Ta̱ Saúl kúú ta̱ siʼna xi̱kuu rey ñuu Israel. Soo Jehová kǒo níxiinkara koo ta̱yóʼo rey, ta̱ David nda̱ka̱xinra ndu̱u rey nu̱ú ta̱ Saúl. Yóʼo sakuaʼayó ku̱a̱ʼání ña̱ʼa xa̱ʼa ta̱ David. Tá ni̱xi̱yo loʼora ka̱nitáʼanra xíʼin ta̱ Goliat. Tándi̱ʼi xi̱nura nu̱ú ta rey Saúl chi ta̱yóʼo sáa̱ní-inira xínirara. Ta ñá Abigail kǒo nítaxiñá ki̱ʼvira iin tu̱ndóʼo.

Tándi̱ʼi ku̱a̱ʼání ña̱ʼa sákuaʼayó xa̱ʼa ta̱ Salomón se̱ʼe ta̱ David chi ta̱yóʼo kúú ta̱ ndu̱u rey nu̱úra tá ni̱xi̱ʼi̱ra. U̱ni̱ saá na̱ siʼna xi̱kuu rey ña̱ ñuu Israel 40 ku̱i̱ya̱ xa̱ʼndachíñu iin iinna. Tándi̱ʼi ni̱xi̱ʼi̱ ta̱ Salomón, na̱ ñuu Israel nda̱táʼvina iin ta̱ rey xa̱ʼndachíñu nu̱ú 10 ñuu ta inkara xa̱ʼndachíñu nu̱ú u̱vi̱ña.

Na̱ rey na̱ xa̱ʼndachíñu nu̱ú na̱ 10 ñuu 257 ku̱i̱ya̱ xa̱ʼndachíñuna nu̱úna, tasaá ni̱xa̱a̱na ñuu Asiria sa̱ndiʼi-xa̱ʼanana. Tándi̱ʼi ni̱ya̱ʼa 133 ku̱i̱ya̱ saá ndi̱ʼi-xa̱ʼa na̱ inka u̱vi̱ ñuu. Ta vitin nda̱kiʼinna na̱ ñuu Israel ku̱a̱ʼa̱n xíʼinna chí ñuu Babilonia. Ndiʼi ña̱ va̱xi nu̱ú ña̱ TÁʼVI 4 yóʼo ku̱uña ti̱xin 510 ku̱i̱ya̱, ndiʼi tiempo yóʼo ku̱a̱ʼání ña̱ʼa ku̱u.