​ဝံၤအလီၢ်ခံ ဘၣ်ဃ့ၣ်​ဟးထီၣ်လၢ စီလူး​လၢ​အသးကါတၢ်​အအိၣ်​အဂ့ၢ်, တၢ်န့ၣ်​ဝံၤအလီၢ်ခံ မုၣ်ဃံလၤ​အဘံၤကါယံးလး​တြီ ဒၤဝံး​လၢ​သု​တမၤဘၣ် တၢ်မၤ​အၢအၢသီသီ​အဂ့ၢ်တဖၣ်​န့ၣ်လီၤ.

တၢ်န့ၣ်​ဝံၤအလီၢ်ခံ ပ​သ့ၣ်ညါဘၣ် ဒၤဝံး​အဖိခွါ ၡလိၤမိၤ​အဂ့ၢ်​အါမး​န့ၣ်လီၤ. ၡလိၤမိၤ​ဟံးန့ၢ်​ဒၤဝံး​အလီၢ်​ဝံၤ ဟဲ​ကဲထီၣ်ဝဲ အံၣ်စရ့လး​အစီၤပၤ​န့ၣ်လီၤ. ကီၢ်အံၣ်စရ့လး​အစီၤပၤ​အဆိကတၢၢ်​သၢဂၤန့ၣ် ပၢတၢ်​အနံၣ် ၄၀ စုာ်စုာ်​န့ၣ်လီၤ. ၡလိၤမိၤ​သံ​ဝံၤအလီၢ်ခံန့ၣ် ကီၢ်အံၣ်စရ့လး​လီၤဖး ခံခီ​န့ၣ်လီၤ. ဟဲ​ကဲထီၣ်ဝဲ​ကီၢ်​ကလံၤစိး, ဒီး​ကီၢ်​ကလံၤထံး ခံ​ကီၢ်​န့ၣ်လီၤ.

ကလံၤစိး​အကီၢ် ၁၀ န့ၣ် အိၣ်စံာ်အိၣ်ကျၢၤဝဲ ၂၅၇ နံၣ်န့ၣ်​လီၤ. လၢခံန့ၣ် ဟးဂီၤကွံာ်ဝဲဒၣ်​လၢ ပှၤအၤၡူၢ်ဖိ​အဃိ​န့ၣ်လီၤ. တၢ်န့ၣ်အလီၢ်ခံ​အနံၣ် ၁၃၃ ဝံၤဒီး ကီၢ်​ကလံၤထံး ပှၤ​ခံဒူၣ်​စ့ၢ်ကီး ဟးဂီၤဝဲ​ဒၣ်​လီၤ. ဖဲ​ဆၢကတီၢ်​အဝဲန့ၣ် ပှၤအံၣ်စရ့လးဖိ​သ့ၣ်တဖၣ် ဘၣ်တၢ်​က့ၤဖီၣ်​စိာ်​အီၤ​ဆူ ဘၤဘူၤလိၣ်​န့ၣ်လီၤ. လၢတၢ်န့ၣ်အဃိ တၢ်နီၤဖး ၄ အံၤ​ ပာ်ဖျါထီၣ် တၢ်မၤအသး​အကလုာ်ကလုာ်​လၢ လီၤ​သူၣ်ပိၢ်သးဝး လၢ​အနံၣ် ၅၁၀ အတီၢ်ပူၤ​န့ၣ်လီၤ.