Saul okwa ningi omukwaniilwa gwotango gwaIsrael. Ihe Jehova okwe mu ekelehi, David noye a hogololwa a kale omukwaniilwa pehala lye. Tse otatu ilongo oshindji kombinga yaDavid. Manga ye a li omulumentu omugundjuka, okwa kondjitha omulefule Goliat. Konima ye okwa yi Omukwaniilwa omunefupa Saul ontuku. Opo nduno Abigael omwaanawa okwe mu kankameke okuninga iinima ya nika uugoya.

Tashi landula ko tse otatu ki ilonga iinima oyindji kombinga yomwanamati gwaDavid Salomo, ngoka a ningi omukwaniilwa gwaIsrael pehala lyaDavid. Aakwaniilwa yatatu yotango yaIsrael kehe gumwe okwa pangele uule woomvula 40. Konima yeso lyaSalomo, Israel okwa topolwa momaukwaniilwa gaali, uukwaniilwa wokuumbangalantu nowokuumbugantu.

Uukwaniilwa womazimo 10 wokuumbangalantu owa kala po oomvula 257 omanga inaawu hanagulwa po kAayassur. Nokonima yoomvula 133 uukwaniilwa womazimo gaali gokuumbugantu nawo wo owa hanagulwa po. Oshikando shika Aaisrael oya falwa kuBabilon oyo oonkwatwa. Ano Oshitopolwa OSHITINE otashi hokolola oomvula 510 dhondjokonona, sho iiningomwa oyindji iituntulimwenyo tayi ningwa.