ရှောလုဟာ ဣသရေလနိုင်ငံရဲ့ ပထမဘုရင်ဖြစ်လာတယ်။ ဒါပေမဲ့ ယေဟောဝါသူ့ကိုပယ်လိုက်ပြီး သူ့နေရာမှာ ဒါဝိဒ်ကိုခန့်လိုက်တယ်။ ဒါဝိဒ်နဲ့ပတ်သက်တဲ့ အကြောင်းအမျိုးမျိုးသိရတယ်။ လူငယ်ဘဝမှာ ဘီလူးကြီးဂေါလျတ်ကိုတိုက်ခဲ့တဲ့အကြောင်း၊ အဲဒီနောက်ပိုင်း မနာလိုတဲ့ရှောလုဆီက ထွက်ပြေးခဲ့ရတဲ့အကြောင်း၊ ပြီးတော့လှပချောမောတဲ့ အဘိဂဲလက ဒါဝိဒ်ကိုမိုက်မဲတဲ့အလုပ်မလုပ်မိအောင် တားခဲ့တဲ့အကြောင်းတွေပေါ့။

ပြီးတဲ့နောက် ဒါဝိဒ်ရဲ့သားရှောလမုန်အကြောင်း အမျိုးမျိုးသိရတယ်။ ရှောလမုန်ကဒါဝိဒ်နေရာကိုယူပြီး ဣသရေလရှင်ဘုရင်ဖြစ်လာတယ်။ ဣသရေလနိုင်ငံရဲ့ပထမရှင်ဘုရင်သုံးပါးဟာ အနှစ် ၄၀ စီအုပ်စိုးခဲ့ကြတယ်။ ရှောလမုန်သေပြီးတဲ့နောက်၊ ဣသရေလနိုင်ငံ နှစ်ခြမ်းကွဲသွားတယ်။ မြောက်ပိုင်းနဲ့ တောင်ပိုင်းဆိုပြီး နှစ်နိုင်ငံဖြစ်လာတယ်။

မြောက်ပိုင်း ၁၀ နွယ်နိုင်ငံဟာ နှစ်ပေါင်း ၂၅၇ နှစ်တည်မြဲခဲ့တယ်။ နောက်ဆုံးမှာ အာရှုရိလူတွေလက်ချက်နဲ့ ပျက်စီးသွားတယ်။ ဒီနောက် နှစ်ပေါင်း ၁၃၃ နှစ်ကြာပြီးနောက် တောင်ပိုင်းနှစ်နွယ်နိုင်ငံလည်း ပျက်စီးသွားတယ်။ အဲဒီအချိန်မှာ ဣသရေလလူမျိုးတွေဟာ ဗာဗုလုန်သုံ့ပန်းအဖြစ်ဖမ်းဆီးခေါ်ဆောင်သွားခံရတယ်။ ဒါကြောင့် အပိုင်း လေး ဟာ သည်းထိတ်ရင်ဖိုအဖြစ်အပျက်တွေ အမျိုးမျိုးရဲ့မြင်ကွင်းတွေ တစ်ခုပြီးတစ်ခု တို့မျက်စိရှေ့ ဖြတ်သန်းသွားမယ့်အချိန်ပိုင်းဖြစ်ပြီး နှစ်ပေါင်း ၅၁၀ ရှည်လျားတဲ့သမိုင်းကို ငုံမိတယ်။